Lutaaya Akanusha Kutelekeza Binti, Atoa Ushahidi wa Malipo ya Ada
Mbunge na mwanamuziki wa Uganda, Geoffrey Lutaaya, ameibuka na kujitetea vikali baada ya video ya msichana mwenye umri wa miaka 17, anayejulikana kama Nambatya, kusambaa mtandaoni ikimshutumu kwa kutelekeza majukumu ya kifamilia. Katika taarifa yake kwa vyombo vya habari, Lutaaya amekanusha madai hayo akionyesha stakabadhi anazodai ni ushahidi wa malipo ya ada kamili kwa ajili ya masomo ya Nambatya katika shule ya bweni ya Stella Maris Nsuube. Amefafanua kuwa mama wa msichana huyo ndiye aliyemtoa shuleni hapo na kumhamishia katika shule nyingine ya hadhi ya chini, Boston High School. Lutaaya pia amefichua kuwa wakati wa janga la COVID-19, alilazimika kulipa mama ya Nambatya kiasi cha Shilingi Milioni 6 za Uganda (UGX) ili kuepuka fedheha ya umma, hasa baada ya kuchaguliwa kuwa mbunge. Ameongeza kuwa kwa sasa yuko tayari kumchukua binti huyo kuishi naye na familia yake na kumgharamia masomo nje ya nchi, akiamini kuwa hilo litampa mustakabali bora. Hata hivyo, video ya Nambatya ikieleza kuwa amekosa msaada wa kifedha na kutelekezwa na baba yake ilizua hasira kubwa mitandaoni. Wakosoaji walitilia shaka uadilifu wa Lutaaya kama kiongozi wa kisiasa, huku baadhi wakielekeza lawama kwa mke wake, Irene Namatovu, wakimtuhumu kwa kutokuwa na huruma kwa msichana huyo.
Read More