Tag: Diamond Platnumz

Mwanamuziki nyota wa Bongo Fleva, Diamond Platnumz, ameibua gumzo baada ya kuwatolea uvivu watu wanaoendelea kulalamikia serikali kuhusu hali ya maisha. Kupitia ujumbe wake, Diamond amesisitiza kuwa wananchi wanapaswa kuongeza bidii kwenye kazi zao badala ya kuishia kuilaumu serikali kila mara. Hitmaker huyo wa Mtasubiri ameongeza kuwa changamoto za maisha ni za kawaida, na anayejituma hupata matunda yake bila kujali nani yupo madarakani. Diamond, ambaye mara nyingi hujitokeza kuzungumzia masuala ya kijamii, amesema ataendelea kuwatia moyo vijana kufanya kazi kwa bidii na kutumia vipaji vyao ipasavyo ili kuondokana na utegemezi. Kauli hiyo imezua mjadala mitandaoni, baadhi ya mashabiki wakimuunga mkono kwa kusema ujumbe huo ni wa kuhamasisha, huku wengine wakihisi amewabeza wananchi wanaopitia ugumu wa maisha.

Mwanamuziki nguli wa Bongo Fleva, Diamond Platnumz, amefunguka kwa uchungu kuhusu changamoto alizopitia kabla ya kutamba kwenye muziki, akisimulia namna alivyoachwa na mpenzi wake kwa madai ya kutokuwa na uwezo wa kumuhudumia kifedha. Akipiga stori na podcast ya Telliswift, Diamond amekiri kuwa maumivu ya kuachwa ndiyo yaliyompa msukumo wa kuandika wimbo “Kamwambie”, uliompa umaarufu mkubwa na kufungua rasmi milango ya mafanikio katika muziki wake. Baada ya kuachia wimbo huo, alijipatia mashabiki lukuki na kufanikisha kushinda tuzo mbalimbali zilizomtambulisha rasmi katika tasnia ya muziki wa Bongo Fleva. Staa huyo amekiri kuwa safari yake haikuwa rahisi, kwani familia yake ilitoka kwenye hali ya umasikini mkubwa na ili kuendeleza ndoto zake, alilazimika kufanya kazi za mikono ili kujikimu kimaisha. Amefichua kwamba aliwahi kuuza nguo za mitumba, kufanya kazi katika kituo cha mafuta, na hata kujihusisha na upigaji picha, kazi ambayo wakati huo ilidharaulika sana. Hata hivyo, Diamond anasema hajawahi kusahau maumivu yaliyompa motisha ya kuandika wimbo wa “Kamwambie.” uliompa jina. Leo hii, Diamond Platnumz anahesabika kama moja ya wasanii wenye ushawishi mkubwa barani Afrika, lakini safari yake ya kufika hapo imetokana na maumivu, uvumilivu na bidii ya miaka mingi.

Mzozo ulioshika kasi mitandaoni kati ya Babalevo na Mbosso kuhusu wimbo ‘Pawa’ umechukua mwelekeo mpya baada ya Diamond Platnumz kuingilia kati na kutoa msimamo wake. Babalevo na Mbosso walikuwa wakijibizana mitandaoni huku jina la Diamond likihusishwa kwenye malumbano hayo. Hata hivyo, kupitia ukurasa wake wa Instagram, Diamond ametoa kauli ya kutaka pande zote mbili kumheshimu, akisisitiza kuwa amekuwa akiwaheshimu na hana sababu ya kuhusishwa na migogoro yao. Diamond alimueleza Babalevo kuwa licha ya kumheshimu kama kijana mwenzake, maneno na mienendo yake yameanza kumpa hisia za kutilia shaka, hali inayoweza kupelekea kutojihusisha naye. Aidha, alimkumbusha Mbosso kuwa ana haki ya kukasirika au kujibu pale anapojisikia amekosewa, lakini akamtaka asiingize jina lake katika malumbano hayo, jambo ambalo amesema wameshazungumzia mara kadhaa huko nyuma. Hitimisho la ujumbe wake lilikuwa wito wa kuheshimiana, akieleza kwamba ikiwa wawili hao wana ajenda tofauti wanazopanga kupitia kivuli chake, basi waendelee, ila yeye hatashiriki.

Mwanamuziki nyota kutoka Tanzania, Naseeb Abdul Juma, maarufu kama Diamond Platnumz, ametoa tamko rasmi akieleza kuwa hajawahi na hajateua mtu yeyote kuwa msemaji wa maisha yake binafsi au kazi zake za muziki. Kupitia taarifa hiyo, Diamond amesisitiza kuwa taarifa yoyote inayotolewa na mtu mwingine kwa niaba yake haina uhalali wowote na haitakiwi kuchukuliwa kama ya kweli. Ameeleza kuwa iwapo mtu yeyote ataamua kuamini taarifa hizo zisizo rasmi, basi matokeo ya imani hiyo yatakuwa juu ya mhusika mwenyewe, na yeye hatalaumiwa kwa lolote linalotokana na hilo. Ameweka wazi kuwa endapo kutakuwa na jambo lolote muhimu la kuzungumza, atazungumza mwenyewe kupitia njia rasmi bila kumtuma mtu yeyote kumwakilisha. Mashabiki na vyombo vya habari wanahimizwa kufuatilia vyanzo rasmi vya mwanamuziki huyo kwa taarifa sahihi na kuepuka upotoshaji. Tamko hili limekuja kufuatia hali ya sintofahamu iliyojitokeza kwa muda sasa, ambapo Baba Levo amekuwa akizungumza mara kwa mara kuhusu maisha ya ndani ya Diamond na kazi zake, hali iliyowafanya baadhi ya watu kumchukulia kama msemaji wake wa karibu.

Staa wa muziki wa Bongo Fleva, Diamond Platnumz, ameonesha kutoridhishwa na hatua ya jina na picha yake kutumiwa na ukurasa maarufu wa mitandaoni nchini kwao, katika mjadala kuhusu kwa nini wasanii wa Tanzania hushindwa kusainiwa na lebo kubwa za kimataifa. Kupitia ukurasa wake wa Instagram, Diamond amejibu vikali mada hiyo, akieleza kuwa amekuwa na mafanikio makubwa katika anga za kimataifa. Amesema amewahi kupokea ofa kutoka kwa lebo kubwa duniani kama Universal Music Group na Roc Nation, na hatimaye alisaini mkataba rasmi na Warner Music, unaokadiriwa kuwa na thamani ya shilingi bilioni 13.5 za Kitanzania. Msanii huyo ambaye pia ni mkurugenzi wa lebo ya WCB Wasafi, amesema mafanikio yake hayakuja kwa bahati bali ni matokeo ya bidii, maadili ya kazi na kujituma kwake. Ametaja kuwa amewahi kushirikiana na mastaa wa kimataifa kama Alicia Keys, Rick Ross, Ne-Yo, Omarion na wengine wengi, ishara kuwa anaheshimiwa na kutambuliwa hata nje ya mipaka ya Afrika. Kauli hiyo imeibua mjadala mpana mitandaoni, huku mashabiki wake wakimtetea vikali, wakisisitiza kuwa Diamond ni miongoni mwa wasanii wachache barani Afrika walioweza kuvuka mipaka ya bara na kupata nafasi katika jukwaa la kimataifa.

Mwanamuziki nguli kutoka Tanzania, Diamond Platnumz, ametangaza rasmi kuwa albamu yake mpya inatarajiwa kutoka mwezi Septemba mwaka 2025. Akizungumza katika mahojiano maalum na jarida maarufu la Billboard, Diamond amesema maandalizi ya albamu hiyo yako katika hatua za mwisho. Diamond Platnumz, ambaye ameendelea kuwa mmoja wa wasanii wakubwa barani Afrika, amesema sababu ya kuchelewa kutoa albamu mpya ni uhitaji wa ubora wa hali ya juu katika kila wimbo utakaokuwemo ndani ya Albamu hiyo. Ameeleza kuwa analenga kuhakikisha kila ngoma kwenye albamu hiyo ni hit, jambo linalohitaji muda mwingi wa kufanya utafiti, uandishi wa mashairi na utayarishaji wa muziki. Kupitia mahojiano hayo, Diamond ameweka wazi kuwa hana haraka linapokuja suala la kutoa kazi ya muziki, kwani anaamini katika ubora kuliko haraka. Mashabiki wake wamepokea habari hizo kwa hamasa kubwa, wakisubiri kwa shauku ujio wa albamu hiyo ambayo inatarajiwa kuwa na ushirikiano wa kimataifa. Albamu hiyo ya Septemba 2025 inatarajiwa kuwa moja ya kazi kubwa zaidi kutoka kwa Diamond Platnumz, na kuongeza mchango wake katika kukuza muziki wa Bongo Flava kwenye jukwaa la kimataifa.