Tag: eric omondi

Mchekeshaji maarufu nchini Kenya, Eric Omondi, ametoa wito kwa vijana wa taifa hilo kusimama pamoja kwa umoja na kuendeleza urithi wa hayati Raila Odinga kwa vitendo. Kupitia ujumbe wake kwa vijana, Eric amesema kuwa wakati taifa la Kenya linaendelea kuomboleza kifo cha kiongozi huyo, ni jukumu la vijana kutimiza yale yote ambayo Raila alianza lakini hayakukamilika enzi za uhai wake.. Mchekeshaji huyo aliyegeukia uanaharakati, amesema vijana wa Kenya wana fursa kubwa kumaliza kazi hiyo, kwani wao ndio nguvu kuu ya taifa na walikuwa sehemu muhimu ya maono ya Raila kuhusu haki, umoja na maendeleo. Kauli ya Omondi inakuja wakati amekuwa akiendeleza kampeni za kuwarai vijana wa Gen Z kujisajili kama wapiga kura kuelekea uchaguzi mkuu wa 2027, akisisitiza kuwa ni kupitia kura pekee ndipo vijana wataweza kutimiza maono na ndoto ya Kenya mpya yenye usawa, matumaini na haki kwa wote.

Mchekeshaji na mwanaharakati wa kijamii Eric Omondi amefunguka kwa uchungu baada ya tuhuma zilizozagaa mtandaoni zikidai kuwa alimtoa kafara msanii Shalkidoh aliyezikwa jana nyumbani kwao kaunti ya Kiambu. Akizungumza kufuatia tetesi hizo, Eric amekanusha vikali madai hayo, akisema ni uvumi wa kupotosha unaolenga kuharibu jina lake na juhudi zake za kusaidia watu. Amesema kuwa hajawahi kujihusisha na mambo ya ushirikina bali anatenda mema kwa nia ya dhati kusaidia jamii. Eric ameongeza kuwa maneno ya watu hayawezi kumkatisha tamaa, na ataendelea kuwasaidia Wakenya wenye uhitaji bila kuogopa maneno ya chuki au fitna. Hata hivyo amesema lengo lake ni kuona vijana wanapata fursa bora za maisha kupitia miradi na kampeni zake za kijamii, akisisitiza kuwa atabaki kuwa sauti ya matumaini kwa waliokata tamaa. Kauli ya Eric Omondi imekuja mara baada ya walimwengu mtandaoni kudai kuwa huenda mchekeshaji huyo alihusika na kifo cha Shalkidoh, ikizingatiwa kuwa pikipiki aliyompa kama msaada ndiyo iliyosababisha ajali iliyomtoa uhai.

Mchekeshaji na mwanaharakati Eric Omondi ametoa wito kwa wasanii nchini Kenya kuhudhuria ibada ya wafu ya marehemu msanii wa Gengetone Shalkido, itakayofanyika Jumatano tarehe 15, katika kanisa la All Saints Cathedral, Nairobi, kuanzia saa 11:30 asubuhi. Kupitia ujumbe aliouchapisha mtandaoni, Eric amewahimiza wasanii wa Kenya kuonyesha umoja na upendo kwa kuhudhuria ibada hiyo, akisema kuwa ni muhimu kwa wasanii kusimama pamoja hasa nyakati za huzuni. Eric ameongeza kuwa ibada hiyo si tu ya kumuaga Shalkido, bali pia ni ishara ya mshikamano katika tasnia ya muziki wa Kenya. amesema wasanii wanapaswa kuacha tofauti zao pembeni na kuungana katika maombi na heshima za mwisho kwa marehemu. Ibada hiyo inatarajiwa kuwaleta pamoja wasanii, wadau wa muziki, na mashabiki wengi watakaoungana kumuaga Shalkido kwa heshima na upendo kabla ya mazishi yake baadaye wiki hii. Ikumbukwe Shalkido, aliyepata umaarufu kupitia kundi la Sailors Gang, alifariki dunia hivi karibuni kufuatia ajali mbaya ya barabarani.

Mchekeshaji na mwanaharakati wa kijamii kutoka Kenya Eric Omondi ameanzisha rasmi kampeni ya kitaifa yenye lengo la kuhamasisha vijana wa kizazi cha Gen Z kujisajili kama wapiga kura kabla ya uchaguzi mkuu ujao. Kupitia hafla ya uzinduzi iliyofanyika katika Chuo Kikuu cha Pwani, Kaunti ya Kilifi, Eric amesema kuwa kampeni hiyo ni ya kihistoria kwa taifa la Kenya kwani inaashiria mwanzo wa safari ya kuleta mabadiliko ya kisiasa kupitia ushiriki wa vijana. Omondi ameeleza kuwa kampeni hiyo inalenga kutembelea vyuo vikuu vyote nchini humo ili kuhakikisha vijana wanatumia haki yao ya kidemokrasia kwa kujisajili na kushiriki katika uchaguzi. Mchekeshaji huyo, amesisitiza kuwa ni wakati wa vijana kuamka na kubeba jukumu la kuunda taifa jipya kupitia kura zao, akiahidi kutembelea kila pembe ya Kenya ili kuhakikisha “Kenya Mpya” inajengwa na vijana wenye ari ya mabadiliko. Eric Omondi, ambaye kwa miezi ya hivi karibuni amekuwa akijitokeza kama sauti ya vijana katika masuala ya kijamii na kiuchumi, amesema anaamini kuwa nguvu ya vijana ndiyo nguzo kuu ya mabadiliko nchini humo.

Mchekeshaji maarufu Eric Omondi ameonyesha moyo wa kusaidia baada ya kujitokeza kumsaidia msanii wa Gengetone, Shalkido, ambaye hivi karibuni alifichua kuwa maisha yamekuwa magumu kiasi cha kushindwa kumudu mahitaji ya familia yake. Mchekeshaji huyo amemkabidhi Shalkido pikipiki mpya pamoja na mahitaji ya nyumbani ikiwemo unga, sukari na mafuta ya kupikia. Kupitia msaada huo, Eric amesema lengo lake ni kuhakikisha msanii huyo anapata fursa ya kujiinua na kujitegemea tena. Shalkido, anayejulikana zaidi kupitia kundi la Sailors, amepokea msaada huo kwa furaha na shukrani, akisema utampa nafasi ya kurudia katika mstari sahihi wa kujikimu kimaisha. Kitendo cha Eric kimepongezwa na mashabiki wengi mitandaoni wakimtaja kuwa mfano wa kuigwa kwa wasanii wengine na jamii kwa ujumla.