Koku Lwanga Atoa Ujumbe wa Hekima Kuhusu Ndoa na Uvumilivu
Robert Elim June 17, 2025
Comments (0)

Koku Lwanga Atoa Ujumbe wa Hekima Kuhusu Ndoa na Uvumilivu

Mtengeneza maudhui kwenye mitandao ya kijamii, Koku Lwanga, amewasilisha ujumbe mzito wa hekima kuhusu ndoa na mahusiano, akisisitiza kuwa ndoa si rahisi kama inavyoonekana kwa nje, na hakuna anayejua jinsi ya kuimudu hadi awe ndani yake. Katika video ya awali ambayo imeibuka tena na kugonga vichwa vya habari mitandaoni, Koku anawahimiza watu kuwa na huruma, uvumilivu, na uelewa badala ya kuwahukumu wale wanaopitia changamoto au kuvunjika kwa ndoa zao. Koku amesema kuwa watu wengi huingia kwenye ndoa wakiwa na matumaini na malengo mema, lakini mara nyingi hukumbana na hali halisi ngumu ambayo haikuwa sehemu ya matarajio yao. Ametoa wito kwa jamii kuepuka lawama na kashfa, na badala yake kuonyesha msaada wa kihisia kwa wale wanaopitia nyakati ngumu. “Ndoa ni safari yenye milima na mabonde. Badala ya kuhukumu, tuwe na moyo wa kusaidia na kuelewa,” alisisitiza Koku. Ujumbe huu unakuja wakati ambapo ndoa ya Koku na mumewe Daddie Marto inaripotiwa kuwa kwenye mtikisiko, kufuatia madai ya usaliti. Koku anadaiwa kumshutumu Marto kwa kutoka nje ya ndoa yao, madai ambayo Marto ameyakanusha hadharani. Hali hiyo imeibua mjadala mpana kwenye mitandao ya kijamii kuhusu maisha ya ndoa, huku wengi wakisifu msimamo wa Koku kwa kuchagua kutuma ujumbe wa hekima na si chuki, licha ya hali ngumu anayopitia.

Read More
Daddie Marto Ajibu Madai ya Mkewe Koku Lwanga Kuhusu Ukatili na Usaliti
Robert Elim June 16, 2025
Comments (0)

Daddie Marto Ajibu Madai ya Mkewe Koku Lwanga Kuhusu Ukatili na Usaliti

Msanii na mtangazaji maarufu Daddie Marto ameibuka na kutoa tamko rasmi kufuatia madai mazito yaliyotolewa na mkewe, Koku Lwanga, yanayomhusisha na usaliti wa ndoa pamoja na vitendo vya ukatili wa kimwili na kihisia. Katika taarifa aliyotoa kupitia mitandao ya kijamii, Marto alikanusha vikali tuhuma hizo, akieleza kuwa zimejengwa kwa msingi wa taarifa potofu na zenye nia ya kumchafulia jina. Akiwa na msimamo wa wazi, alisisitiza kuwa hastahimili wala kuunga mkono aina yoyote ya ukatili, na kwamba hali inayoonyeshwa kwenye mitandao siyo halisi. “Ningependa kusema kwa uwazi kabisa: sitetei wala siungi mkono ukatili wa aina yoyote, wa kimwili, kihisia, au kisaikolojia. Aidha, nakataa kwa nguvu zote kuwa mhanga wa tuhuma za uongo na zenye madhara makubwa.” Marto aliendelea kueleza kuwa simulizi inayosambazwa kwa sasa imepotoshwa na haioneshi ukweli kamili wa hali halisi iliyotokea katika maisha yao ya kifamilia. “Hadithi inayoendelea kusambaa mtandaoni ni ya upande mmoja na imeondoa muktadha muhimu. Inapotosha na inaleta madhara makubwa, si kwa jina langu tu, bali pia kwa watoto wetu, familia zetu, na jamii tunayoishi.” Haya yanajiri wakati mashabiki na watumiaji wa mitandao ya kijamii wakiendelea kufuatilia kwa karibu mvutano huu wa wawili hao ambao kwa muda mrefu walionekana kuwa mfano wa ndoa yenye uthabiti na mshikamano. Kwa sasa, Koku Lwanga bado hajajibu hadharani kauli ya mumewe, huku wengi wakiomba wawili hao kusuluhisha tofauti zao kwa njia ya faragha na heshima kwa familia yao.

Read More