Msanii maarufu wa kizazi kipya, Stoopid Boy, ametangaza rasmi kuwa ameokoka na kuamua kumtumikia Kristo, siku chache baada ya kutoka katika kituo cha kurekebisha tabia (rehab) alikokuwa akipokea matibabu kwa miezi mitatu.
Kupitia ujumbe wa kugusa moyo aliouchapisha kwenye mitandao ya kijamii, Stoopid Boy alifichua kuwa kipindi alichokaa rehab kilimsaidia kutafakari maisha yake na kuelewa kuwa kuna kusudi kubwa zaidi kwake chini ya mwongozo wa Mungu.
“Nimepitia mengi. Lakini sasa ninaona wazi. Yesu amenitoa gizani. Leo, siwezi kujivunia fedha au umaarufu, bali neema ya Mungu. Nimeamua kutembea na Kristo milele,” aliandika.
Kwa muda mrefu, Stoopid Boy amekuwa akihusishwa na maisha ya anasa na migogoro ya kibinafsi, jambo lililompelekea kuingia rehab mapema mwaka huu kwa msaada wa familia na marafiki wa karibu. Hata hivyo, hatua yake ya sasa inaonekana kama mwanzo mpya si tu kwa maisha yake binafsi, bali pia kwa muziki wake.
Mashabiki na wenzake kwenye tasnia ya burudani wamempongeza kwa uamuzi wake huo, wakimtakia kila la heri katika safari yake ya kiroho na uponyaji wa maisha. Wengine wamempongeza kwa ujasiri wa kusimama hadharani na kueleza ushuhuda wake.
Kwa sasa haijabainika iwapo Stoopid Boy atarudi kwenye muziki kwa mtazamo mpya wa kiroho, lakini ishara zinaonyesha kwamba kuna kipindi kipya kinaanza maishani mwake.
