Tag: Huddah Monroe

Mrembo maarufu katika mitandao ya kijamii, Huddah Monroe, ameonyesha shukrani zake kwa wakili mmoja wa Kenya aliyemsaidia kurejesha tabasamu lake kwa kumsaidia kifedha. Kupitia Instastory, Huddah amefichua kuwa wakili huyo alimpatia shilingi milioni 2, fedha zilizotumika kurekebisha meno yake yaliyokuwa yameharibika baada ya kuhusika kwenye ajali akiwa bado msichana mdogo. Akizungumza kuhusu safari yake ya maisha, Huddah amesema alikulia katika mazingira ya umaskini, hali iliyowafanya wazazi wake kushindwa kumhudumia kwa matibabu ya meno. Upungufu huo ulimfanya kukumbwa na changamoto kubwa shuleni, ambapo wenzake walimchekelea kwa kukosa meno ya juu (front teeth).. Kwa sasa, Huddah anasema msaada huo umempa nguvu mpya na kuondoa majeraha ya kisaikolojia aliyobeba kwa miaka mingi. Amepongeza wakili huyo kwa moyo wa kujitolea na kuonyesha kuwa msaada wa kijamii unaweza kubadilisha maisha ya mtu kwa kiwango kikubwa.

Socialite kutoka Kenya Huddah Monroe amefunguka kwa hisia kali kufuatia kifo cha aliyekuwa Mbunge nchini humo, marehemu Cyrus Jirongo, akieleza namna alivyomsaidia kifedha kwa kiasi kikubwa na kumtoa kwenye hali ngumu ya maisha. Kupitia ujumbe wake wa rambirambi aliouchapisha mitandaoni, Huddah amesema msaada wa Jirongo ulikuwa wa kipekee na wa kubadilisha maisha, akisisitiza kuwa ni mmoja wa watu wachache waliomsaidia bila masharti. Katika ujumbe huo, Huddah amesema kuwa mara nyingi kumekuwepo na dhana kwamba watu wa jamii ya Waluhya hawatoi pesa, lakini kwa upande wake Jirongo alimthibitishia kinyume chake kwa vitendo. Huddah amesema msaada alioupata kutoka kwa Jirongo ulimtoa kabisa kwenye lindi la umaskini, hatua ambayo ilimfungulia ukurasa mpya wa maisha na mafanikio aliyofikia leo. Kifo cha Cyrus Jirongo kimetokea mapema jana baada ya kuhusika katika ajali mbaya ya barabarani kwenye barabara kuu ya Nakuru–Nairobi, tukio lililoshtua taifa la Kenya na kuacha majonzi makubwa kwa familia, marafiki na watu waliowahi kuguswa na ukarimu wake.

Mjasiriamali na mshawishi wa mitandaoni, Huddah Monroe, ameibua mjadala mkali mitandaoni baada ya kukosoa kampuni za ulinzi nchini Kenya kwa kuendelea kuwapa wanawake, wakiwemo single mothers, zamu za usiku. Kupitia ukurasa wake wa Instagram, Huddah ametaja kuwa ni jambo lisilo la kawaida kwa wanawake kupewa zamu za usiku wakati wanahitajika zaidi nyumbani kwa ajili ya watoto wao. Huddah amesema kuwa watoto, hasa wa umri mdogo, wanahitaji uwepo na uangalizi wa mama zao wakati wa usiku kwa sababu ndiyo muda ambao wengi wanapata usalama wa kihisia, mwongozo na utulivu. Ameongeza kuwa kampuni zinazotoa ratiba hizo hazizingatii changamoto za single mothers, ambao mara nyingi hawana mtu wa kubadilishana majukumu nao nyumbani. Mrembo huyo hata hivyo ametoa changamoto kwa kampuni za ulinzi nchini Kenya kuunda mwongozo utakaowaruhusu wanawake kupata mapumziko wakati wa usiku, kwani ratiba za kazi za usiku huathiri ustawi wa familia.

Sosholaiti na mfanyabiashara maarufu wa Kenya, Huddah Monroe, ameibua mjadala mitandaoni baada ya kupandisha bei ya ofa yake ya lunch date kutoka KSh 50,000 hadi KSh 150,000. Hatua hiyo inadaiwa kuchochewa na uhitaji mkubwa kutoka kwa mashabiki wanaotaka kukutana naye. Kupitia tangazo lake, Huddah alisema mpango huo unalenga kutoa nafasi kwa mashabiki wake waliotamani muda mrefu kupata muda wa ana kwa ana naye. Aidha, alidai kuwa malipo hayo yamekuwa mengi kiasi cha kufanya akaunti yake ya M-Pesa kufurika. Awali, Huddah alikuwa ameeleza kuwa gharama ya lunch date ilikuwa KSh 50,000, lakini sasa imeongezwa mara tatu. Vilevile, aliongeza kuwa kwa mtu anayetaka kuwa rafiki wake wa karibu, atatakiwa kulipia kiasi cha KSh 1 milioni. Tangazo hilo limeendelea kuvutia hisia mseto, mashabiki wengine wakimpongeza kwa kuthamini muda wake, huku wengine wakipinga bei hizo wakiziona kama kupita kiasi.

Mjasiriamali na mwanasosholaiti maarufu wa Kenya, Huddah Monroe, ameibua mjadala mkali mitandaoni baada ya kulalamikia wafanyakazi wake kwa kile alichokitaja kama kukosa akili ya kawaida (common sense) katika kushughulikia mambo madogo kazini. Katika ujumbe wake uliojaa malalamiko na kejeli kupitia InstaStory, Huddah alieleza kukerwa na kile alichokiita uzembe na ukosefu wa ufanisi, kutoka kwa wafanyakazi wa ngazi ya juu hadi chini. Alisisitiza kuwa hana tatizo na kazi kubwa, bali ni mambo madogo kama usafi na uangalifu wa mazingira ambayo yanamvunja moyo zaidi. “Nina timu nzima, lakini hakuna anayefikiria kuondoa maua yaliyoanza kuoza mezani. Nitafungua duka la kwanza la roboti Kenya!, Nahitaji clone (nakala yangu) kwa sababu timu yangu haiwezi hata kushughulikia mambo madogo,” aliandika Huddah, akionyesha wazi kutoridhika na utendaji wa kikosi chake cha sasa. Kauli hiyo imezua hisia mseto kutoka kwa mashabiki na wafuasi wake, baadhi wakimuunga mkono kwa kutaka nidhamu kazini, huku wengine wakimkosoa kwa lugha ya ukali dhidi ya wafanyakazi wake. Wapo pia waliodokeza kuwa kauli yake inaonyesha shinikizo kubwa analokumbana nalo katika kuendesha biashara. Huddah, anayejulikana kwa ujasiriamali wake na uwazi katika mitandao ya kijamii, amekuwa mstari wa mbele kukuza bidhaa za urembo chini ya chapa ya Huddah Cosmetics, na pia hujulikana kwa mtindo wake wa maisha wa kifahari. Hadi sasa, hajatoa taarifa nyingine kufuatia malalamiko hayo, lakini ujumbe wake umeonyesha wazi kuwa anataka mabadiliko ya haraka katika timu yake – au roboti wachukue usukani.