Tag: LULU DIVA

Msanii wa Bongo Fleva, Lulu Diva, ameibuka na kufafanua kuhusu madai ya mitandaoni yanayodai kuwa ametekelezwa kimapenzi na mfanyabiashara wa Togo, Kevin Sowax, ambaye pia ni ex wa mwanamitindo Hamisa Mobetto. Akizungumza na gazeti la Mwanaspoti, Lulu Diva alisema hajawahi kuwa katika mahusiano ya kimapenzi na Kevin, wala kusafiri kwenda China kama inavyodaiwa. Alisema taarifa hizo zimemshangaza kwani hazina ukweli wowote na ni kama hadithi anazosikia kuhusu maisha yake, ambazo hata yeye huzisikia kutoka kwa watu. “Yaani hii ndiyo ile hali ya kusikia habari zako ikiwa hata wewe huzijui. Nimesikia minong’ono mingi kuhusu kutelekezwa sijui China. Mimi sijawahi kusema Kevin ni mpenzi wangu, wala sijawahi kwenda China. Hakuna kitu kama hicho bwana,” alisema Lulu Diva. Kuhusu kuwahi kuonekana hadharani akiwa na Kevin, Lulu Diva alisema hawezi kukataa kuwa waliwahi kuonekana pamoja, lakini hilo halimaanishi walikuwa kwenye uhusiano wa kimapenzi. “Sikatai kama nimeonekana na Kevin pamoja, lakini hiyo si sababu ya kuhusishwa moja kwa moja na uhusiano. Sitaki hata kulizungumzia hilo kwa undani. Cha kuelewa ni kwamba siwezi kutelekezwa,” alisema kwa msisitizo. Msanii huyo ambaye kwa sasa anatamba na wimbo wake mpya ‘Kipenseli’, alisema angetamani mashabiki wake waelekeze nguvu kwenye kazi zake za sanaa badala ya kushiriki kusambaza taarifa zisizo na msingi. “Naombeni mniache niko bize na Kipenseli. Naombeni sapoti ya kazi yangu,” aliongeza. Kwa miezi ya hivi karibuni, Lulu Diva amekuwa akitajwa mara kwa mara kwenye tuhuma za kimapenzi mitandaoni, hasa baada ya ripoti kuibuka kwamba anahusiana na Kevin, miezi michache baada ya mfanyabiashara huyo kuachana rasmi na Hamisa Mobetto mnamo Aprili mwaka huu.