Mke wa msanii wa muziki wa injili Guardian Angel, Esther Musila, ametoa majibu makali kwa wakosoaji wanaoendeleza mazungumzo kuhusu ndoa yake, akisisitiza kuwa uhusiano wao si wa kujadiliwa na umma.
Kupitia mfululizo wa video alizochapisha kwenye mitandao ya kijamii, Musila amesema kuwa hana haja ya kutoa maelezo kwa mtu yeyote kuhusu ndoa yake, akibainisha kwamba yeye na Guardian Angel hawakuwahi kutafuta idhini ya mtu yeyote kabla ya kufunga ndoa.
Musila ameeleza kuwa watu wengi wamekuwa wakimkosoa kwa sababu ya tofauti ya umri kati yake na mumewe, lakini akasisitiza kuwa thamani yake haiwezi kupimwa kwa miaka yake. Ameongeza kuwa Guardian Angel alimchagua kwa sababu ya utu wake na si kwa sababu ya umri.
Aidha, amesisitiza kuwa ndoa yao si biashara ya mtu mwingine na kwamba watu waligundua kuhusu ndoa yao kupitia mitandao ya kijamii. Amesema kuwa watu wanaoendelea kumzungumzia kwa msingi wa umri wanapoteza muda kwa sababu yeye ni zaidi ya miaka yake na ana utambulisho wake binafsi.
Mwanamama huyo wa watoto watatu amemalizia kwa kueleza kuwa hana mpango wa kuondoka katika ndoa yake, akiwataka wakosoaji wake waache kumfuatilia na waendelee na maisha yao.
