Aliyewahi kung’ara kama mmoja wa waigizaji chipukizi kwenye kipindi maarufu cha Machachari, Joy Ohon, ameweka wazi sababu iliyomfanya aachane na uigizaji wa kitaalamu.
Akizungumza kwenye mahojiano na Obinna TV, Joy alieleza kwa uwazi kuwa alilazimika kuacha kuigiza kwa sababu sekta ya uigizaji nchini Kenya haimpi kipato cha kutosha kujikimu kimaisha.
“Kuigiza Kenya hakulipi. Si kama vile watu wanavyodhani. Hii si kazi unayoweza kutegemea kama chanzo kikuu cha kipato,” alisema Joy.
Joy, ambaye mashabiki wengi walimjua tangu akiwa mtoto katika kipindi cha Machachari, amesema kuwa kwa sasa hushiriki uigizaji tu kwa ajili ya burudani na kujifurahisha, lakini hana mipango ya kurejea kwenye uigizaji wa kitaalamu au wa kudumu.
“Siku hizi nikiigiza, ni kwa ajili ya furaha yangu binafsi. Sifanyi tena kama kazi au ajira,” aliongeza.
Kauli ya Joy imeibua mjadala kuhusu hali halisi ya sekta ya sanaa na filamu nchini Kenya, ambapo wasanii wengi wamekuwa wakilalamikia malipo duni, kutolindwa kwa kazi zao, na ukosefu wa fursa endelevu.
Wataalamu wa masuala ya burudani wanasema kuwa licha ya vipaji vingi kuwapo nchini, mazingira ya kazi na miundombinu ya kisanaa bado haijaimarika vya kutosha kuwasaidia wasanii kuendesha maisha yao kupitia fani hiyo.
