Mwanamuziki maarufu kutoka Uganda, Spice Diana, ameweka wazi safari yake ya maisha ya utotoni iliyojaa changamoto, akimsifia mama yake kwa kujitoa muhanga ili kuwapatia yeye na dada yake maisha bora. Kupitia mahojiano ya hivi karibuni, Spice Diana alisimulia namna mama yake alivyolazimika kuacha familia yake vijijini Kiboga na kwenda jijini Kampala kufanya kazi kama msaidizi wa nyumbani ili kuwahudumia.
Kwa mujibu wa Spice Diana, wazazi wake walitengana akiwa na umri wa miaka mitatu. Hali hiyo ilimlazimu mama yake kuwapeleka kwa bibi yao mkoani Kiboga, kisha kurudi mji mkuu wa Kampala kuanza maisha ya kuhangaika kama mfanyakazi wa ndani katika familia mbalimbali. Lengo lake kuu lilikuwa kuhakikisha watoto wake hawakosekani katika masuala ya msingi kama elimu na makazi bora.
Baada ya miezi kadhaa ya kufanya kazi kwa bidii, mama yake aliweza kuwarudisha watoto wake mjini na kuanza maisha mapya nao. Akiwa Kampala, mama yao alipata mume mwingine aliyewapokea watoto wake kwa moyo wa baba wa kambo, na aliwapatia huduma zote muhimu, zikiwemo ada za shule, chakula na malezi ya upendo. Hata hivyo, penzi hilo halikudumu, kwani baada ya muda kulizuka migogoro ya kifamilia na mwanaume huyo akaondoka kwenye maisha yao kabisa.
Spice Diana amesema kuwa licha ya changamoto zote, ana mshukuru mama yake kwa moyo wake wa kujitolea na uvumilivu usio na mipaka. Amedai mafanikio yake ya leo ni matokeo ya maelekezo na maadili aliyopata kutoka kwa mama yake. Ametumia fursa hiyo kuhimiza vijana kuwaheshimu wazazi wao, hasa wale waliopitia maisha magumu kwa ajili ya kuwalea.
