Kampuni ya teknolojia ya Google imeanzisha mfumo mpya wa kudhibiti na kuzuia matumizi holela ya extensions (viongezo) vinavyotumika kuzima matangazo kwenye kivinjari chake cha Chrome. Hatua hii inalenga kulinda mapato yanayotokana na matangazo, ambayo ni chanzo kikuu cha fedha kwa kampuni hiyo.
Kwa mujibu wa taarifa rasmi kutoka Google, mfumo huo mpya utahakikisha kuwa extensions zote zinazozuia matangazo zinatekeleza sera mpya za usalama na uwazi. Hii ni pamoja na matumizi ya Manifest V3, mfumo wa kisasa unaolenga kudhibiti namna viongezo vinavyoingiliana na tovuti na taarifa za watumiaji.
Hatua hiyo imeibua mjadala mkubwa miongoni mwa watumiaji wa intaneti na wapenda faragha, kwani wengi walitegemea extensions kama AdBlock na uBlock Origin kuondoa matangazo yanayokera na kurahisisha matumizi ya mtandao.
Google imesema haitapiga marufuku moja kwa moja extensions zote za kuzuia matangazo, lakini zile ambazo hazitazingatia viwango vipya, zitafutwa kutoka kwenye Chrome Web Store. Kampuni hiyo imesisitiza kuwa inalenga kuweka uwiano kati ya faragha ya mtumiaji, utendaji wa kivinjari, na kulinda mazingira ya watengenezaji maudhui wanaotegemea mapato ya matangazo.
Wadau wa teknolojia wameonya kuwa mabadiliko haya huenda yakapunguza uhuru wa watumiaji kuchagua namna wanavyotumia mtandao, huku wengine wakitafsiri kama juhudi za Google kuhakikisha kuwa matangazo yake yanaonekana zaidi kwa watumiaji wa Chrome duniani kote.
