Mwanamuziki wa Kenya, Esther Akoth maarufu kama Akothee, amejibu vikali ukosoaji unaoendelea mitandaoni kuhusiana na mavazi aliyovaa katika tukio la hivi karibuni huko Homa Bay.
Kupitia mitandao ya kijamii, Akothee alisisitiza kuwa hana jukumu la kuwa mfano wa kuigwa kwa mtu yeyote na kwamba anapaswa kuachiwa aishi maisha yake kwa namna anayoona inafaa.
Akothee alisema licha ya mashambulizi ya maneno anayopokea, bado ataendelea kushiriki katika matukio anayoalikwa na kufanya maonyesho kwa mtindo wake wa kipekee.
Mwanamuziki huyo ameendelea kusisitiza kuwa maamuzi yake ya kisanii na binafsi hayapaswi kupimwa kwa kipimo cha maadili ya mtu mwingine, akiwataka wakosoaji waache kumfuatilia kwa matarajio yasiyoendana na mtindo wake wa maisha.
Kauli ya Akothee imeibua mjadala mitandaoni, ambapo wafuasi wake wamegawanyika kati ya wanaomuunga mkono kwa kusimamia haki yake ya kujieleza na wale wanaoamini kuwa umma una haki ya kumkosoa kutokana na hadhi yake kama msanii maarufu.
Tukio hili linakuja siku chache tu baada ya picha na video za Akothee akiwa katika vazi lililoibua hisia kali kusambaa mitandaoni, na kusababisha mjadala mkubwa kuhusu mipaka ya uhuru wa msanii na matarajio ya jamii
