Mchekeshaji maarufu nchini Kenya, Flaqo Raz, ameibua mjadala mitandaoni baada ya kutoa ujumbe mzito kwa mashabiki na hasa vijana kuhusu mapenzi yanayoonyeshwa mitandaoni. Kupitia ukurasa wake wa Instagram, Flaqo alitoa tahadhari dhidi ya kupumbazwa na picha na video za wapenzi maarufu ambazo zinaonekana kuwa za kufurahisha na za kuvutia.
Katika ujumbe wake, Flaqo alisema wazi kwamba watu wanapaswa kutambua kuwa maisha ya mapenzi yanayoonekana mitandaoni si halisi kama wengi wanavyodhani.
“Stop admiring love/couples you see online. It’s a lie. Everything you see online is rehearsed,” aliandika Flaqo.
Mchekeshaji huyo ambaye anafahamika kwa ubunifu wa kuigiza wahusika wengi katika video zake, alisisitiza kwamba sehemu kubwa ya maisha yanayoonyeshwa mtandaoni yamepangwa kwa ajili ya kuwavutia watu na si lazima yawe ya kweli. Alisema kuwa wengi huishia kujihisi duni au kutokuwa na thamani kwa sababu wanalinganisha maisha yao na taswira zisizo halisi.
“Mitandaoni ni kama jukwaa la maigizo. Wengi hupost wanachotaka watu waone, siyo hali halisi. Mapenzi ya kweli hayana haja ya kamera,” aliongeza katika mahojiano ya awali.
Flaqo anatoa wito wa kujenga maisha halisi yenye msingi wa mawasiliano, uaminifu na heshima badala ya kufuata tu kile kinachovuma mtandaoni. Katika dunia ya “likes” na “follows”, anawakumbusha mashabiki kwamba furaha ya kweli haipo kwenye kamera, bali kwenye maisha halisi yanayojengwa kwa bidii na kuelewana.
“Mpende mtu kwa sababu ya uhalisia wake, si kwa sababu ya jinsi wanavyoonekana mtandaoni,” anasema Flaqo ujumbe ambao wengi wanaona kuwa ni muhimu zaidi sasa kuliko wakati wowote ule.
Ujumbe huu umepokelewa kwa hisia tofauti na mashabiki. Wengi walimuunga mkono, wakisema kwamba vijana wengi wanateseka kisaikolojia kwa sababu ya matarajio ya mapenzi yaliyojengwa kutokana na kile wanachokiona kwenye Instagram, TikTok na YouTube.
