Tag: Toxic Lyrikali

Shabiki mdogo wa muziki ameibua mshangao na furaha mitandaoni baada ya kuonyesha kipaji chake cha kipekee kwa kuuchana wimbo maarufu wa rapa Toxic Lyrikali, Long Story, bila kukosea hata mstari. Clip ya video inayomuonyesha mtoto huyo ikisindikiza mashairi ya wimbo huo kwa ustadi mkubwa imeenea kwa kasi, jambo lililowagusa mashabiki wengi wa hip hop na kumfanya avune sifa tele. Mashabiki wengi wamepongeza hatua ya mtoto huyo, wakisema ni ishara ya namna muziki wa Toxic Lyrikali unavyowagusa hata vijana wadogo. Baadhi wamesema kitendo hicho kinadhihirisha jinsi muziki unaweza kuvuka vizuizi vya umri na kuwa chombo cha kuunganisha watu. Wimbo Long Story, uliotolewa miezi sita iliyopita, umeendelea kufanya vizuri kwenye majukwaa ya kidigitali ukiwa na zaidi ya watazamaji milioni moja kwenye YouTube. Toxic Lyrikali, ambaye amejizolea mashabiki kutokana na uandishi wake wa kina na uwasilishaji wa hisia halisi, amekuwa akitambulika kama mmoja wa wakali wa rapa wa kizazi kipya nchini Kenya.

Rapa mwenye utata, Toxic Lyrikali, amewajibu vikali wakosoaji wake mitandaoni wanaomuita msaliti, kufuatia hatua yake ya kumtawaza Rais William Ruto kuhudumu kwa muhula wa pili katika hafla iliyofanyika Ikulu ya Nairobi. Kupitia Instagram Live, msanii huyo amesisitiza kuwa hana muda wa kujibizana na wakosoaji, akieleza kuwa kwa sasa anataka kufurahia matunda ya kazi yake ya muziki.. Hitmaker huyo wa Backbencher, ameongeza kuwa hatatishwa na maneno ya kejeli dhidi yake, akieleza kuwa maisha ya tabu na raha yamekuwa sehemu ya safari yake ya muziki, hivyo hawezi kuyumbishwa na maneno ya wafuasi wake. Aidha, rapa huyo amewataka wakosoaji wake kuacha kufuatilia maisha yake binafsi na badala yake wazingatie shughuli zinazoweza kuwapatia riziki. Hata hivyo, msanii huyo kwa sasa anatuhumiwa na baadhi ya mashabiki kuwa na kiburi na pia kuwasaliti vijana, hasa kwa kuonyesha uhusiano wa karibu na serikali ya Rais Ruto, ambayo imekuwa ikikumbana na upinzani mkubwa hasa kutoka kwa vijana mitandaoni.