Tag: eric omondi

Mchekeshaji maarufu nchini Kenya, Eric Omondi, ameibua mjadala mkali baada ya kutoa wito kwa maafisa wa polisi kupuuza kauli ya Rais William Ruto kuhusu kutumia risasi za miguu dhidi ya watu wanaoharibu biashara za wengine. Akizungumza na wanahabari jijini Nairobi, Eric Omondi alisema kuwa polisi ni sehemu ya wananchi na hivyo hawapaswi kuwaadhibu Wakenya wenzao kwa kutumia nguvu kupita kiasi. Akitumia sauti ya ukakamavu, alisisitiza kuwa raia wamechoka na uongozi wa Rais Ruto, hasa kutokana na hali ngumu ya maisha, ukosefu wa ajira, na kupanda kwa gharama ya bidhaa muhimu. “Polisi pia ni Wakenya. Wana familia, wana ndugu. Hii nchi sio ya mtu mmoja, na ni makosa makubwa kutumia risasi kwa wananchi wanaolalamika au kuandamana kwa amani,” alisema Eric Omondi. Kauli ya Eric imekuja siku chache tu baada ya Rais Ruto kunukuliwa akisema kuwa watu watakaohusika na uporaji au uharibifu wa mali wakati wa maandamano wataadhibiwa kwa kupigwa risasi kwenye miguu ili kuzuia uhalifu na kulinda biashara za watu wengine. Lakini kwa upande wake, Eric Omondi amesema kuwa hatua hiyo ni kinyume na haki za binadamu na inachochea ghasia zaidi badala ya kuleta suluhu. Ameitaka serikali kusikiliza kilio cha wananchi badala ya kuwanyamazisha kwa vitisho na nguvu za kijeshi. Tamko hilo limezua hisia mseto mitandaoni na kwenye majukwaa ya kisiasa, huku baadhi ya watu wakimuunga mkono kwa kusema amekuwa sauti ya wanyonge, huku wengine wakimtaka atumie jukwaa lake kwa njia za kujenga badala ya kuikosoa serikali.

Mchekeshaji mashuhuri nchini Kenya, Eric Omondi, ametoa wito kwa Wakenya wote kuvaa barakoa siku ya Ijumaa, Juni 20, kama njia ya kumkumbuka Boniface Kariuki, kijana aliyeripotiwa kupigwa risasi na maafisa wa polisi mnamo siku ya Jumanne. Kupitia ujumbe aliouchapisha kwenye mitandao ya kijamii, Eric Omondi alielezea masikitiko yake juu ya tukio hilo, akilitaja kuwa mfano mwingine wa ukatili wa polisi dhidi ya raia wasio na silaha. Omondi aliwaomba Wakenya wajitokeze kwa njia ya amani na kuonyesha mshikamano kwa kuvaa barakoa nyeusi au za rangi yoyote, kama ishara ya heshima kwa maisha ya Boniface. “Ijumaa hii, kila Mkenya na avawe barakoa. Tuvae kwa ajili ya Boniface Kariuki. Tuvae kwa ajili ya wale wote waliopoteza maisha kwa mikono ya polisi. Tuvae kama ishara ya amani, ya kuomboleza, na ya kutaka haki,” aliandika Omondi. Hashtag #BonifaceKariuki imeendelea kusambaa kwa kasi kwenye mitandao ya kijamii huku Wakenya wakieleza hasira, huzuni na kutaka haki itendeke. Wengi wamekuwa wakishiriki picha za barakoa na ujumbe wa kupinga ukatili wa polisi. Tukio la kupigwa risasi kwa Boniface limeongeza wasiwasi kuhusu matumizi ya nguvu kupita kiasi na maafisa wa usalama nchini. Mashirika ya kutetea haki za binadamu yameitaka serikali kufanya uchunguzi wa haraka na kuhakikisha waliohusika wanawajibika kisheria. Maandamano ya amani pia yanatarajiwa kufanyika katika baadhi ya maeneo jijini Nairobi na miji mingine, huku wito ukiendelea kutolewa kwa raia kushiriki kwa njia za amani na kuzingatia usalama. Eric Omondi, ambaye amekuwa mstari wa mbele katika harakati mbalimbali za kijamii, amesisitiza kuwa hatua hii si ya kisiasa bali ya kibinadamu, akiwataka Wakenya kuonyesha umoja wao kwa njia ya amani na heshima.