Tag: RAPCHA

Msanii wa Bongofleva, Rapcha ameomba radhi kwa Baraza la Sanaa la Taifa (BASATA) na kwa Watanzania baada ya wimbo wake uitwao Yeeh kusambaa mitandaoni ukiwa na video yenye maudhui ya ngono. Rapcha alifika katika ofisi za BASATA na kufanya mazungumzo na Katibu Mtendaji, Dkt. Kedmon Mapana, ambapo alielezwa kuhusu ukiukwaji wa maadili uliopo kwenye kazi hiyo ya sanaa. Katika kikao hicho, msanii huyo alikiri kosa lake na kuomba msamaha kwa jamii, akiahidi kuwa atazingatia maadili ya kitamaduni na kisheria katika kazi zake zijazo. Mara baada ya mazungumzo hayo, Rapcha alichukua hatua ya kuondoa video ya wimbo huo kutoka kwenye majukwaa yote ya kidijitali. BASATA, kwa upande wake, imesisitiza kuwa litaendelea kushirikiana na wasanii ili kuhakikisha kazi zao zinabaki kuwa na maudhui chanya kwa jamii. Hatua ya Rapcha imepokelewa kwa hisia tofauti kutoka kwa mashabiki na wadau wa sanaa, huku baadhi wakimpongeza kwa kukubali makosa na kuonyesha mfano wa uwajibikaji, ilhali wengine wakitoa wito kwa wasanii kujitathmini kabla ya kuachia kazi zao kwa umma.