Mwanamuziki wa Kenya na mshirika wa kundi maarufu la Elani, Maureen Kunga, ametangaza rasmi kuanza safari yake ya muziki kama msanii wa kujitegemea kupitia wimbo wake wa kwanza aliouachia kwa jina “Majaliwa.”
Wimbo huo, ambao tayari umeanza kuvutia mashabiki mtandaoni, ni utunzi wa kipekee wenye kugusa hisia, kwani Kunga ameuandika kama heshima na shukrani kwa mama yake. Akizungumzia kazi hiyo mpya, ameeleza kwamba “Majaliwa” si tu wimbo wa mapenzi ya kifamilia, bali pia ni hadithi ya baraka na imani katika safari ya maisha.
Maureen, ambaye amejulikana kwa sauti yake ya kipekee ndani ya Elani, amesema kuwa kuanza kwake kazi ya solo hakumaanishi mwisho wa kundi hilo, bali ni nafasi yake binafsi ya kuchunguza mitindo mipya ya muziki na kueleza hadithi zake binafsi.
Mashabiki na wadau wa muziki wamepongeza hatua hiyo, wakimtaja Maureen kama msanii mwenye uwezo mkubwa wa kusimama peke yake katika tasnia ya muziki wa Afrika Mashariki.
