Jarida maarufu la Billboard limemtunukia heshima kubwa mkongwe wa muziki wa Nigeria 2Face Idibia, kwa sasa akijulikana kama 2Baba, baada ya kutaja wimbo wake wa kwanza wa solo African Queen kuwa wimbo bora zaidi wa Afrobeats wa muda wote.
Orodha hiyo yenye nyimbo hamsini imetolewa kwa lengo la kuwakumbuka na kuwaenzi waliobadilisha tasnia ya Afrobeats. Kati ya vigezo vilivyotumika ni mwakilishi wa mtindo huo wa muziki, umaarufu wa ndani, upeo wa ushawishi wa kikanda, athari za kitamaduni na mafanikio ya kibiashara.
Mbali na African Queen, nyimbo zingine zilizotajwa katika kumi bora ni pamoja na Ojuelegba ya Wizkid, Nwa Baby (Ashawo Remix) ya Flavour, Calm Down ya Rema, Essence ya Wizkid akiwa amemshirikisha Tems, Love Nwantiti ya CKay, Oliver Twist ya D’banj, Fall ya Davido, Ye ya Burna Boy na Chop My Money (Remix) ya P-Square.
Kutambuliwa kwa African Queen ni ushuhuda wa mchango mkubwa wa 2Baba katika kupandisha kiwango cha Afrobeats na kukifanya kuwa moja ya mitindo ya muziki inayotamba duniani. Tangu kuachiliwa kwake mwaka 2004, wimbo huo umeendelea kubaki kuwa nembo ya mapenzi na utambulisho wa muziki wa Kiafrika kwa vizazi vingi.
