Tag: google

Google imeanza kufanya maboresho ya muundo wa emoji zinazotumika kwenye simu za Android, hatua inayolenga kuzifanya zifanane kwa kiasi kikubwa na emoji za iPhone zinazotumika kwenye mfumo wa iOS. Mabadiliko hayo yameanza kuonekana katika mfumo mpya wa majaribio wa Android 16, ambapo emoji nyingi zimeboreshwa muonekano wake na kufanana zaidi na zile za Apple. Kwa muda mrefu, emoji za Android zimekuwa na muundo wa kipekee, tofauti na za iOS na Microsoft, kwani Google ilikuwa ikisisitiza kuwa na utambulisho wake binafsi. Kwa ujumla, mfumo wa emoji duniani unaruhusu kampuni kuwa na uhuru wa kubuni muonekano wao, mradi maana ya emoji ibaki ile ile. Hii ndiyo sababu emoji za mifumo mbalimbali zimekuwa na mwonekano tofauti, licha ya kuwasilisha ujumbe unaofanana. Kwa maboresho haya mapya, inatarajiwa kuwa Android na iOS zitakuwa na muundo unaofanana kwa kiwango kikubwa, ingawa tofauti ndogo bado zitabaki, hususan katika rangi za emoji. Asilimia kubwa ya muundo wake itafanana, jambo linalolenga kuboresha mawasiliano ya kidijitali kwa watumiaji. Hatua hii ya Google imezua mijadala mitandaoni, baadhi ya watumiaji wakifurahia mabadiliko hayo kwa urahisi wa mawasiliano, huku wengine wakieleza wasiwasi wa kupotea kwa utofauti wa muundo wa Android. Maboresho haya yanatarajiwa kuonekana rasmi pindi Android 16 itakapotolewa kwa umma.

Google imeanzisha kipengele kipya kiitwacho Recovery Contacts, kinacholenga kusaidia watumiaji wa huduma zake kurejesha akaunti zao kwa urahisi zaidi endapo watakumbwa na changamoto kama kupoteza simu, kuibiwa, au kushindwa kutumia namba yao ya simu kupata PIN ya kuingia kwenye akaunti. Kupitia huduma hii mpya, mtumiaji wa akaunti ya Google atakuwa na uwezo wa kuteua rafiki wa karibu au mwanafamilia anayeaminika kuwa kama mtu wa kusaidia katika urejeshaji wa akaunti (account recovery). Mtu huyu ataunganishwa kama “recovery contact”, na ataweza kusaidia mtumiaji kupokea PIN code ya muda ya kusaidia kuingia tena kwenye akaunti. Ni muhimu kufahamu kuwa recovery contact hatakuwa na uwezo wa kuingia kwenye akaunti ya mtumiaji, wala kuona taarifa zozote za ndani ya akaunti hiyo. Jukumu lake litakuwa ni kupokea PIN kutoka Google pale itakapohitajika kusaidia katika mchakato wa urejeshaji. Hatua hii inakuja kama sehemu ya jitihada za Google kuimarisha usalama wa akaunti za watumiaji na kuwasaidia wanaopoteza njia ya kawaida ya kuingia hasa kutokana na ongezeko la matukio ya wizi wa simu na changamoto za kiufundi zinazoweza kuziba njia ya kuingia kwenye akaunti. Kwa sasa, huduma ya Recovery Contacts inapatikana kwa hatua za majaribio kwa watumiaji wa baadhi ya huduma za Google, na inatarajiwa kuenea kwa watumiaji wote duniani katika kipindi kifupi kijacho.

Google imeanza kutekeleza mabadiliko mapya yanayolenga kuboresha uzoefu wa watumiaji wa Android, hususan katika eneo la kupiga na kupokea simu. Kupitia sasisho jipya, watumiaji sasa wanaweza kubadilisha mwonekano wa call screen kwa kutumia kipengele kipya kinachoitwa “Calling Card.” Kupitia Calling Card, mtumiaji anaweza kuchagua aina ya herufi za jina, rangi mbalimbali, picha ya full screen, na kubadilisha jinsi skrini ya simu inavyoonekana pale mtu anapopiga simu. Hii inamaanisha kuwa sasa kila simu inayoingia inaweza kuwa na mwonekano wa kipekee wa kuvutia na wa kibinafsi zaidi. Mabadiliko haya mapya yanaifanya Android kufanana zaidi na mfumo wa iOS wa Apple, ambao kwa muda mrefu umejulikana kwa muonekano wake wa kuvutia wa skrini ya simu za kuingia. Kupitia hatua hii, Google inaonyesha nia yake ya kuleta ubunifu unaowapa watumiaji uhuru zaidi wa kubinafsisha vifaa vyao. Kwa sasa, kipengele hiki kinapatikana kwa baadhi ya watumiaji na kinatarajiwa kusambaa zaidi kwa njia ya update ya Google Phone app katika wiki zijazo. Watumiaji wa Android wanashauriwa kuhakikisha programu zao ziko katika toleo jipya kabisa ili kupata huduma hii mpya ya kuvutia.

Google imezindua rasmi simu tatu mpya za kizazi cha Pixel: Pixel 10, Pixel 10 Pro, na Pixel 10 Fold. Ingawa kwa muonekano hazijabadilika sana ukilinganisha na matoleo ya awali kama Pixel 9, simu hizi mpya zimeboreshwa kwa kiwango kikubwa katika teknolojia ya ndani. Mabadiliko makuu yamefanyika kwenye kamera, ambazo sasa zinasaidiwa na akili bandia (AI) ili kutoa picha bora zaidi, hasa katika mazingira ya mwanga hafifu. Pia, simu hizo zina uwezo wa kurekebisha picha kiotomatiki, kuondoa vitu visivyohitajika, na kutoa video zenye ubora wa juu zaidi kwa kutumia teknolojia ya AI. Google pia imeongeza chip mpya ya Tensor G4, inayowezesha simu kufanya kazi kwa haraka zaidi, kutumia umeme kwa ufanisi, na kuruhusu matumizi mapana ya AI ikiwemo kutafsiri lugha papo hapo, kuandika kwa sauti, na kuhariri picha kwa kutumia maandishi. Simu hizo zinakuja na Android 15 na zinatarajiwa kuingia sokoni mwezi ujao. Kwa mujibu wa Google, watumiaji wa Pixel 10 watapata masasisho ya programu na usalama kwa hadi miaka 7, jambo linaloonesha dhamira ya kampuni kuimarisha maisha marefu ya kifaa na usalama wa watumiaji.

Kampuni ya teknolojia ya Google imekubali kulipa fidia ya jumla ya dola milioni 314.6 (sawa na takriban shilingi bilioni 40 za Kenya) kwa watumiaji wa Android katika jimbo la California, Marekani, kufuatia madai ya matumizi mabaya ya data za binafsi. Makubaliano hayo ni sehemu ya suluhu ya kesi ya pamoja iliyowasilishwa mahakamani dhidi ya kampuni hiyo, ambapo ilidaiwa kuwa Google ilikusanya na kutumia taarifa za mahali walipo watumiaji bila ridhaa yao halali. Kwa mujibu wa hati za mahakama zilizotolewa wiki hii, Google ilituhumiwa kwa kushindwa kutoa taarifa za kutosha kwa watumiaji kuhusu jinsi taarifa zao za mahali zinavyokusanywa na kutumiwa kupitia huduma zake mbalimbali, ikiwemo Google Maps na Google Search, hata baada ya watumiaji kuzima huduma za ufuatiliaji wa eneo (location tracking). Mwendesha mashtaka mkuu wa jimbo la California, Rob Bonta, alisema kwamba makubaliano hayo ni ushindi mkubwa kwa haki za faragha za watumiaji. Kwa mujibu wa mkataba wa fidia hiyo, zaidi ya wakazi milioni nne wa California wanaostahili walengwa wa fidia hiyo na wataarifiwa jinsi ya kudai malipo yao. Hata hivyo, kiwango halisi ambacho kila mtumiaji atapokea kitapangwa kulingana na idadi ya waliotimiza masharti ya madai. Hii si mara ya kwanza kwa Google kulazimika kulipa fidia kutokana na masuala ya faragha. Mwaka 2022, kampuni hiyo ililipa dola milioni 391 kwa majimbo 40 ya Marekani kutokana na tuhuma kama hizo. Google bado haijatoa taarifa rasmi kuhusu makubaliano haya mapya, lakini imekuwa ikijitetea kwamba imeboresha sera zake za faragha na kuwapa watumiaji wake udhibiti zaidi wa taarifa zao binafsi.