Tag: WHATSAPP

Kampuni ya Meta, inayomiliki jukwaa maarufu la mawasiliano la WhatsApp, imeanza kutekeleza kipengele kipya kinachoruhusu watumiaji ku-forward Status kwa marafiki au kwenye Status zao wenyewe. Hili ni moja ya maboresho makubwa katika eneo la Status, linalokusudia kuongeza mwingiliano na urahisi wa kushirikiana maudhui kati ya watumiaji. Kwa kutumia kipengele hiki, mtumiaji anaweza kuchagua Status ya mtu mwingine iwe ni picha, video au maandishi na kuishiriki (forward) moja kwa moja kwa mtu mwingine au kuipost kwenye Status yake binafsi. Hii ni hatua inayofanana na mtindo wa kushirikiana Stories kwenye majukwaa mengine kama Instagram na Facebook. Mbali na kuongeza urahisi wa kushirikisha maudhui, WhatsApp pia imetoa chaguo la faragha, ambapo watumiaji wanaweza kuchagua kama wanataka status zao ziweze kushirikiwa na wengine au la. Hii inawapa watumiaji udhibiti kamili wa maudhui yao na jinsi yanavyosambazwa. Kipengele hiki kimeanza kusambazwa kwa baadhi ya watumiaji kupitia masasisho ya hivi karibuni, na kinatarajiwa kupatikana kwa wote katika siku zijazo. Watumiaji wa Android na iOS wanashauriwa kuhakikisha wanatumia toleo la kisasa la WhatsApp ili kufurahia huduma hii mpya.

Kampuni ya WhatsApp imeanzisha majaribio ya kipengele kipya kinachoruhusu watumiaji kutuma picha zinazojongea, maarufu kama motion pictures au live photos. Hatua hii inalenga kuboresha mawasiliano kwa kuongeza uhalisia na hisia zaidi katika mazungumzo ya mtandaoni. Kulingana na ripoti kutoka vyanzo vya teknolojia, kipengele hiki kinajaribiwa kwa watumiaji wa toleo la beta la WhatsApp. Kinawawezesha watumiaji wa simu za iPhone kutuma picha za live photo moja kwa moja bila kubadilishwa kuwa picha tuli (still image). Kipengele hiki kitasaidia WhatsApp kushindana vyema na huduma nyingine kama iMessage ya Apple, ambayo tayari inaruhusu kutuma live photos, pamoja na Snapchat na Instagram ambazo zinatumia sana picha na video zenye mwendo. Ingawa bado haijafahamika rasmi lini kipengele hiki kitawekwa rasmi kwa watumiaji wote, inaonekana WhatsApp inaendelea kuwekeza katika kuboresha uzoefu wa mawasiliano kwa kutumia teknolojia za kisasa za kuona na kusikia. Watumiaji wengi wamepokea habari hii kwa shauku kubwa, wakitarajia kwamba kipengele hiki kitaongeza ubunifu na uhalisia katika kushiriki matukio yao ya kila siku kupitia moja ya majukwaa makubwa zaidi ya mawasiliano duniani.

Kampuni ya Meta, inayomiliki WhatsApp, imetangaza kuwa inafanyia majaribio kipengele kipya cha akili bandia (AI) kitakachowezesha watumiaji wake kufupisha mazungumzo marefu kwenye meseji. Kwa kutumia teknolojia ya AI, WhatsApp itawaruhusu watumiaji kupata muhtasari wa haraka wa mazungumzo yao, jambo ambalo linalenga kusaidia wale wanaopokea ujumbe mwingi au ambao hawakuwahi kufuatilia kila ujumbe mmoja mmoja. Kipengele hiki kinatarajiwa kufanya kazi kwa kuchambua mazungumzo ya kundi au mtu binafsi, kisha kutoa muhtasari wa mambo muhimu yaliyojadiliwa, huku kikihifadhi usalama na faragha ya watumiaji kwa kutumia teknolojia ya usimbaji wa mwisho kwa mwisho (end-to-end encryption). Taarifa kutoka kwa baadhi ya watumiaji waliopata toleo la majaribio zinasema kuwa kipengele hicho kiko chini ya sehemu ya “Chat Summary,” ambapo AI inaweza kutoa dondoo fupi kuhusu mazungumzo yaliyopita. Hii ni moja kati ya hatua kadhaa ambazo Meta imeanza kuzitekeleza ili kuimarisha matumizi ya AI kwenye majukwaa yake, ikiwa ni pamoja na kuanzisha wasaidizi wa kidijitali ndani ya WhatsApp na Messenger. Hadi sasa, Meta haijatoa tarehe rasmi ya kuachia kipengele hicho kwa watumiaji wote, lakini matarajio ni kuwa kitakuwa sehemu ya masasisho yajayo ya WhatsApp mwaka huu

WhatsApp imezindua rasmi maboresho mapya ya muonekano wa WhatsApp Web kwa watumiaji wote wanaotumia huduma hiyo kupitia kivinjari cha kompyuta. Maboresho haya yanakusudia kurahisisha matumizi na kufanya uzoefu wa mtumiaji kuwa bora zaidi. Mabadiliko haya ni sehemu ya juhudi za WhatsApp za kuendana na mahitaji ya watumiaji wanaoongeza kutumia huduma ya WhatsApp Web kwa mawasiliano yao ya kila siku. Kwenye toleo jipya la WhatsApp Web, watumiaji wataona muundo ulioboreshwa unaowezesha kupata ujumbe, mazungumzo, na vipengele vingine kwa urahisi zaidi. Mbali na kuboresha muonekano, WhatsApp pia imeongeza kasi na ufanisi wa matumizi, huku ikihakikisha kwamba huduma hiyo inaendeshwa kwa usalama na faragha inayostahili. Watumiaji wa WhatsApp Web sasa wanashauriwa kusasisha kivinjari chao na kufungua tena WhatsApp Web ili kufurahia maboresho haya mapya. Maboresho haya ni hatua nyingine katika mfululizo wa masasisho yanayolenga kuongeza ubora wa huduma za WhatsApp kwa kila aina ya mtumiaji, iwe ni kupitia simu au kompyuta.

WhatsApp, mojawapo ya huduma maarufu za ujumbe duniani, imetangaza kuanza kuweka matangazo katika sehemu yake ya Status. Hatua hii inalenga kuwapa wateja na biashara fursa zaidi ya kufikia watumiaji wake milioni bilioni kila mwezi kupitia njia hii mpya ya matangazo. Sehemu ya Status ya WhatsApp ni sehemu ambapo watumiaji huweza kushiriki picha, video, na ujumbe unaoisha baada ya masaa 24, sawa na Stories kwenye Instagram au Facebook. Kwa sasa, matangazo haya yataonekana kati ya Status za marafiki na familia, na yatakuwa na alama ya “Ad” ili kutofautisha na maudhui ya kawaida. WhatsApp imeeleza kuwa matangazo haya hayatatumia mazungumzo binafsi ya watumiaji kwa ajili ya kulenga matangazo, hivyo kuhakikisha faragha inahifadhiwa. Kampuni inatarajia kuwa njia hii mpya itasaidia kuongeza mapato na kuimarisha huduma bila malipo kwa watumiaji wake. Watumiaji wanashauriwa kufuatilia mabadiliko haya na kutoa maoni yao ili kuboresha uzoefu wa matumizi ya WhatsApp.

WhatsApp imeweka mabadiliko kwa kuweka uwezo wa kuzuia mtu asiweze kupiga screenshot katika picha au video ambayo mtu ametuma kwa kutumia option ya “View Once”.  Lakini pia inazuia mtu asiweze ku-screen record! Mabadiliko haya yameanza rasmi na kwa watumiaji wote ambao wanatumia toleo jipya (updated) app. Mtu akipiga screenshot au kurekodi screen picha haionekana na anapewa ujumbe kuwa WhatsApp imezuia screenshot/screen-record. Ikumbukwe bado watu wataweza kutumia simu nyingine kurekodi au kupiga picha hivyo sio mabadiliko ambayo yanaweka uhakika na usalama.