Mchekeshaji maarufu na mjasiriamali wa burudani, DJ Shiti, ameibua hisia kubwa mitandaoni kwa kutoa wito wa kumsaidia Yesu wa Tongaren, mtu maarufu nchini Kenya ambaye ameijizolea umaarufu kutokana na imani yake ya kipekee ya kiroho. DJ Shiti anasisitiza kwamba kuna haja ya kubadilisha namna ambavyo Yesu wa Tongaren anavyotumika kwenye vyombo vya habari na jamii kwa jumla, ili kumsaidia kutumia umaarufu wake kwa manufaa ya kifedha na maendeleo endelevu.
Katika mahojiano ya hivi karibuni, DJ Shiti alisema: “I am willing kumshika mkono, content yake isiende tu ivo, imsaidie.”
Kauli hii inaonesha dhamira yake ya kusaidia Yesu wa Tongaren, ambaye ameonekana kwenye vipindi maarufu vya kimataifa, lakini bado ana changamoto ya kutumia umaarufu wake kwa njia inayoweza kumletea kipato cha kudumu.
DJ Shiti alielezea masikitiko yake kuhusu namna ambavyo waandishi wa habari na wanaotengeneza maudhui mtandaoni wanavyomshirikisha Yesu wa Tongaren katika makala maalum na vipindi vya runinga, kisha kumuacha bila msaada wowote.
“Ni vibaya sana watu wanamhoji na hawamuachii hata ka kitu… ameonekana kwa documentaries kubwa kubwa, and that shows hii kitu gava inafaa ku-consider kama tourist attraction – having Jesus in Kenya,” alisema DJ Shiti kwa msisitizo.
Kauli hii inaonyesha kwamba, licha ya umaarufu wa Yesu wa Tongaren, bado serikali na wadau wengine wa sekta ya utalii wamepuuza uwezekano wa kutumia umaarufu wake kama kivutio cha utalii.
DJ Shiti aliongeza kwamba ni muhimu kwa jamii ya waandishi wa habari, wasanii, na serikali kuzingatia uwepo wa fursa ya kumsaidia Yesu wa Tongaren kwa njia ya maendeleo endelevu. Alipendekeza kuwa serikali inapaswa kufanya kazi na wadau wa sekta ya utalii na burudani ili kumshirikisha Yesu wa Tongaren kwenye majukwaa rasmi ya utalii, badala ya kumtumia kama kipengele cha vichekesho.
Kauli yake imewavutia wengi, huku baadhi ya wafuasi wake wakitaka kuona hatua halisi zikichukuliwa kama vile kumpatia ushauri wa kitaalamu kuhusu maudhui, kuunda jukwaa lake la kidijitali, au hata kutengeneza filamu au vipindi vya runinga vinavyomshirikisha.
