Golikipa mkongwe wa Kimataifa, Pepe Reina, ametangaza rasmi kustaafu kucheza soka la kulipwa hii leo, akihitimisha safari ya kipekee ya miaka 26 langoni. Reina, ambaye aliwahi kuichezea vilabu vikubwa barani Ulaya ikiwemo Liverpool, Bayern Munich na AC Milan, ameachana rasmi na soka akiwa na umri wa miaka 41.
Reina alianza kung’ara akiwa na klabu ya Barcelona kabla ya kutamba zaidi alipokuwa Liverpool kati ya mwaka 2005 hadi 2013, ambako alijizolea sifa kama mmoja wa magolikipa bora kwenye Ligi Kuu ya England. Baadaye alihudumu pia katika vilabu vya Napoli, Bayern Munich, AC Milan, Aston Villa na Villareal, akionesha kiwango cha juu na uongozi ndani na nje ya uwanja.
Mbali na mafanikio ya klabuni, Reina aliwahi kuwa sehemu ya kikosi cha timu ya taifa ya Uhispania kilichotwaa Kombe la Dunia mwaka 2010 pamoja na mataji mawili ya Euro mwaka 2008 na 2012, ingawa mara nyingi alikuwa chaguo la pili nyuma ya Iker Casillas.
Kwa ujumla, kustaafu kwa Pepe Reina ni mwisho wa enzi ya kipa aliyekuwa mfano wa uaminifu, uzoefu na uongozi, na anabaki kuwa mmoja wa magolikipa walioweka alama ya kudumu katika historia ya soka la kisasa.
