Tag: Microsoft Office

Kampuni ya Microsoft imefanya mabadiliko makubwa ya kimwonekano kwa bidhaa zake maarufu za Microsoft Office, ikiwemo programu kama Word, Excel, PowerPoint, Teams, Outlook, na Access. Hii ni mara ya kwanza kwa kampuni hiyo kubadili logo za programu hizi kwa zaidi ya miaka mitano. Logo mpya zimeundwa kwa kutumia mtindo wa kisasa wa “gradient”, pamoja na glyph design ambayo ni nyembamba, tambarare lakini ya kuvutia. Muonekano huo mpya umechukua msukumo kutoka kwa mitindo ya kisasa ya kimtandao kama vile icons mpya za iPhone za mwaka huu, pamoja na muundo wa One UI 8.5 wa Samsung, ambazo zinaonekana kuelekea zaidi kwenye 3D gradients zenye rangi zinazovutia macho. Mabadiliko haya yanaashiria jinsi Microsoft inavyojielekeza kwenye soko la watumiaji wa simu janja, kwani kwa sasa, programu za Office hazitumiki tu kwenye kompyuta bali pia kwenye simu, ambako kuna idadi kubwa ya watumiaji wapya. Kwa kubadili muonekano wa logo, Microsoft inalenga kuweka bidhaa zake katika muonekano wa kisasa unaovutia watumiaji wa kizazi kipya, huku ikihakikisha zinaendana na mitindo mipya ya kimuundo inayopendwa duniani kote. Hii ni hatua nyingine muhimu kwa Microsoft katika kuimarisha mtazamo wa kisasa wa bidhaa zake, na kuonyesha kuwa kampuni hiyo inaendelea kuzingatia mabadiliko ya kiteknolojia na mahitaji ya watumiaji wa sasa.