Gor Mahia Warejea Kileleni mwa Ligi Kuu Baada ya Sare na Nairobi United
Robert Elim December 22, 2025
Comments (0)

Gor Mahia Warejea Kileleni mwa Ligi Kuu Baada ya Sare na Nairobi United

Mabingwa wa zamani wa Ligi Kuu ya Kenya, Gor Mahia, walirejea kileleni mwa jedwali la ligi hiyo licha ya kutoka sare ya bao 1–1 dhidi ya Nairobi United, katika mechi iliyochezwa jana. Gor Mahia waliingia uwanjani wakiwa katika nafasi ya pili lakini walianza mechi kwa kasi, wakifanikiwa kupata bao la mapema katika dakika ya 15 na kuongoza kwa bao moja hadi mapumziko ya kipindi cha kwanza. Hata hivyo, katika kipindi cha pili, Gor Mahia walishindwa kuimarisha safu yao ya ulinzi na kuruhusu Nairobi United kusawazisha bao katika dakika ya 58. Licha ya juhudi kutoka kwa pande zote mbili, hakuna timu iliyofanikiwa kupata bao la ushindi hadi kipenga cha mwisho. Matokeo hayo yaliifanya Gor Mahia kufikisha alama 24, sawa na Tusker FC, lakini Gor wakirejea kileleni mwa jedwali kwa tofauti ya mabao. Nairobi United, kwa upande wao, wanasalia katika nafasi ya 11 wakiwa na alama 17. Katika mechi nyingine ya ligi hiyo, Bandari FC iliibuka na ushindi wa bao 1–0 dhidi ya Mathare United, ikiendelea kuimarisha nafasi yake kwenye jedwali.

Read More
Gor Mahia Yaendelea Kutamba Ligi Kuu Kenya
Robert Elim November 9, 2025
Comments (0)

Gor Mahia Yaendelea Kutamba Ligi Kuu Kenya

Gor Mahia iliendelea kushamiri katika Ligi Kuu ya Soka humu nchini walipomenyana na mabingwa watetezi Kenya Police katika mechi yao ya 7 Jumapili alasiri. Kogalo ambao mara ya mwisho walipomenyana na Polisi walitoka sare bao moja kwa moja tarehe 22 mwezi Juni mwaka huu walionesha ubabe wao huku wakiongoza kwa mabao mawili kwa nunge  kabla ya mapumziko. Green Army ilifunga mapema dakika ya 2 kupitia kwa Felix Oluoch kabla ya Sharif Musa kuongeza la pili dakika ya 29. Katika michuano nyigine, KCB iliandikisha sare ya kwanza msimu huu baada ya kutoka sare bao 1-1 na Bandari FC. APS Bomet Fc walitoka sare ya bao 1-1 na Mathare United huku Kakamega Homeboyz wakisajili sare yao ya kwanza msimu huu baada ya kulazimisha sare ya bao 1-1 na Murang’a Seal. Shabana ilitwaa ushindi wao wa tatu katika mechi 8 baada ya kuilaza Ulinzi Stars bao moja kwa nunge.

Read More
Kocha wa Gor Mahia Atangaza Kujiamini Kabla ya Mechi na Simba SC
Robert Elim September 9, 2025
Comments (0)

Kocha wa Gor Mahia Atangaza Kujiamini Kabla ya Mechi na Simba SC

Kocha Mkuu wa Gor Mahia, Charles Akonnor ameelezea imani na kikosi chake huku vigogo hao wa soka humu nchini wakitarajiwa kuchuana na wababe wa Tanzania, Simba SC katika mechi ya kirafiki ya kujiandaa kwa msimu mpya kesho Septemba 10 jijini Dar es Salaam, Tanzania. Mechi hiyo inatarajiwa kuvutia maelfu ya mashabiki kutoka mataifa yote mawili ni ya kunoa tomi hizo kabla ya kung’oa nanga Kwa michuano ya ligi za nyumbani. Gor Mahia, ambao ni wabambe wa Ligi Kuu ya Kenya waliwasili Tanzania mapema wiki hii na wamekuwa wakiimarisha mazoezi yao. Kocha mkuu Charles Akonnor, ambaye alichukua hatamu mapema mwaka huu anasema kikosi chake kiko tayari kushamiri. Michuano ya ligi msimu huu itang’oa nanga tarehe 20 mwezi huu.

Read More
Gor Mahia Yapiga Kalamu Safu Yote ya Ufundi Kufuatia Msimu Mgumu
Robert Elim July 2, 2025
Comments (0)

Gor Mahia Yapiga Kalamu Safu Yote ya Ufundi Kufuatia Msimu Mgumu

Mabingwa wa zamani wa Ligi Kuu ya FKF, Gor Mahia, wamefuta safu nzima ya ukufunzi, ikiwemo maafisa wa usalama wa timu, katika hatua ya kuimarisha benchi la kiufundi kabla ya kuanza kwa msimu mpya. Kupitia taarifa rasmi, uongozi wa kilabu hicho umesema kuwa uamuzi huo umetokana na tathmini ya kina kuhusu utendaji wa timu msimu uliopita, na ni sehemu ya mkakati mpana wa kuboresha uwezo wa kiufundi na ushindani wa timu hiyo. Hatua hiyo inajiri wakati Gor Mahia ikijaribu kujipanga upya baada ya msimu wa hali ya sintofahamu ulioandamana na mabadiliko ya mara kwa mara ya benchi la ufundi, na matokeo ambayo hayakuwaridhisha mashabiki wake. Msimu uliopita, klabu hiyo ilipitia changamoto kubwa, ikiwemo kuajiri makocha watatu tofauti. Msimu ulianza chini ya kocha raia wa Kroatia, Sinisa Mihajlovic, ambaye aliteuliwa kuchukua nafasi ya Mbrasil Leo Neiva. Hata hivyo, Mihajlovic alitimuliwa baada ya kuhudumu kwa wiki chache pekee. Hatimaye, Zedekiah “Zico” Otieno aliingia na kushirikiana na kocha msaidizi Michael Nam, na kufanikisha Gor Mahia kumaliza katika nafasi ya pili kwenye msimamo wa ligi. Kwa sasa, mashabiki wa K’Ogalo wanatarajia kuona hatua madhubuti za kuirejesha timu hiyo kileleni mwa soka la Kenya msimu ujao.

Read More
KPL: Sofapaka Yatandika Tusker 7–1, Yatibua Mbio za Ubingwa
Robert Elim May 18, 2025
Comments (0)

KPL: Sofapaka Yatandika Tusker 7–1, Yatibua Mbio za Ubingwa

Ligi Kuu ya Soka nchini Kenya iliendelea leo Jumapili kwa mechi kadhaa muhimu zilizopigwa katika viwanja tofauti kote nchini. Timu zilipambana kuimarisha nafasi zao kwenye msimamo wa ligi huku msimu ukikaribia ukingoni. Kariobangi Sharks walipoteza pointi tatu muhimu baada ya kuchapwa mabao mawili kwa bila na Kakamega Homeboyz. Ushindi huo umeiwezesha Homeboyz kufikisha pointi 54 na kupanda hadi nafasi ya tano kwenye msimamo wa ligi. Nairobi City Stars walitoka sare ya bao moja kwa moja dhidi ya Posta Rangers. City Stars sasa wanasalia katika nafasi ya 17, hali inayowatia wasiwasi mkubwa wa kushuka daraja ikiwa matokeo yao hayataboreka katika mechi zijazo. Shabana walilazwa bao moja kwa sifuri na Mara Sugar, katika mechi iliyochezwa mjini Kisii. Ushindi huo umeisaidia Mara Sugar kupanda hadi nafasi ya 15, wakijinasua kutoka eneo la hatari kwa sasa. Katika mechi nyingine, Gor Mahia walitoshana nguvu na Murang’a SEAL kwa sare tasa. Gor Mahia sasa wanashikilia nafasi ya tatu kwa pointi 54, wakizidiwa na Tusker FC kwa alama moja na viongozi wa ligi Kenya Police kwa pointi saba. Bandari na AFC Leopards walitoka sare ya bila kufungana. AFC Leopards sasa wako nafasi ya sita wakiwa na pointi 46, huku Bandari wakisalia katikati ya jedwali kwa pointi 42. Kenya Police waliendelea na kampeni yao ya kutwaa taji la ligi baada ya kuibuka na ushindi wa bao moja kwa bila dhidi ya FC Talanta. Ushindi huo umeimarisha uongozi wao kwa pointi 61, wakisalia kileleni mwa msimamo. Katika mechi ya mwisho ya siku, Sofapaka waliwashangaza mashabiki kwa kuicharaza Tusker FC mabao saba kwa moja katika ushindi wa kuvutia zaidi wa siku. Ushindi huo si tu umewainua kutoka nafasi za chini, bali pia umevuruga nafasi ya Tusker FC kwenye mbio za ubingwa. Kenya Police wanaendelea kuongoza ligi kwa pointi 61, wakifuatiwa na Tusker FC walio na 55, licha ya kipigo kizito walichopokea. Gor Mahia wanakamata nafasi ya tatu kwa pointi 54. Kakamega Homeboyz na AFC Leopards wanafuatia. Mkiani mwa msimamo bado ni Bidco United, walio na alama 29 na wakiwa katika hatari kubwa ya kushuka daraja. Huku msimu ukielekea ukingoni, kila mechi ina uzito wake. Mashabiki wanaendelea kushuhudia msimu wa kusisimua wa soka la nyumbani, ambapo kila bao linaweza kuamua hatima ya timu.

Read More
KPL: Sharks Waizamisha KCB, Gor Mahia Wazidi Kuteleza Dhidi ya City Stars
Robert Elim May 15, 2025
Comments (0)

KPL: Sharks Waizamisha KCB, Gor Mahia Wazidi Kuteleza Dhidi ya City Stars

Ligi Kuu ya Kenya (KPL) iliendelea leo Alhamisi, 15 Mei 2025, kwa michezo kadhaa ya kusisimua, huku timu zikiwania pointi muhimu katika mbio za ubingwa na kujiokoa kutoka kushuka daraja. Katika mechi ya kwanza, Kariobangi Sharks walipata ushindi muhimu wa bao 1 kwa 0 dhidi ya KCB. Bao hilo lilifungwa na H. Aroko katika dakika ya 69 na likatosha kuwapa Sharks alama tatu muhimu. Ushindi huo umewawezesha kupanda hadi nafasi ya 12 kwenye msimamo wa ligi wakiwa na pointi 35 baada ya mechi 31. Kwa upande wao, KCB walianguka hadi nafasi ya 7, wakibaki na pointi 41. Katika mchezo mwingine uliovutia mashabiki wengi, Gor Mahia walijikuta wakiangushwa na Nairobi City Stars kwa mabao 2 kwa 1. Hansel Ochieng aliwapa City Stars bao la kuongoza katika dakika ya 5, lakini Benson Omalla akaisawazishia Gor Mahia dakika ya 10. Hata hivyo, City Stars walipata penalti ambayo iliwapa bao la ushindi kupitia kwa Vincent Owino katika dakika ya 17. Hii ilikuwa pigo kubwa kwa Gor Mahia ambao walikuwa wakisaka kupunguza pengo dhidi ya vinara wa ligi. Baada ya kipigo hicho, Gor Mahia wanasalia katika nafasi ya tatu na pointi 53 kutokana na mechi 30. City Stars nao wamepanda hadi nafasi ya 15, wakifikisha pointi 33 baada ya mechi 31. Ushindi huu unawapa matumaini mapya ya kujinusuru dhidi ya hatari ya kushuka daraja. Kwa sasa, nafasi ya kwanza inashikiliwa na Kenya Police FC wenye pointi 58 baada ya mechi 31, wakifuatwa na Tusker FC waliokusanya pointi 55. Gor Mahia wapo katika nafasi ya tatu na pointi 53, huku Shabana wakifunga mduara wa nne kwa pointi 52. Mchezo wa soka nchini Kenya unaendelea kuwa na ushindani mkali, na kila mechi imekuwa na uzito wake. Mashabiki wanatarajia mechi zijazo zitatoa mwanga zaidi kuhusu bingwa wa msimu huu na timu zitakazoshuka daraja.

Read More