WhatsApp imeanzisha mfumo mpya unaowaruhusu watumiaji kuandika ujumbe mfupi ambao unaweza kujifuta baada ya muda maalumu unaochaguliwa na mtumiaji mwenyewe. Katika mfumo huu, mtumiaji anaweza kuweka muda wa ujumbe kudumu kwa saa moja, masaa manane, siku moja au hadi wiki moja kabla ya kutoweka kiotomatiki.
Kipengele hiki kinafanana kwa kiasi kikubwa na huduma ya Instagram Notes, lakini kimetengenezwa mahsusi kuendana na mazingira ya WhatsApp ambayo hutumika zaidi kwa mawasiliano ya karibu. Ujumbe huu mfupi utaonekana kwenye sehemu ya mazungumzo (Chats) na pia kwenye ukurasa wa wasifu (Profile) wa mtumiaji, na utaonekana kwa watu anaowasiliana nao mara kwa mara kama marafiki, wateja au ndugu.
Lengo la WhatsApp kuanzisha huduma hii ni kutoa njia rahisi ya kushiriki taarifa za muda mfupi kama matangazo madogo, kumbukumbu, au ujumbe ambao hauhitaji kubaki kwenye historia ya mazungumzo. Mfumo huu unatarajiwa kurahisisha mawasiliano hasa kwa wanaotoa taarifa za haraka au wanaopenda kushiriki mawazo ya muda maalumu.
Uboreshaji huu unaonyesha jinsi WhatsApp inaendelea kubadilika ili kuendana na mahitaji ya watumiaji wake katika ulimwengu wa mawasiliano ya kidijitali.
