Tag: Pastor Kanyari

Mhubiri Victor Kanyari ameibua hisia nzito leo wakati wa ibada ya mazishi ya marehemu Betty Bayo, akitoa hotuba ya kuonyesha masikitiko yake pamoja na kumwomba msamaha kwa yaliyowahi kutokea kati yao wakati wa uhai wake. Kanyari ametumia muda huo muhimu kueleza kuwa drama na changamoto zilizozikumba maisha yao ya awali zilimfanya Betty kupitia wakati mgumu, jambo ambalo leo analiona kama doa ambalo halikupaswa kumwangukia. Amemtaja marehemu Betty kama mwanamke mchapakazi, mwenye moyo wa kusamehe, mama mwenye upendo na rafiki wa kweli ambaye aliwahi kuwa sehemu muhimu ya maisha yake. Katika hotuba yake, amesisitiza kwamba licha ya changamoto walizowahi kushuhudia kwa pamoja, Betty alibaki kuwa mtu wa amani, hekima na aliyejitolea kuwalea watoto na kuendeleza huduma yake ya muziki wa injili bila kuyumbishwa. Mazishi ya marehemu Betty Bayo yalifanyika leo katika eneo la Mugumo Estate, Kaunti ya Kiambu, ambako familia na marafiki wa karibu walimpumzisha kwenye nyumba yake ya milele baada ya kutoa heshima zao za mwisho.

Mchungaji maarufu wa Jijini Nairobi, Victor Kanyari, amezidi kugubikwa na majonzi kufuatia kifo cha aliyekuwa mke wake na mwanamuziki wa injili, Betty Bayo. Katika video zilizozagaa kwenye mitandao ya kijamii, Kanyari ameonekana akishindwa kujizuia kutokana na huzuni kubwa iliyompata baada ya kusikia taarifa za msiba huo huku wasanii na marafiki wa marehemu wakijumuika naye kumpa faraja.. Kupitia ukurasa wake wa Facebook, Kanyari ameeleza maumivu yake kwa maneno yaliyojaa huzuni, akisema kwamba kifo cha Betty kimemuacha na pengo kubwa lisilozibika. Amesema msanii huyo ambaye ni mama ya watoto wake atabaki daima kuwa sehemu ya familia yake licha ya changamoto walizowahi kupitia pamoja kipindi cha ndoa yao. Mchungaji huyo mwenye utata, ameongeza kuwa ataendelea kubeba kumbukumbu, upendo na roho ya marehemu moyoni mwake, akimtakia pumziko la amani. Kanyari na Betty Bayo walikuwa wametengana miaka michache iliyopita kutokana na tofauti za kifamilia, lakini waliendelea kuwa marafiki na wazazi wenza waliokuwa na ushirikiano mzuri katika malezi ya watoto wao. Licha ya Bayo kuolewa tena, wawili hao waliendelea kushirikiana kwa amani katika kuwalea watoto wao, akiwemo binti yao Sky, ambaye Kanyari alimrejelea katika ujumbe wake wa rambirambi.

Mchungaji mwenye utata Victor Kanyari amezua gumzo mtandaoni baada ya kutangaza kuwa waumini wa kanisa lake watalazimika kujisajili rasmi kwa ada ya KSh 300, ambayo italipwa kila mwezi ili kudumisha uanachama wao. Kulingana na tangazo hilo, waumini ambao hawatalipa ada hiyo hawatahesabiwa kama wanachama kamili wa kanisa, hali ambayo imezua hisia mseto kutoka kwa umma na wadau wa dini. Wapo wanaoona kuwa hatua hiyo ni aina ya biashara ya kiroho, huku wengine wakihalalisha kwa kusema ni njia ya kusaidia kugharamia huduma za kanisa. Hii si mara ya kwanza Kanyari kuzua utata. Mchungaji huyo amekuwa akihusishwa mara kwa mara na mbinu tata za uongozi wa kidini, ikiwemo madai ya kutumia miujiza bandia katika ibada zake za awali.