Tag: VICTORIA KIMANI

Mwanamuziki kutoka nchini Kenya, Victoria Kimani, amezua sintofahamu mtandaoni baada ya kutoa kauli inayotafsiriwa na wengi kama dharau dhidi ya lugha ya Kiswahili. Kupitia Instastory, msanii huyo amedai kuwa kutokujua Kiswahili kumemsaidia kulinda afya yake ya akili. Victoria Kimani, ambaye amekuwa akikosolewa kwa miaka mingi kwa kutumia lugha ya Kiingereza katika kazi zake, ameeleza kuwa kutokuimudu lugha ya Kiswahili ni baraka kutoka kwa Mungu. Kwa mujibu wa msanii huyo, hali hiyo imekuwa kinga tosha dhidi ya mashambulizi ya maneno na dhoruba za matusi ambazo mara nyingi huelekezwa kwa wasanii kupitia lugha hiyo. Kauli yake imekuja kama majibu ya shinikizo la muda mrefu kutoka kwa mashabiki wake, ambao wamekuwa wakimhimiza kuimba kwa Kiswahili ili kuimarisha utambulisho wake kama msanii wa Kiafrika. Mashabiki wengi wanahisi kuwa kutumia lugha ya kigeni pekee kunamfanya aonekane kama msanii wa Kimarekani zaidi kuliko Mkenya.

Mwanamuziki Victoria Kimani amefichua kuwa aliwahi kujaribu kuwa kwenye mahusiano na mwanaume aliye mdogo kwake kiumri, lakini uhusiano huo haukufanikiwa kutokana na tofauti za mitazamo na mienendo ya maisha. Akiwa kwenye mahojiano na mtangazaji Betty Kyallo, Victoria ameeleza kuwa uzoefu huo ulimsaidia kujitambua zaidi na kuelewa kile anachokipa kipaumbele kwenye uhusiano. Katika mazungumzo hayo, Betty Kyallo alimchangamsha kwa utani kwa kumwambia kwamba anaweza kumpa mwongozo wa jinsi ya kumudu mahusiano na mwanaume mdogo. Kauli hiyo ilisababisha kicheko studioni na kuibua mijadala mitandaoni, huku mashabiki wakisubiri kuona kama Victoria ataamua kujaribu tena bahati yake katika kudate kijana mdogo, safari hii akiwa na msaada kutoka kwa Betty ambaye yupo kwenye mahusiano ya kimapenzi na kijana wa Gen Z.

Mwanamuziki maarufu wa Kenya, Victoria Kimani, amezua gumzo mitandaoni baada ya kudai kuwa hajawahi kutongozwa kimapenzi na mwanaume yeyote wa Kenya. Katika mahojiano ya hivi karibuni, Kimani alisema kuwa licha ya kuwa mzaliwa na mzawa wa Kenya, wanaume kutoka taifa hilo hawajawahi kumwonyesha nia ya kimapenzi, na hata wanapojaribu, lugha yao ya ushawishi huwa haina mvuto. “Wanaume wa Kenya hawajawahi kunitongoza. Na ikitokea, lugha yao ya kimapenzi haivutii kabisa,” alisema Kimani. Ameongeza kuwa mara nyingi wanaume kutoka mataifa ya nje ndio humfuata kwa mapenzi, huku akieleza kuwa tofauti ya ujasiri na mbinu zao za ushawishi ni kubwa ikilinganishwa na Wakenya. Victoria, ambaye amewahi kufanya kazi na wanamuziki wa kimataifa na kuishi katika mataifa mbalimbali, alisisitiza kuwa hana kinyongo na wanaume wa nyumbani, lakini anatamani kuona mabadiliko katika jinsi wanavyoonyesha mapenzi yao. Kauli hiyo imeibua mjadala mkali mitandaoni, baadhi ya mashabiki wakimtetea huku wengine wakihisi kuwa anawadharau wanaume wa taifa lake. Wengine walihoji kuwa labda hofu ya umaarufu wake au hadhi yake ya juu ndiyo huwafanya wanaume wa Kenya kutojaribu kumtongoza. Victoria Kimani ameendelea kuwa mmoja wa wasanii wa kike wa Kenya wanaotambulika kimataifa kutokana na sauti yake ya kipekee, mitindo ya kisasa, na ujasiri wa kusema anachohisi bila woga.