Tag: google photos

Katika kipindi ambacho matumizi ya akili bandia (AI) yamepamba moto duniani, kampuni ya Google haijabaki nyuma. Sasa inajiandaa kuzindua kipengele kipya katika Google Photos kiitwacho Remix, ambacho kitawezesha watumiaji kubadilisha picha zao kuwa mitindo ya kisanaa kwa kutumia akili bandia ya kizazi kipya (GenAI). Kupitia Remix, watumiaji wa Google Photos wataweza kugeuza picha za kawaida kuwa kazi za sanaa zenye muonekano wa katuni, anime, claymation, na mitindo mingine ya ubunifu wa picha. Kipengele hiki kinafuata mwelekeo unaozidi kushika kasi mitandaoni, ambapo watu hutumia zana kama Grok, ChatGPT, au Lensa AI kubuni matoleo ya kisanii ya picha zao binafsi. Tofauti na programu zingine huru, Remix itakuwa imejengwa moja kwa moja ndani ya Google Photos, hivyo kufanya mchakato wa kuhariri picha kuwa wa haraka na rahisi kwa mamilioni ya watumiaji wa Android na iOS duniani kote. Ingawa kipengele hiki bado kiko kwenye majaribio, taarifa zinaeleza kuwa Remix inatarajiwa kutangazwa rasmi katika mkutano wa Google I/O 2025, ambao huhusisha uzinduzi wa teknolojia mpya za Google kila mwaka. Hatua hii inaonesha namna Google inavyolenga kuunganisha AI ya kisasa na matumizi ya kila siku ya watumiaji, hasa wale wanaopenda ubunifu wa picha na kujieleza kwa njia za kipekee. Kwa kuleta uwezo wa GenAI moja kwa moja ndani ya app maarufu kama Google Photos, huenda Google ikaingia katika ushindani mkali na programu kama PicsArt, Prisma, na Lensa AI ambazo zimekuwa zikitumiwa kwa miaka ya hivi karibuni kwa madhumuni kama haya. Lakini tofauti kuu ni kwamba Remix inakuja ikiwa rahisi kutumia, imeunganishwa na akaunti yako ya Google, na bila haja ya kupakua programu nyingine