Tag: MEGAN THEE STALLION

Mvutano kati ya Megan Thee Stallion na Tory Lanez unaendelea kuchukua sura mpya, huku wakili wa Megan akitoa tamko kali kupitia jarida la XXL baada ya timu ya mawakili wa Tory kuzindua tovuti mpya inayodai kuonyesha ushahidi wa kutetea  haki ya msanii huyo. Tovuti hiyo, iliyoanzishwa na timu ya Tory Lanez, inalenga kushawishi umma kuhusu kutokuwa na hatia kwake katika kesi ya kumpiga risasi Megan Thee Stallion, tukio ambalo lilitokea mwaka 2020 na kumweka Tory kwenye matatizo makubwa ya kisheria. Katika kujibu hatua hiyo, wakili wa Megan alikemea vikali juhudi za Tory Lanez kujaribu kuandika upya simulizi ya tukio la kumpiga risasi Megan mwaka 2020. Alisema kuwa tovuti hiyo ni jaribio la kuwapotosha mashabiki na kulifanya jambo hili kuwa la burudani badala ya kutafuta haki. Wakili huyo alisisitiza kuwa Tory tayari alikutwa na hatia kupitia mfumo wa sheria wa Marekani, na kwamba kuendelea kujaribu kujiosha kupitia mitandao na vyombo vya habari ni kudhalilisha wahanga wa ukatili na kuleta mkanganyiko kwa umma. “Ni aibu kuona mtu anayejaribu kugeuza maumivu ya mtu kuwa kampeni ya mtandaoni. Ukweli ulishasemwa mahakamani, na haki ilitendeka,” ilisomeka sehemu ya taarifa hiyo. Kwa upande wa Tory Lanez, timu yake ya mawakili imeendelea kushikilia kuwa msanii huyo hakutenda kosa lolote, na wanasema tovuti hiyo ni jukwaa la kutoa taarifa walizoita “uhalisia wa tukio.” Wakati huu, Tory Lanez bado anahudumu kifungo baada ya kupatikana na hatia katika kesi hiyo. Hata hivyo, juhudi za timu yake za kupigania hadhi yake mbele ya macho ya umma zinaendelea kushika kasi, huku wafuasi wa pande zote wakiendelea kupambana mitandaoni kwa maoni na mitazamo tofauti.

Rapa Tory Lanez, ambaye jina lake halisi ni Daystar Peterson, ameripotiwa kuhamishwa kutoka Gereza la California Correctional Institution lililopo Tehachapi, baada ya tukio la kushambuliwa na kuchomwa kisu mara 14. Kwa mujibu wa vyanzo vya karibu na tukio hilo, Lanez alivamiwa ndani ya gereza hilo na kushambuliwa katika tukio linalodaiwa kuhusiana na migogoro ya magenge ya uhalifu, hasa kundi la Bloods. Ingawa majeraha aliyoyapata hayakuwa ya kutishia maisha, shambulio hilo limezua hofu kubwa kuhusu usalama wake akiwa gerezani. Baada ya tukio hilo, rapa huyo alihamishiwa katika Gereza la North Kern State Prison, lililoko Delano, California, kwa lengo la kumlinda dhidi ya mashambulizi zaidi. Uhamisho huo unatajwa kufanyika haraka mara baada ya shambulio hilo. Tory Lanez anatumikia kifungo cha miaka 10 jela baada ya kupatikana na hatia ya kumpiga risasi msanii mwenzake Megan Thee Stallion mwaka 2020, tukio ambalo lilizua gumzo kubwa katika tasnia ya burudani ya Marekani. Hata hivyo, Idara ya Magereza na Marekebisho ya Tabia ya Jimbo la California haijatoa taarifa rasmi kuthibitisha tukio hilo au sababu za uhamisho, ikitaja sababu za faragha na usalama wa wafungwa. Mashabiki na wafuasi wa rapa huyo sasa wanasubiri taarifa rasmi kuhusu hali yake ya afya na hatima ya kesi au uchunguzi wowote unaoweza kufunguliwa kutokana na tukio hilo la kushangaza.

Wakili wa rapa maarufu Megan Thee Stallion wametoa taarifa rasmi wakikanusha madai ya kambi ya Tory Lanez kuwa kuna ushahidi mpya ambao unaweza kumuondolea hatia kwenye kesi ya kumpiga risasi Megan mwaka 2020. Katika ripoti yenye kurasa 31 iliyotolewa wiki hii, timu ya sheria ya Megan imeeleza kuwa madai hayo yanayosambazwa ni ya kupotosha na hayana msingi wowote wa kisheria. Wameyataja kama “hadithi za uongo” zinazoenezwa na kile walichokiita “watesi wajinga.” “Hakuna ushahidi mpya kutoka Ring camera kama inavyodaiwa, na shahidi anayetajwa hajawahi kuwa eneo la tukio, wala kutoa ushahidi wowote hadharani au mahakamani,” alisema wakili Alex Spiro. Megan Thee Stallion pia aliunga mkono msimamo huo mapema wiki hii, akitoa kauli zinazosisitiza kuwa juhudi za kudhoofisha ukweli ni sehemu ya mateso yanayoendelea dhidi yake kama mhanga wa tukio hilo. Kesi hiyo iliibua hisia kali za kijamii na mitandaoni, na licha ya hukumu ya mahakama, juhudi za upande wa Tory Lanez kutaka kesi ifunguliwe upya au hukumu ipunguzwe zimeendelea kuchochea mijadala. Hata hivyo, timu ya Megan inasisitiza kuwa hakuna msingi wa kisheria au ushahidi wowote mpya wa kuanzisha mwelekeo tofauti wa kisheria. Kwa sasa, Tory Lanez anatumikia kifungo gerezani kufuatia hukumu hiyo ya kumpiga risasi Megan, na kesi hiyo inaendelea kuibua mazungumzo kuhusu haki kwa waathirika wa vurugu za silaha, na pia athari za upotoshaji wa umma kwenye kesi nyeti.

Rapa maarufu kutoka Marekani, Megan Thee Stallion, ameamua kupambana hadharani na mashabiki wa Tory Lanez ambao bado wanakanusha ukweli kwamba mwanamuziki huyo alimpiga risasi licha ya uamuzi wa mahakama ya juri mjini Los Angeles kuthibitisha hilo. Kupitia ujumbe wake kwenye mitandao ya kijamii, Megan ameonesha kuchoshwa na mashambulizi ya mfululizo kutoka kwa baadhi ya watu wanaoendeleza kampeni ya kumdhalilisha, huku akimtaja Tory Lanez kama shetani anayeendelea kumletea mateso hata baada ya hukumu. “Muda umefika muache kunitesa. Mlikuwa na nafasi ya kusema mliyotaka mahakamani. Mnaendelea tu na uongo  ni kama mapepo,” Megan alisema kwa hasira. Megan ambaye anaendelea na kazi yake ya muziki, ameweka wazi kuwa bado anapitia changamoto za kiakili kutokana na matukio hayo, hasa kutokana na mashambulizi ya mfululizo kutoka kwa baadhi ya watu mitandaoni. Ameongeza kuwa bado anaumizwa na namna watu wanavyopuuza ukweli na kumshambulia yeye badala ya kumwajibisha Tory. “Mahakama ilizungumza. Ukweli ulidhihirika. Lakini bado naandamwa kana kwamba mimi ndiye mwenye makosa.” aliongeza. Kauli hiyo imeibua mjadala mkali mtandaoni huku mashabiki wake wakimtetea vikali na kuitaka jamii kumheshimu kama manusura wa tukio la vurugu. Wengine, hususan wafuasi wa Tory, bado wanaonekana kushikilia imani tofauti, jambo linalozua sintofahamu kubwa. Tory Lanez tayari anatumikia kifungo gerezani baada ya kupatikana na hatia ya kumpiga Megan risasi mwaka 2020, tukio lililotokea baada ya sherehe usiku. Huu ni mwendelezo wa mvutano kati ya Megan na Tory ambao umegusa si tu mashabiki wao, bali pia wasanii na wanaharakati wa haki za wanawake kwenye tasnia ya muziki duniani.

Familia ya rapa Tory Lanez imeweka wazi kumsamehe rapa Megan Thee Stallion. Baba mzazi wa rapa Tory Lanez, Sostar Peterson amethibitisha hilo kufuatia sakata la mwanae kukutwa na hatia ya makosa ya kumpiga risasi ya mguu rapa huyo Julai, mwaka 2020.. Kauli ya mzee huyo imekuja wiki chache baada ya kutoridhishwa na uamuzi wa Mahakama juu ya mwanae ambapo aliishtumu label ya Roc Nation ya Jay Z kuhusika katika uamuzi huo wa Mahakama. Ikumbukwe, Tory Lanez alikutwa na hatia ya makosa yote matatu na kwa sasa yupo rumande akisubiri hukumu yake kusomwa Februari 28, mwaka 2023 akitazamia kifungo cha miaka 22 jela.

Rapa Tory Lanez, amefunguka kwa mara ya kwanza baada ya mahakama kumpata na hatia kwenye shtaka la kumpiga risasi Megan Thee Stallion, Julai mwaka 2020. Kwa mujibu wa L.A Times, rapa huyo amekaririwa akisema kuwa amesikitishwa na uamuzi wa mahakama lakini anaamini kila jambo katika maisha lina sababu zake. Tory Lanez atabaki rumande akingoja hukumu yake kusomwa Januari 27, mwaka 2023 baada ya kukutwa na hatia kwenye mashtaka matatu ikiwemo kumshambulia Megan kwa kutumia silaha lakini pia kubeba silaha iliyopakiwa risasi na ambayo pia haijasajiliwa. Hata hivyo timu ya Tory Lanez imeonekana kutoridhishwa na maamuzi ya mahakama, hivyo wakili wake George Mgdesyan anapanga kukata rufaa dhidi ya hukumu hiyo kwani hakuna ushahidi uliojitosheleza.

Mahakama ya jiji la Los Angeles imemkuta na hatia rapa Tory Lanez kwa makosa matatu ikiwemo la kumshambulia na kumjeruhi kwa risasi aliekuwa mpenzi wake mwanamuziki Megan Thee Stallion. Tukio hilo lilitokea baada ya mabishano yaliyosababishwa na utani ambapo inadaiwa Tory Lanez alikasirika na kufyatua risasi zilizomjeruhi miguuni Megan Thee Stallion. Mara baada ya maamuzi ya mahakama Lanez aliondoka mahamani hapo chini ya ulinzi mkali kuelekea gereza la Los Angeles kusubiri kuanza kutumikia adhabu yake. Tory Lanez ambaye jina lake ni Daystar Peterson anaweza kuhukumiwa kifungo cha mpaka miaka 22 jela katika hukumu inayotarajiwa kusomwa Januari 25.