Tag: NANDY

Wasanii wa Bongo Fleva, Nandy na Billnass,wamevalishana pete kwa mara nyingine tena baada ya pete yao ya kwanza kuripotiwa kupotea. Nandy amethibitishwa tukio hilo kupitia Instastory yake, ambapo ameshiriki video ikionyesha wakitoka kanisani ambako walienda mahsusi kwa ajili ya kufanyiwa ibada maalum na kupata baraka kutoka kwa mchungaji Katika video hiyo, wanandoa hao wanaonekana wakiwa na furaha huku mashabiki wengi wakisifu uamuzi wao na kuona kama ishara ya uthabiti wa uhusiano wao. Kupotea kwa pete ya awali kulikuwa kumeibua maswali miongoni mwa mashabiki, lakini hatua yao ya kuvalishana pete upya imeweka wazi kwamba wanadumisha safari yao ya kimapenzi kwa msimamo na upendo.

Msanii nyota wa Bongo Fleva, Nandy, amefunguka sababu kuu ya kutumia teknolojia ya Artificial Intelligence (AI) katika utayarishaji wa video ya wimbo wake uitwao Sweety aliomshirikisha Jux, akisema hatua hiyo ilikuwa ya kulinda ndoa na heshima za kifamilia. Kwenye mahojiano hivi karibuni, Nandy amesema wazo la kutumia AI lilitokana na tahadhari baada ya kutambua kuwa baadhi ya mashabiki wanaweza kutafsiri vibaya maudhui ya video hiyo endapo wangeonekana pamoja katika baadhi ya sehemu zenye hisia za kimahaba. Amesema kama msanii aliyeolewa, anapaswa kuwa makini na aina ya kazi anazofanya ili kuepuka kuzua tafsiri zisizofaa kwa mume wake na mashabiki wake. Aidha, Nandy ameeleza kuwa teknolojia ya AI imesaidia kufanikisha video yenye ubora wa kimataifa bila wao kuhitaji kuigiza kwa pamoja. Hatua hiyo pia imeonyesha namna muziki wa Afrika Mashariki unavyoweza kutumia ubunifu wa kisasa kutatua changamoto za kijamii bila kuathiri ubora wa kazi za sanaa.

Mwanamuziki kutoka Tanzania, Nandy, amejivunia safari yake ya takribani miaka 10 katika tasnia ya muziki wa Bongofleva, akisema kuwa kila wimbo anaouachia unakuwa hit na kupokelewa kwa kishindo na mashabiki. Kupitia Instastory, Hit maker huyo wa “Sweety” amewashukuru mashabiki wake kwa kumuunga mkono tangu alipoanza rasmi safari yake ya muziki, akisisitiza kuwa bila wao asingefika alipo leo. Nandy amesema kuwa anahisi ana nyota ya ajabu kwenye muziki, kwani kila mara anapotoa kazi mpya haipiti muda mrefu kabla haijatawala chati na kufurahiwa na mashabiki ndani na nje ya Tanzania. Ameongeza kuwa safari yake haijakuwa rahisi, lakini kujituma, nidhamu na baraka za Mungu zimemsaidia kudumu kwa muda mrefu huku akiendelea kushikilia nafasi yake kama mmoja wa wasanii wakike wenye ushawishi mkubwa kwenye Bongo Fleva.

Staa wa muziki wa Bongo Fleva, Nandy, ameonyesha kuchukizwa na hatua ya msanii chipukizi anayefahamika kama Bride Vuitton, ambaye amewasilisha maombi YouTube kutaka wimbo wake mpya “Sweety” aliomshirikisha Jux kushushwa kwa madai ya hakimiliki {copyright} Kupitia ukurasa wake wa Instagram, Nandy ameeleza kuwa kufika hatua aliyo nayo sasa kumemgharimu jitihada na uwekezaji mkubwa, jambo ambalo anaona halithaminiwi na kitendo cha Bride Vuitton. Amesema kuwa msanii huyo mchanga ameona sakata hilo kama fursa ya kujitengenezea umaarufu, lakini hajafikiria hasara kubwa ambayo hatua hiyo inaweza kusababisha kwa kazi yake mpya. Nandy ameongeza kuwa Bride Vuitton angetafuta njia nyingine za kujiweka kwenye tasnia bila kuhusisha kazi ya wasanii wenzake. Kwa mujibu wake, kitendo cha kutaka kushusha video ya “Sweety” siyo tu kumrudisha nyuma bali pia kinahatarisha ndoto na uwekezaji wake mzima. Hata hivyo, licha ya kukasirishwa na kitendo hicho, Nandy amewataka mashabiki wake pia kumpa sapoti Bride Vuitton kwa kusikiliza wimbo wake “Joro”, akisisitiza kuwa njia bora ya kupata nafasi katika muziki ni kupitia jitihada na uvumilivu, si kwa kuua ndoto za wengine.

Staa wa muziki kutoka Tanzania, Nandy, ametangaza rasmi kuwa hakutakuwa na video ya wimbo wake mpya alioufanya kwa ushirikiano na msanii Marioo, unaoitwa “Tonge Nyama.” Kupitia ukurasa wake wa Instagram, Nandy amefafanua kwamba mashabiki wengi wamekuwa wakimuuliza kuhusu video ya wimbo huo na nafasi ya Marioo katika promosheni yake. Amebainisha kuwa wimbo huo kwa sasa unakabiliwa na hitilafu za kisheria, jambo lililosababisha uamuzi wa kutokutengeneza video. Nandy pia ametoa shukrani kwa mashabiki waliouunga mkono wimbo huo kupitia changamoto mitandaoni, wanablogu, vyombo vya habari na vilabu vya usiku. Hitmaker huyo wa Sugar, amesisitiza kuwa licha ya changamoto hizo, mashabiki wanaweza kuendelea kufurahia “Tonge Nyama” kupitia majukwaa mengine ya kidijitali na kwenye vilabu. Msanii huyo amehitimisha waraka wake kwa kuwaahidi mashabiki wake miradi mipya, ikiwemo albamu mpya ambayo amesema ipo mbioni kuzinduliwa. Nandy, amejikuta kwenye mgogoro na kijana anayejiita Mr Tonge Nyama, ambaye amedai kuwa jina lake limetumika na Nandy bila ridhaa yake katika wimbo mpya wa msanii huyo. Mr Tonge Nyama anataka alipwe fidia ya Shilingi Milioni 200 za Kitanzania, akisema jina hilo limetumiwa kwa manufaa ya kibiashara.

Malkia wa muziki wa Bongo Fleva, Nandy,amefunguka kwa mashabiki wake kuhusu kusubiriwa kwa albamu yake mpya, akieleza kuwa itaachiwa rasmi mwezi Novemba mwaka huu. Kupitia ukurasa wake wa Instagram, mkali huyo wa ngoma ya “Sugar” aliwatuliza mashabiki waliokuwa wakihoji ni lini albamu hiyo itatoka, huku akifafanua kuwa kuchelewa huko kumesababishwa na sababu za msingi, ikiwa ni pamoja na kukamilisha kolabo zilizobaki na maandalizi ya mwisho ya albamu yenyewe. “Mashabiki zangu, comments zenu naziona kuhusu album. Niwaambie tu, album itatoka mwezi 11 kwa sababu za kimsingi kabisa. Tumalizie some colabo na maandalizi ya album yenyewe. Tungependa kutoa burudani kipindi tulivu na rahisi kwetu. Thank you, tuendelee ku-enjoy muziki mzuri,” aliandika Nandy. Ujumbe huo umeibua hisia mseto kutoka kwa mashabiki, baadhi wakionyesha hamu yao ya kusikia kazi mpya kutoka kwa msanii huyo ambaye kwa muda mrefu amekuwa mstari wa mbele katika kukuza muziki wa Tanzania kimataifa. Hadi sasa, Nandy hajataja jina rasmi la albamu hiyo, lakini vyanzo vya karibu vinaeleza kuwa itakuwa miongoni mwa kazi zake kubwa zaidi, ikiwahusisha wasanii wa ndani na wa kimataifa.