Tag: TEMS

Mwanamuziki nyota kutoka Nigeria, Tems, ameandika historia mpya usiku wa kuamkia leo kwa kuwa msanii wa kwanza wa Kiafrika kutumbuiza kwenye fainali ya Kombe la Dunia la Vilabu (FIFA Club World Cup), hatua inayotajwa kuonyesha wazi ukubwa wa kipaji chake na kuendeleza hadhi ya muziki wa Afrika kwenye jukwaa la kimataifa. Tems alitumbuiza katika burudani ya mapumziko (Halftime Show) sambamba na mastaa wa kimataifa, Doja Cat kutoka Marekani na J Balvin wa Colombia katika tukio lililofanyika kwenye Uwanja wa MetLife, New Jersey, Marekani. Hii ni mara ya kwanza kabisa kwa michuano hiyo ya Club World Cup kuandaa onyesho la burudani katikati ya mchezo (halftime show), hivyo kufanya tukio hilo kuwa la kihistoria katika dunia ya soka na burudani. Burudani hiyo ya kuvutia ilifanyika wakati wa fainali ya michuano hiyo, ambapo klabu ya Chelsea FC kutoka England iliibuka mshindi dhidi ya mabingwa wa Ufaransa, Paris Saint-Germain (PSG), na kutwaa taji la Kombe la Dunia kwa ngazi ya vilabu. Uwepo wa Tems katika jukwaa hilo umepongezwa na mashabiki na wadau wa sanaa kama hatua kubwa kwa wasanii wa Afrika, huku wengi wakisema kwamba anazidi kuvunja mipaka na kupeperusha bendera ya bara la Afrika kwa mafanikio makubwa. Tems, anayefahamika kwa sauti yake ya kipekee na uandishi wa nyimbo wa hali ya juu, amekuwa akivuma kimataifa kwa miaka ya hivi karibuni, na sasa amejiweka kwenye ramani ya wasanii wa dunia wanaotumbuiza kwenye matukio makubwa ya kihistoria.

Mwanamuziki nyota kutoka Nigeria, Tems, amezindua rasmi programu mpya ya kuwawezesha wanawake vijana kwenye tasnia ya muziki, iitwayo The Leading Vibe Initiative. Programu hiyo inalenga kuwapatia wanawake mafunzo na nyenzo muhimu za kufanikisha kazi zao katika sekta ya muziki. Warsha ya kwanza chini ya mpango huu imepangwa kufanyika kwa siku mbili, kuanzia Agosti 8 hadi 9 jijini Lagos, Nigeria, ambapo washiriki watajifunza kuhusu uandishi wa nyimbo, uzalishaji wa muziki, pamoja na kushiriki midahalo na wataalam wa muziki. Pia kutakuwa na vikao vya studio kwa ajili ya kukuza ubunifu wa washiriki. Mpango huu unawalenga wanawake 15 hadi 20 wenye nia na vipaji katika muziki, huku tarehe ya mwisho ya kutuma maombi ikiwa Julai 13. Washiriki watapewa vifaa vya kisasa vya uzalishaji na rasilimali nyingine muhimu zitakazowawezesha kuendeleza kazi zao kwa ufanisi. Tems amesema kuwa kupitia The Leading Vibe Initiative, anataka kuhakikisha kuwa wanawake barani Afrika wanapata nafasi ya kujiamini, kupata maarifa sahihi, na kuchangia katika maendeleo ya muziki ndani na nje ya bara. “Ni wakati wa wanawake kuwa sauti kubwa katika muziki wa Afrika. Ninaamini wakipewa nafasi na zana sahihi, wanaweza kuvuka mipaka,” alisema Tems. Tems, ambaye tayari ameweka historia kwa kushinda tuzo mbili za Grammy na kushika nafasi za juu kwenye chati za Billboard, anatarajia kupanua programu hii hadi miji mingine barani Afrika katika siku za uso