Kampuni maarufu ya magari ya kifahari, Bentley Motors, imezindua rasmi nembo mpya ya “Winged B”, ikiwa ni mara ya tano tu kubadilisha nembo hiyo katika historia yao ya zaidi ya miaka 100.
Nembo hiyo mpya, ambayo inaendelea kubeba alama ya mabawa (winged), imeboreshwa kwa muonekano wa kisasa huku ikidumisha urithi wa kifahari wa chapa hiyo. Mabadiliko hayo yanakuja wakati ambapo Bentley inaendeleza mpango wa kuingia kwenye zama za magari ya umeme, ikiashiria mwelekeo mpya wa kampuni kuelekea teknolojia ya kisasa na uendelevu wa mazingira.
Katika taarifa ya uzinduzi, Bentley ilieleza kuwa toleo hili jipya la nembo linawakilisha mchanganyiko wa urithi, ubunifu, na mustakabali wa chapa, huku likiashiria kasi, uhuru na ubora ambao wateja wa Bentley wameuzoea kwa zaidi ya karne moja.
Nembo mpya inatarajiwa kuonekana kwa mara ya kwanza kwenye baadhi ya miundo ya kisasa ya magari mapema mwaka huu, huku kampuni ikipanga kuiweka rasmi kwenye modeli zake zote mpya zinazokuja.
Bentley, iliyoanzishwa mwaka 1919, imeendelea kuwa nembo ya kifahari na mafanikio duniani, na hatua hii mpya inaweka msingi wa muelekeo wao wa kidijitali na kimazingira katika karne ya pili ya utendaji wao.
