Tag: Nyashinski

Mwanamuziki nguli wa Kenya, Nyashinski, amethibitisha kuwa albamu yake mpya itajulikana kwa jina “Yariasu” na itaingia sokoni tarehe 19 Septemba 2025. Albamu hiyo inabeba jumla ya nyimbo 13, ambazo msanii huyo amezitaja kuwa za moto na zimeandaliwa kwa ubora wa kimataifa. Kupitia mitandao ya kijamii, Nyashinski amewataka mashabiki wake kufanya pre-order ya albamu hiyo mtandaoni ili kuwa miongoni mwa watu wa kwanza kuisikiliza mara tu itakapotoka. Hata hivyo, baadhi ya mashabiki wake wameonekana kutaka zaidi, wakimhimiza kuachia albamu yote kwa pamoja badala ya kutoa ngoma moja moja. Licha ya maoni hayo, tayari Nyashinski ameachia nyimbo mbili kutoka kwenye albamu hiyo, ambazo ni “Tai Chi” na “P.i.c”, zilizopokelewa kwa shangwe na mashabiki wake. Albamu ya “Yariasu” inatarajiwa kuwa miongoni mwa matoleo makubwa zaidi ya mwaka huu, ikidumisha nafasi ya Nyashinski kama mmoja wa wasanii wakubwa na wabunifu zaidi katika ukanda wa Afrika Mashariki.

Mwanamuziki kutoka Kenya, Nyashinski, ametangaza ujio wa album yake mpya ambayo kwa mujibu wake itakuwa na kiwango cha kimataifa. Akizungumza kuhusu mradi huo, Nyashinski amesema kuwa kwa muda mrefu amekuwa akiwaburudisha mashabiki wa Afrika Mashariki kupitia nyimbo zake, lakini sasa ameamua kupeleka muziki wake kwenye jukwaa la dunia. Msanii huyo amefichua kuwa amekuwa akirekodi album hiyo kwa takribani miezi minane, na kwa sasa yupo kwenye hatua za mwisho kukamilisha video za nyimbo zitakazojumuishwa kwenye kazi hiyo. Kwa mujibu wa tracklist iliyoichapishwa mtandaoni na Nyashinski, album hiyo inatarajiwa kuwa na jumla ya nyimbo 13, ikiwemo ngoma zinazojulikana kama Tai Chi na P.I.C. Amewataka mashabiki wake kujiandaa kwa safari ya kipekee ya muziki, akiwahimiza kuisikiliza album hiyo kuanzia wimbo wa kwanza hadi mwisho, akiahidi itakuwa tofauti na kazi zake za awali. Hii inakuja wiki chache baada ya kujiunga na kampuni kubwa ya muziki, Sony Music, hatua inayotajwa kufungua milango ya kimataifa kwa safari yake ya kisanii.

Mwanamuziki nyota wa Kenya, Nyashinski, amesaini mkataba wa kihistoria na kampuni kubwa ya muziki duniani, Sony Music, hatua inayotajwa kama msukumo mkubwa kwa muziki wa Afrika Mashariki kuingia kwenye jukwaa la kimataifa. Sony Music imemsifu Nyashinski kama msanii halisi na mwenye vipaji vingi ambaye muziki wake wa kipekee unaweza kugusa watu wa tamaduni mbalimbali. Kampuni hiyo inaamini kuwa ubunifu wake utasaidia kuinua zaidi hadhi ya muziki wa eneo hilo duniani. Mkataba huo pia unampa Nyashinski nafasi ya kuonyesha vipaji vya Afrika Mashariki kwa hadhira ya kimataifa, pamoja na kurejesha nyimbo zake maarufu kwenye majukwaa ya muziki mtandaoni kote duniani. Hatua hii itawawezesha mashabiki wa zamani na wapya kufurahia nyimbo zake zote bila vikwazo. Makubaliano haya yanaonekana kama hatua ya kihistoria kwa sekta ya muziki wa Afrika Mashariki, yakifungua milango zaidi ya wasanii wa eneo hili kushirikiana na soko la kimataifa.