Tag: nyota ndogo

Msanii mkongwe wa muziki nchini Kenya, Nyota Ndogo ameonyesha wazi kukerwa na baadhi ya watu wanaoendelea kumkejeli mtandaoni kwa misingi ya ubaguzi wa rangi. Kupitia mitandao yake ya kijamii, amesema kuwa maoni hayo hayamvunji moyo bali yanadhihirisha kiwango cha ujinga na chuki mitandaoni. Nyota Ndogo amesisitiza kuwa rangi yake ya ngozi sio tatizo, bali ni kitu cha kipekee na cha kujivunia. Amesema kuwa rangi ya mtu haiuzwi dukani, na hivyo tofauti za asili hazipaswi kuwa chanzo cha kumdhalilisha yeyote. Msanii huyo, ambaye amekuwa kwenye muziki kwa miaka mingi, amesema ataendelea kupigania heshima na kukemea ubaguzi wa aina yoyote, huku akiwasihi wafuasi wake kujipenda na kukubali muonekano wao bila aibu. Hivi karibuni, msanii huyo alipokea maoni ya kumdhalilisha kutoka kwa mfuasi mmoja aliyedai kuwa shida yake ni kuwa mweusi sana. Kauli hiyo ilizua hisia kali na kuibua mjadala kuhusu ubaguzi wa rangi dhidi ya wasanii na watu mashuhuri mtandaoni.

Msanii mkongwe wa Pwani, Nyota Ndogo, ameshindwa kuficha furaha yake baada ya kutimia kwa ombi lake la muda mrefu kufuatia kuachiwa kwa remix mpya ya wimbo wa Pawa ambayo Mbosso amemshirikisha rapa Khaligraph Jones. Hii ni baada ya Mbosso kuzindua remix tatu tofauti za wimbo huo, akiwapa nafasi wasanii kutoka Tanzania, Rwanda na Kenya. Kupitia Instagram, Nyota Ndogo ameeleza kuwa amefurahishwa sana na namna Khaligraph alivyoibeba kazi hiyo, akisisitiza kuwa hakumuangusha na kwamba remix hiyo imefikia matarajio aliyokuwa nayo. Lakini pia ameonekana kupuuza ukosoaji unaoweza kujitokeza, akisema kuwa kazi hiyo inastahili heshima kubwa. Furaha yake imechochewa zaidi na ukweli kwamba miezi michache iliyopita aliwahi kutamka hadharani kuwa angependa kuona Mbosso akimshirikisha Papa Jones kwenye remix ya Pawa. Kauli hiyo ilimfanya Khaligraph kumtumia zawadi ya shilingi 100,000 za Kenya kama ishara ya kuthamini sapoti yake.

Mwanamuziki wa Pwani, Nyota Ndogo, amejipatia zawadi ya shilingi laki moja kutoka kwa rapa Khaligraph Jones, hatua inayohusishwa moja kwa moja na kampeni yake ya hivi karibuni ya kumtetea Papa Jones aingizwe kwenye remix ya wimbo “Pawa” wa Mbosso. Nyota Ndogo amefichua kupitia Instagram kuwa alishtuka alipokea ujumbe wa malipo (M-PESA) kutoka kwa Khaligraph, akieleza kuwa rapa huyo alimwambia zawadi hiyo ilikuwa ni ishara ya kumshukuru kwa kusimama upande wake kwenye mjadala wa remix hiyo. Wiki kadhaa zilizopita, Nyota Ndogo alitumia mitandao ya kijamii kushinikiza wasanii na mashabiki kuona umuhimu wa Khaligraph kushirikishwa katika remix ya Pawa. Alisisitiza kuwa iwapo rapa huyo angepewa nafasi, remix ya Mbosso ingezidi kupata nguvu na mvuto mkubwa katika soko la muziki wa Afrika Mashariki. Kitendo cha Khaligraph kimepongezwa na mashabiki mitandaoni, wengi wakikitafsiri kama heshima kubwa kwa msanii huyo wa Pwani na pia kuthibitisha jinsi rapa huyo anavyoweza kuthamini wale wanaomuunga mkono. Kwa sasa, bado haijathibitishwa rasmi iwapo Khaligraph atashirikishwa kwenye remix ya Mbosso, lakini tukio hili limezua mjadala mpana kuhusu ushirikiano wa wasanii wa Tanzania na Kenya, na jinsi sapoti ya wasanii wenzao inaweza kubadilisha mwelekeo wa muziki.

Mwanamuziki kutoka Kenya, Nyota Ndogo, ameonyesha masikitiko yake kufuatia kauli ya mrembo wa mtandaoni kwa jina la Lydia Wanjiru, aliyesema hadharani kuwa hataki kuolewa wala kuzaa, akidai ndoa ni mzigo na watoto ni kero maishani. Kupitia ujumbe alioweka kwenye ukurasa wake wa Instagram, Nyota Ndogo amesema kuwa kila mtu ana haki ya kuamua namna anavyotaka kuishi, lakini akaonya kuwa mitazamo ya aina hiyo inapochapishwa hadharani inaweza kuwa na athari kwa vijana na wafuasi wanaochukulia kauli hizo kama mwongozo wa maisha. Msanii huyo amesisitiza kuwa watoto ni baraka ya kipekee inayomletea mzazi furaha na msaada mkubwa maishani. Ameongeza kuwa mara nyingi watoto huwa nguzo muhimu hasa katika uzee, kipindi ambacho marafiki na watu wengine huanza kujitenga. Hata hivyo, Nyota Ndogo amemwonya Lydia kwamba anaweza kujutia uamuzi wake huo baada ya miaka mingi, akisisitiza kuwa jamii bado inathamini familia na nafasi ya mzazi ni ya kipekee isiyoweza kuchukuliwa na mtu mwingine. Kauli ya Nyota Ndogo imezua mjadala mitandaoni, huku baadhi ya wafuasi wakimtetea kwa kusimamia maadili ya kifamilia, ilhali wengine wakisisitiza kuwa uhuru wa mtu binafsi unapaswa kuheshimiwa.

Msanii Nyota Ndogo ametoa ujumbe mzito kwa wasichana wa Kiafrika wanaofanya kazi katika mataifa ya Kiarabu, akiwataka kuwa waangalifu na mahusiano ya mtandaoni. Kupitia Instgram yake, ameeleza kuwa mabinti wengi hujikuta wakitumika kihisia na kifedha na wanaume wasiowajali, huku wakiteseka kazini kwa masharti magumu. Nyota Ndogo amesema kuwa baadhi ya wanaume huwatumia wanawake walioko nje ya nchi kama chanzo cha fedha, wakiwadanganya kwa maneno matamu ya mapenzi. Amesema wapo wanaume wanaowalazimisha wanawake kuwatumia pesa za kodi, miradi au matumizi ya kila siku, huku wao wakifaidika kwa urahisi bila kuchangia chochote. Akiwa na uzoefu binafsi wa kufanya kazi ya ndani akiwa na umri wa miaka 17, Nyota amesema anafahamu vyema uchungu wa maisha ya ughaibuni. Alisisitiza kuwa wanawake wengi hujikuta wakibeba mzigo mara mbili kazi ngumu na mahusiano yenye mateso ya kihisia. Hitmaker huyo wa Watu na Viatu, ameonya kuwa tabia hii imewafanya baadhi ya wanaume kuwa wavivu wa maisha, kwa sababu wanategemea msaada kutoka kwa wanawake walioko nje. Alishauri mabinti wajifunze kujipenda na kutosema kila kitu mtandaoni, kwani baadhi ya watu hutumia taarifa hizo kuwadhulumu. Nyota Ndogo amemalizia kwa kuwaombea wasichana walioko ughaibuni, akisisitiza kuwa wanahitaji ulinzi wa Mungu dhidi ya udanganyifu wa mapenzi na hali ngumu za kazi. Kauli yake imeibua hisia mbalimbali mitandaoni, wengi wakikiri kuguswa na ujumbe huo wa uhalisia.