Staa wa muziki kutoka Uganda, Jose Chameleone, amezua mjadala mpya mtandaoni baada ya kuonekana akiwa na ukaribu wa kimahaba na mfanyabiashara maarufu anayeishi Marekani, Juliet Zawedde, katika tamasha la usiku lililofanyika jana.
Wawili hao, ambao uhusiano wao wa karibu umekuwa ukileta minong’ono kwa muda mrefu, waliibua shangwe na nderemo kutoka kwa mashabiki waliokuwa ukumbini baada ya kubusiana hadharani jukwaani, hali iliyowafanya mashabiki kuzidi kudai kwa sauti kuwa uhusiano wao upewe hadhi rasmi ya ndoa.
Zawedde aliwasili Uganda wiki iliyopita kusherehekea siku yake ya kuzaliwa, huku sherehe kuu ikifanyika Julai 19 katika klabu ya Noni Vie jijini Kampala. Hata hivyo, Chameleone hakuweza kuhudhuria tukio hilo kutokana na kuwa safarini mjini Bujumbura.
Lakini jana usiku, wawili hao walipata nafasi ya kukutana tena jukwaani, na tukio hilo lilibadilika kuwa burudani ya kipekee kwa mashabiki waliokuwa wamehudhuria. Video inayosambaa kwa kasi mitandaoni inaonesha Zawedde akipanda jukwaani, kumkumbatia Chameleone kwa nguvu, kisha kumbusu kwa mikono miwili usoni mbele ya umati mkubwa uliokuwa ukishangilia.
Kitendo hicho kimewasha moto mpya kwenye mitandao ya kijamii, ambapo mashabiki wengi wamekuwa wakiandika maoni ya kuwataka wawili hao kuhalalisha penzi lao.
Hadi sasa, hakuna mmoja kati yao aliyetoa kauli rasmi kuhusu hatua inayofuata katika uhusiano wao, lakini wazi ni kwamba mashabiki wao wana matumaini makubwa kuona penzi hili likibadilika kutoka ‘urafiki wa karibu’ na kuwa rasmi zaidi.
Hii si mara ya kwanza wawili hao kuhusishwa kimapenzi, lakini tukio la jana linaonekana kama uthibitisho mpya wa ukaribu wao unaozidi kushika kasi mbele ya macho ya umma.
