Tag: TREY SONGZ

Msanii wa R&B kutoka Marekani, Trey Songz, ameripotiwa kukamatwa na maafisa wa usalama kufuatia tukio la vurugu lililotokea katika klabu moja ya usiku jijini New York City. Kwa mujibu wa taarifa zilizowasilishwa katika mahakama ya jinai ya Manhattan, tukio hilo lilitokea Desemba 4 katika Dramma Night Club, eneo la Times Square. Trey Songz na kundi lake walikuwa wakifurahia burudani hadi pale mfanyakazi wa klabu alipowaarifu kuwa klabu ilikuwa ikifungwa majira ya saa kumi alfajiri. Waendesha mashtaka wanadai kuwa msanii huyo mwenye umri wa miaka 41 na watu wake walionekana kukerwa kupita kiasi bila sababu ya msingi, hali iliyosababisha mvutano. Inadaiwa kuwa Trey Songz alimpiga mfanyakazi huyo ngumi za usoni, tukio lililomsababisha kuvimba na kupata maumivu makali mwilini. Baada ya tukio hilo, Trey Songz alifikishwa mahakamani Jumapili, akikabiliwa na kesi ya shambulio kuhusiana na tukio la klabu hiyo ambapo kesi yake itatajwa tena mwezi Februari 2026. Ikumbukwe, Trey Songz anakabiliwa pia na kosa la uharibifu wa mali (second-degree mischief) linalohusishwa na tukio jingine ambalo maelezo yake bado hayajawekwa wazi.

Msanii maarufu wa R&B, Trey Songz, anachunguzwa na polisi kwa madai ya kumshambulia mpiga picha kwenye mgahawa wa The Ivy mjini New York, tukio lililotokea Jumapili asubuhi. Kwa mujibu wa ripoti ya TMZ, mpiga picha aitwaye Isaa Mansoor anadai kuwa alipewa kazi rasmi ya kurekodi matukio ya Trey Songz ikiwemo picha na video ndani ya mgahawa huo. Isaa anasema Trey alifahamu vyema kuwa kulikuwa na kamera mahali hapo, na kwamba kazi hiyo ilikuwa ya maandalizi. Hata hivyo, hali ilibadilika ghafla baada ya mashabiki kuanza kumuomba Trey kupiga nao picha. Inadaiwa kwamba msanii huyo alionekana kukerwa na hali hiyo. Baadaye, wakati mmiliki wa mgahawa alipomwomba apige picha ya mwisho mbele ya nembo ya mgahawa huo, ndipo ghasia zilipozuka. Isaa anadai kuwa Trey alimchapa ngumi kichwani bila tahadhari, akamsukuma ukutani na kuvunja kamera zake mbili za kazi. Tukio hilo limewasilishwa kwa polisi wa New York na uchunguzi rasmi unaendelea. Hadi sasa, Trey Songz bado hajatoa tamko lolote rasmi kuhusiana na madai haya.

Msanii maarufu wa muziki wa R&B kutoka Marekani, Trey Songz, ameibuka tena kwenye vichwa vya habari baada ya video kusambaa mitandaoni ikimuonesha akiwa katika hali ya hasira kali dhidi ya shabiki mmoja. Tukio hilo liliripotiwa kutokea usiku wa Jumanne, Juni 24, 2025, katika eneo lisilotajwa wazi. Katika video hiyo ambayo kwa sasa imeenea kwenye mitandao ya kijamii kama The Shade Room, HotNewHipHop, na The Jasmine Brand, Trey Songz anaonekana akikabiliwa na matusi na dharau kutoka kwa shabiki aliyekataa kumsalimia.  “I’ll beat the sh*t out of you right now!,” Trey, alisikika akisema kwa hasira. Kauli hiyo ilionekana kutolewa mara baada ya shabiki huyo kumwita jina la matusi, huku akimkataa kwa dharau mbele ya umati. Muda mfupi baadaye, walinzi wa msanii huyo waliingilia kati na kuzuia uwezekano wa mzozo mkubwa kutokea. Tukio hili limezua mjadala mkubwa mitandaoni. Mashabiki na watumiaji wa mitandao ya kijamii wametoa maoni tofauti; baadhi wakimtetea msanii huyo kwa kusema alichokifanya kilikuwa ni kutetea heshima yake, huku wengine wakimlaumu kwa kushindwa kujizuia na kuonyesha ukomavu wa hali ya juu kama mtu maarufu. Hii si mara ya kwanza kwa Trey Songz kujikuta kwenye hali ya utata. Mnamo mwaka 2016, msanii huyo alikamatwa kwa kushambulia afisa wa polisi wakati wa tamasha mjini Detroit. Mwaka 2021, alishtakiwa kwa madai ya unyanyasaji wa kingono – kesi ambayo baadaye ilitupiliwa mbali. Visa vya ukosefu wa nidhamu vimekuwa vikimfuata mara kwa mara, jambo ambalo linazua maswali kuhusu jinsi anavyokabiliana na umaarufu na changamoto za maisha ya hadharani. Mpaka kufikia sasa, Trey Songz hajatoa tamko lolote rasmi kuhusu tukio hilo. Pia, hakuna taarifa yoyote kutoka kwa polisi au vyombo vya sheria vinavyohusiana na tukio hilo. Wakala wake pia hajatoa maelezo yoyote. Tukio hili limezua hisia mseto kuhusu tabia ya wasanii mashuhuri wanapokabiliwa na kejeli au uchokozi kutoka kwa mashabiki. Trey Songz bado anasalia kuwa mmoja wa wasanii wenye ushawishi mkubwa katika muziki wa R&B, lakini matukio kama haya yanaweza kuathiri taswira yake hadharani ikiwa hayatadhibitiwa kwa hekima.

Staa wa muziki kutoka nchini Marekani Trey Songz anazidi kuandamwa na tuhuma za ubakaji pamoja na unyanyasaji wa kingono, mwanamke wa tatu amejitokeza na kudai fidia ya shilling billion 2.3 za Kenya  kwa madai ya kubakwa na kuingiliwa kinyume na maumbile. Kwa mujibu wa TMZ, shauri hilo lilifunguliwa Februari 15 mwaka huu ambapo mwanamke huyo alisema Trey Songz alimwalika kwenye party katika nyumba moja mjini Los Angeles, baadaye alimpeleka chumbani wakiwa na makubaliano ya kufanya mapenzi kawaida. Walipofika chumbani, Trey Songz alimsukuma chini na kuanza kumlazimisha kumuingilia kinyume na maumbile, baada ya kupambana kujioka kwenye mikono ya mkali huyo wa R&B, mwanamke huyo anasema alizidiwa nguvu na Trey songz na hivyo akamuingilia kinyume na maumbile kwa nguvu.