Mtayarishaji maarufu wa muziki nchini Kenya, Magix Enga, amefunguka na kuomba msaada wa kifedha kutoka kwa mashabiki wake na wadau wa muziki ili kuweza kujenga studio ya muziki yenye vifaa vya kisasa, itakayosaidia kukuza vipaji na kuboresha ubora wa muziki nchini.
Magix Enga alisema kuwa ndoto yake ni kuwa na studio ya hali ya juu itakayotoa huduma za kisasa kwa wasanii wote, kutoka vipaji vipya hadi wasanii walioko kwenye viwango vya kimataifa, na hivyo kuchangia zaidi katika maendeleo ya tasnia ya muziki nchini.
“Najivunia kazi yangu na wasanii wote niliowahi kushirikiana nao. Hata hivyo, ili kuendeleza muziki wa ubora wa kimataifa hapa Kenya, studio yenye vifaa bora ni lazima. Hali ya kifedha ni changamoto, hivyo naomba msaada wako ili tuweze kufanikisha hili,” alisema Magix Enga.
Studio hiyo mpya itakuwa na vifaa vya kisasa vya kurekodi, kuchanganya na kusindika sauti, na itakuwa kitovu cha kuelimisha na kuendeleza vipaji vipya katika muziki.
Mashabiki na wadau wa muziki wametakiwa kuungana na Magix Enga katika kampeni hii ya kufanikisha kuanzishwa kwa studio hiyo, huku baadhi yao tayari wakitoa michango kupitia majukwaa mbalimbali ya mtandaoni.
Magix Enga ni mmoja wa watayarishaji wenye ushawishi mkubwa katika muziki wa Kenya, na studio hii itakuwa nyongeza kubwa katika kuboresha mazingira ya utayarishaji wa muziki nchini, na kusaidia wasanii wengi kufikia malengo yao.
