Kenya Kuandaa Fainali za CHAN 2025 Kasarani
Robert Elim June 20, 2025
Comments (0)

Kenya Kuandaa Fainali za CHAN 2025 Kasarani

Kenya imepata nafasi ya kuwa mwenyeji wa fainali ya makala ya nane ya Kombe la Mataifa ya Afrika kwa wachezaji wa ligi za nyumbani (CHAN), itakayochezwa tarehe 30 Agosti 2025 katika Uwanja wa Kimataifa wa Moi, Kasarani. Hii ni mara ya kwanza kwa Kenya kuwa mwenyeji wa fainali ya mashindano haya ya kipekee barani Afrika. Mashindano hayo yataandaliwa kwa ushirikiano kati ya Kenya, Tanzania na Uganda. Mechi ya ufunguzi itachezwa Dar es Salaam tarehe 2 Agosti, mechi ya nafasi ya tatu Kampala, na fainali kufanyika jijini Nairobi. Kenya itaongoza Kundi A litakalojumuisha Morocco, Angola, DR Congo na Zambia. Uwanja wa Kasarani unafanyiwa ukarabati mkubwa ili kufanikisha maandalizi ya fainali hiyo, ikiwemo maboresho ya taa, mfumo wa VAR, na huduma za mashabiki. Serikali kwa kushirikiana na FKF imeahidi kuwa mashindano hayo yatafanyika kwa viwango vya kimataifa. Mashindano ya CHAN yanatoa jukwaa la kuibua vipaji vya wachezaji wa ndani, huku pia yakitarajiwa kuongeza mapato kupitia utalii na biashara. CAF inatarajiwa kutangaza ratiba kamili ya mechi na taratibu za tiketi hivi karibuni.

Read More
Lava Lava Apata Ubalozi Wake wa Kwanza Tangu Kuondoka WCB
Robert Elim June 15, 2025
Comments (0)

Lava Lava Apata Ubalozi Wake wa Kwanza Tangu Kuondoka WCB

Staa wa muziki wa Bongo Fleva, Lava Lava, ametangaza rasmi mkataba wake wa kwanza wa ubalozi tangu alipoondoka kwenye lebo ya WCB Wasafi. Msanii huyo sasa ni balozi wa kampuni ya kuuza magari ya Khushi Motors Tanzania. Akizungumza na waandishi wa habari katika uzinduzi rasmi wa yard ya kampuni hiyo, Lava Lava alisema amefurahia kushirikiana na Khushi Motors, ambayo inalenga kuwasaidia Watanzania wengi kupata magari kwa bei nafuu na zinazolingana na hali ya maisha ya watu wa kawaida. “Khushi Motors ipo kwa ajili ya kuhakikisha kila Mtanzania anapata gari analolitamani kwa bei inayomuwezesha,” alisema Lava Lava wakati wa tukio hilo, huku akionyesha furaha yake kwa hatua hiyo mpya kwenye maisha yake ya sanaa na biashara. Ubalozi huu unakuja kama ishara ya mwanzo mpya kwa Lava Lava baada ya kujitegemea nje ya WCB, na mashabiki wake wengi wamepongeza hatua hiyo, wakimtakia mafanikio zaidi ndani na nje ya muziki. Kwa sasa, Lava Lava anatarajiwa kushiriki katika kampeni mbalimbali za masoko za Khushi Motors, ikiwa ni pamoja na matukio ya mauzo, promosheni na kampeni za kidigitali kupitia mitandao ya kijamii.

Read More
KRG The Don Atoa Wito wa Amani Kati ya Kenya na Tanzania Kufuatia Kuzuia kwa Wanaharakati
Robert Elim May 29, 2025
Comments (0)

KRG The Don Atoa Wito wa Amani Kati ya Kenya na Tanzania Kufuatia Kuzuia kwa Wanaharakati

Msanii na mfanyabiashara maarufu wa Kenya, KRG The Don, ametoa maoni yake kuhusu tukio la wanaharakati wa Kenya waliokamatwa na kuzuiliwa nchini Tanzania hivi karibuni. Akiwa na mtazamo wa kipekee, KRG amesema licha ya wanaharakati hao kudai kuwa walikuwa wakitetea haki, huenda hawakuzingatia mbinu sahihi za kuwasilisha ujumbe wao, jambo ambalo lilichangia wao kujipata matatani. “Ni kweli wanaharakati wana jukumu la kutetea haki, lakini kuna njia sahihi za kufanya hivyo. Kuna uwezekano walihusishwa na ajenda ya kumtetea kiongozi wa upinzani nchini Tanzania, Mbowe, na pengine walilipwa ili kusukuma ajenda hiyo,” alisema KRG. Aidha, KRG alieleza kusikitishwa na mzozo unaoendelea mitandaoni kati ya Wakenya na Watanzania kuhusu suala hilo. Amesisitiza kuwa Kenya na Tanzania ni mataifa ya kindugu, na haipaswi kuwa na mivutano ya kijamii au kisiasa. “Mimi nimekuwa nikisafiri Tanzania mara nyingi, na kila wakati nimepokelewa kwa heshima na mapenzi makubwa. Sioni sababu ya sisi kuchochea chuki kupitia mitandao ya kijamii,” aliongeza. Katika hatua nyingine, KRG amedokeza kuwa anapanga kusafiri hivi karibuni kwenda Tanzania kwa lengo la kumuunga mkono Rais Samia Suluhu Hassan katika juhudi zake za kutafuta muhula mwingine wa uongozi. Kauli ya KRG imepokewa kwa mitazamo tofauti mitandaoni, huku baadhi wakimpongeza kwa msimamo wake wa kuhimiza mshikamano wa Afrika Mashariki, na wengine wakitaka uchunguzi huru kuhusu hali ya wanaharakati waliokamatwa.

Read More
Diamond Aonyesha Heshima kwa Jose Chameleone, Ataka Ushirikiano wa Mwaka
Robert Elim May 26, 2025
Comments (0)

Diamond Aonyesha Heshima kwa Jose Chameleone, Ataka Ushirikiano wa Mwaka

Mwanamuziki nguli kutoka Tanzania, Diamond Platnumz, ametangaza nia yake ya dhati ya kushirikiana na msanii mkongwe wa Uganda, Jose Chameleone, katika wimbo mpya unaotarajiwa kutoka mwaka huu. Akiwa jukwaani katika tamasha la Coffee Marathon huko Ntungamo, Uganda, Diamond aliwajulisha mashabiki kuwa kolabo hiyo ni ndoto aliyokuwa nayo kwa muda mrefu, na sasa anafanya kila juhudi kuhakikisha inatimia. Diamond alisema kuwa licha ya mafanikio yake makubwa katika bara la Afrika, hajawahi kusahau mchango wa Jose Chameleone katika muziki wa Afrika Mashariki. Alimuelezea kama msanii aliyeathiri kizazi kizima na kumvutia hata yeye kuingia kwenye tasnia ya muziki. “Mwaka huu nataka kuhakikisha ninafanya wimbo na Jose Chameleone. Tunamshukuru Mungu kuwa anaendelea vizuri kiafya na tunamshukuru kwa mchango wake mkubwa kwenye muziki,” alisema Diamond mbele ya mashabiki. Kwa upande wake, Jose Chameleone, ambaye ametamba kwa zaidi ya miaka 20 na kubaki kuwa moja ya nguzo za muziki wa Afrika Mashariki, bado anaheshimika kwa nyimbo zake zenye ujumbe mzito na sauti ya kipekee. Kolabo kati ya Chameleone na Diamond inatarajiwa kuwa ya kihistoria, na tayari mashabiki kote kanda ya Afrika Mashariki wanasubiri kwa hamu kusikia kazi yao ya pamoja.

Read More