Nyota wa muziki wa Bongo Fleva, Abdukiba, ameibuka na kukanusha vikali madai yanayosambaa mitandaoni kuwa alishindwa kulipa shilingi 8,000 za Kitanzania kwa muuza chips wa mtaani, tukio lililodaiwa kusababisha uharibifu wa gari lake.
Akizungumza na vyombo vya habari, Abdukiba amesema wazi kuwa madai hayo si ya kweli, akisisitiza kuwa hajawahi kukwepa kulipa huduma au bidhaa anazopata hasa kiasi kidogo kama hicho.
Msanii huyo ameongeza kuwa anawaheshimu wafanyabiashara wadogo na mchango wao katika jamii, na kuwataka mashabiki pamoja na umma kwa ujumla kuepuka kusambaza taarifa hizo za uongo.
Tukio hilo limezua mjadala mpana kwenye mitandao ya kijamii, baadhi ya mashabiki wakimtetea msanii huyo huku wengine wakitaka ukweli kamili wa sakata hilo.
