Tag: Paul Tergat

Timu ya wanariadha mashuhuri wa Kenya imepata dhamira mpya kuelekea mbio za marathoni za mwaka huu za Sanlam Cape Town zitakazofanyika siku ya Jumapili. Mashindano hayo yanatarajiwa kuvutia wakimbiaji wa viwango vya juu kutoka mataifa mbalimbali, huku Kenya ikitarajiwa kung’aa kupitia kikosi chake cha wazoefu na chipukizi. Kwa mujibu wa waandaaji, mbio za wanaume zitajumuisha wakimbiaji wawili walioandikisha muda wa chini ya saa mbili na dakika tano, wanne walio chini ya saa mbili na dakika sita, na wengine wanne walio chini ya saa mbili na dakika saba, ishara ya ushindani wa hali ya juu utakaoshuhudiwa mjini Cape Town. Kwa upande wa wanawake, kutakuwa na wanariadha wawili waliowahi kukimbia kwa muda wa saa mbili na dakika 16 na wengine wawili waliotimiza muda wa saa mbili na dakika 19, wakionyesha ubora wa safu ya wakimbiaji watakaowania taji hilo mwaka huu. Timu ya wanariadha wa Kenya waliodhaminiwa na kampuni ya Sanlam ilikabidhiwa rasmi bendera ya taifa katika hafla iliyoongozwa na aliyekuwa kinara wa Kamati ya Olimpiki ya Kenya, Paul Tergat. Akizungumza wakati wa tukio hilo, Tergat amewatakia wanariadha hao mafanikio mema akisisitiza umuhimu wa nidhamu, ari ya ushindani, na kupeperusha vyema jina la taifa. Kikosi hicho kinajumuisha majina maarufu kama Lilian Jepkorir, Fridah Lodepa, Vincent Ronoh, na Josephat Kipkoech, miongoni mwa wengine. Wote wanatarajiwa kutoa ushindani mkali dhidi ya wakimbiaji kutoka Ethiopia, Afrika Kusini na mataifa mengine ya bara la Afrika na kwingineko.