Tag: dyana cods

Msanii wa muziki kutoka Kenya, Dyana Cods, amezua taharuki kwenye tasnia ya burudani baada ya kujitangaza hadharani kuwa yeye ndiye mwanamke pekee mwenye uwezo mkubwa zaidi wa uandishi nyimbo nchini humo. Kupitia ukurasa wake wa mitandao ya kijamii, msanii huyo amejipa taji la “Best Female Lyricist in Kenya” huku akiwapa changamoto wasanii wenzake wa kike kwa kuwataka mashabiki kuwataja au ‘kuwatag’ rappers au waimbaji ambao wanafikiri wanaweza kumshinda kwa ufundi wa kupanga maneno. Kauli hiyo imetafsiriwa na wengi kama dharau kwa wakali wengine wa kike kwenye muziki huku kukiwa na msisimko wa kutaka kuona kama kuna msanii yeyote atakayejitokeza kupokea changamoto hiyo na kuchuana naye kwenye ulingo wa uandishi wa mashairi.

Msanii wa muziki kutoka Kenya, Dyana Cods, amedokeza mpango wa kuja na bidhaa maalum (merchandise) kama njia ya kuitangaza albamu yake mpya ya Ghetto Girl, iliyoachiwa rasmi mapema mwezi huu wa Desemba. Kupitia mitandao ya kijamii, Dyana Cods amewapa ishara mashabiki wake kuwa yuko mbioni kuzindua bidhaa zenye nembo ya Ghetto Girl, hatua inayolenga kuongeza hamasa na kuendeleza ujumbe wa albamu hiyo. Ingawa T-shirt zinatajwa kuwa miongoni mwa bidhaa zitakazokuwepo, msanii huyo ameacha nafasi kwa mashabiki kupendekeza bidhaa nyingine wanazotamani ziongezwe. Mpango huo umeonekana kama mkakati wa masoko unaolenga kuimarisha brand ya Ghetto Girl na kuifanya albamu hiyo izidi kuwafikia mashabiki wengi zaidi, huku pia ukitengeneza muunganiko wa karibu kati ya msanii na wafuasi wake.

Msanii kutoka nchini Kenya, Dyana Cods, ameweka wazi idadi ya nyimbo zitakazopatikana kwenye albamu yake mpya inayotarajiwa kuingia sokoni hivi karibuni. Kupitia ukurasa wake wa Instagram, Dyana amewajulisha mashabiki wake kuhusu ujio wa albamu hiyo, akisema kuwa itakuwa na ngoma 16 za moto, huku akimalizia chapisho lake kwa hashtag #GhettoGirl, ikionekana kuwa huenda ndilo jina la albamu hiyo. Ingawa hajafichua majina ya nyimbo hizo wala wasanii aliowashirikisha, Dyana amewataka mashabiki wake kukaa mkao wa kula kuipokea rasmi albamu hiyo ambayo inaashiria hatua mpya katika safari yake ya muziki. Kwa mujibu wa rekodi zilizopo, Dyana Cods tayari ana albamu kadhaa zilizotolewa miaka ya nyuma zikiwemo Late Night Kneeler (2019), Thank Me Later (2022), River Lake Nilote (2023), na Rong Manners (2024). Albamu yake mpya itakuwa ya tano katika msururu wa kazi zake, ikionyesha mwendelezo wa ubunifu na ukuaji wake katika tasnia ya muziki nchini Kenya.

Mwanamuziki wa Kenya, Dyana Cods, amejibu lawama zinazowakumba wasanii wanaofanya maonyesho kwenye hafla za serikali na kulipwa kwa kazi zao. Kundi la wakosoaji limekuwa likidai kwamba hatua ya wasanii kushiriki katika hafla hizo ni sawa na kuunga mkono serikali ya Rais William Ruto, hali ambayo imewafanya baadhi ya wananchi kuwataka wasanii wasipokee malipo hayo. Kwa mujibu wa Dyana Cods, mtazamo huo ni wa kupotosha kwani sanaa ni taaluma kama nyingine, na msanii anayelipwa na serikali hastahili kuhusishwa moja kwa moja na masuala ya kisiasa. Hitmaker huyo wa Set It, amesisitiza kuwa walimu, madaktari na kazi nyingine pia hulipwa na serikali bila kulaumiwa, hivyo ni upotoshaji kuona malipo ya wasanii yakigeuzwa kuwa ajenda ya kisiasa. Aidha, amesema wasanii wanachangia pakubwa katika burudani, kukuza utamaduni na kuimarisha taswira ya taifa, hivyo hawapaswi kubezwa wala kuhusishwa moja kwa moja na siasa kwa sababu ya kazi yao. Kauli yake imekuja wakati ambapo kumekuwa na maoni tofauti kuhusu nafasi ya wasanii kwenye hafla za kitaifa. Wapo wanaoamini kuwa fedha za umma zinapaswa kuelekezwa zaidi kwenye sekta za kijamii, huku wengine wakisisitiza kuwa wasanii pia ni wataalamu wanaostahili kulipwa kwa kazi zao kama walivyo wataalamu wengine.

Msanii wa muziki wa rap nchini Kenya, Dyana Cods, ameomba msamaha hadharani kwa mashabiki wake kufuatia kauli zake za awali ambapo alionekana kuunga mkono Rais William Ruto. Taarifa hiyo ya msamaha iliitoa jukwaani kupitia video inayosambaa kwa kasi mitandaoni, ambapo Dyana alionekana akipiga magoti kwa hisia kubwa baada ya kumaliza kutumbuiza. Katika tukio hilo lililogusa hisia za wengi, Dyana alionesha majuto usoni mwake huku akiwatupia mashabiki wake maneno ya upendo na shukrani kwa kuwa upande wake licha ya makosa aliyoyafanya. Alisisitiza kuwa anawaweka mashabiki wake mbele kuliko kiongozi yeyote wa kisiasa, na kwamba anajali sana hisia zao. Msamaha huu unajiri baada ya hitmaker huyo wa ngoma ya “Set It” kushutumiwa mitandaoni kwa kauli zake za awali alizotoa akiwakosoa Wakenya kwa kumkosoa Rais Ruto kwa kushindwa kutekeleza ahadi aliyoitoa kwa wananchi. Kauli hiyo ilizua hisia kali, huku wengi wakimtuhumu kwa kujaribu kuhalalisha hali ngumu ya maisha nchini. Baadaye, Dyana alijitetea akisema alikuwa anatania. Tukio hili limeibua maoni tofauti mitandaoni, huku mashabiki wengine wakimsifu kwa ujasiri wa kukiri makosa yake, huku wengine wakimtaka awe makini zaidi na kauli zake hasa zinapohusisha masuala ya kisiasa yanayogusa hisia za wananchi wengi.

Hitmaker wa ngoma ya “Set It”, Msanii Dyana Cods, ametangaza ujio wa albamu yake ya nne kwa jina Ghetto Story, hatua iliyowaacha mashabiki wake na hamu kubwa ya kusikia kazi hiyo mpya. Kupitia ukurasa wake rasmi wa Instagram, Dyana alipakia mfululizo wa picha za kisanii na kusindikiza kwa maneno mafupi yenye uzito yaliyosomeka “#GhettoStory 4th album coming soon.” Ingawa mrembo huyo hakuweka wazi tarehe rasmi ya kuachia albamu hiyo, ujumbe huo umeibua mjadala na matarajio makubwa kutoka kwa mashabiki na wadau wa muziki, wengi wakitarajia kazi iliyojaa maudhui ya maisha halisi na uhalisia wa mitaani kama jina la albamu linavyoashiria. Albamu hii inatarajiwa kuwa mwendelezo wa mafanikio ya Dyana Cods katika muziki wa Kenya, huku wengi wakisubiri kuona ushirikiano mpya, ujumbe mzito, na ladha mpya ya kipekee inayotambulika kwa mtindo wake. Ikumbukwe kwamba Dyana Cods tayari ameachia albamu tatu tangu aanze safari yake ya muziki, ambazo ni THANK ME LATER (2022), River Lake Nilote (2023), na Rong Manners (2024).

Mwanamuziki wa Kenya na mwimbaji wa wimbo maarufu “Set It”, Dyana Cods, ameomba msamaha kwa mashabiki wake kufuatia malalamiko yaliyotokana na kauli zake zilizotafsiriwa kuwa za kuiunga mkono serikali. Katika ujumbe alioutoa kupitia mitandao ya kijamii, Dyana alieleza kuwa kauli zake zilikuwa za kejeli (sarcastic) na hazikupaswa kuchukuliwa kwa uzito kama wengi walivyofanya. Alisema hakuwa na nia ya kuonyesha uungwaji mkono kwa hatua zozote za serikali zinazokera wananchi. “Ninaomba radhi kwa yeyote aliyekasirishwa na kile nilichosema. Hiyo haikuwa kauli ya kweli bali ni kejeli tu, watu hawakuelewa muktadha,” alisema Dyana katika taarifa yake. Kauli hiyo inakuja wakati ambapo wananchi wengi wamekuwa wakitoa hisia kali dhidi ya baadhi ya viongozi na sera za serikali, hasa kupitia mitandao ya kijamii. Kwa hivyo, mashabiki walichukulia kauli ya Dyana kwa uzito mkubwa, wakihisi ameipuuza hali halisi ya maisha yanayowakabili Wakenya. Baadhi ya mashabiki walimtaka afafanue msimamo wake, huku wengine wakimtaka kuwa makini na maudhui anayochapisha, hasa kwa kuwa ana ushawishi mkubwa kwa vijana. Hata hivyo, baada ya kutoa ufafanuzi huo, mashabiki wengine walionekana kumwelewa na kupongeza hatua yake ya kukiri na kujieleza kwa uwazi, wakisema kila mtu anaweza kueleweka vibaya mitandaoni. Dyana Cods, ambaye amepata umaarufu mkubwa kupitia vibao vyake vya Arbantone, amesisitiza kuwa anaelewa machungu ya wananchi na hana nia ya kudhihaki hali ya maisha au kuunga mkono dhuluma ya kisera.