Tag: Mulamwah

Mchekeshaji maarufu kutoka Kenya, Mulamwah, amefichua kuwa aliyekuwa mpenzi wake na mama wa mtoto wao, Ruth K, amefanya uamuzi wa siri wa kumbadilishia mtoto wao jina la ukoo kutoka jina la baba Oyando hadi jina lake mwenyewe Wanjiku. Kupitia ujumbe aliouchapisha mtandaoni, Mulamwah alieleza masikitiko yake kwa hatua hiyo, akisema kuwa hakuwahi kuhusishwa wala kupewa taarifa kuhusu mabadiliko hayo muhimu katika maisha ya mtoto wake. “Sikuarifiwa chochote. Kumtoa jina langu na kuweka lake bila hata kuniambia, siyo sawa,” alisema Mulamwah kwa masikitiko. Mulamwah, ambaye jina lake kamili ni David Oyando, alisema kuwa kitendo hicho kimemvunja moyo kama mzazi na kinaibua maswali kuhusu haki za baba katika malezi na maamuzi ya maisha ya mtoto. Aliongeza kuwa licha ya tofauti zao na Ruth K, bado anahisi anapaswa kushirikishwa katika maamuzi muhimu yanayomhusu mtoto wao. Wafuasi na mashabiki wake kwenye mitandao ya kijamii wametoa maoni tofauti, wengine wakimpa pole na kumtaka atafute suluhu ya kibinafsi au kisheria, huku wengine wakisema huenda hatua hiyo ni ya kawaida kwa mzazi anayeishi na mtoto peke yake. Kwa upande wa Ruth K, bado hajatoa majibu rasmi kuhusu madai hayo hadi wakati huu wa kuchapishwa kwa taarifa hii. Tukio hili linaibua mjadala mpana kuhusu haki za wazazi, ushirikiano baada ya kuvunjika kwa uhusiano, na athari za uamuzi wa upande mmoja kwenye maisha ya watoto.

Baada ya wiki ya taharuki na mivutano ya hadharani iliyopelekea kurushiana lawama mitandaoni, mchekeshaji Mulamwah na aliyekuwa mpenzi wake Ruth K wameamua kufunga ukurasa wa mgogoro huo kwa kuomba msamaha kwa mashabiki wao, kila mmoja akielezea majuto yake kwa yaliyojiri. Kupitia ujumbe mrefu aliouchapisha kwenye mitandao ya kijamii, Mulamwah alielezea kwa kina maumivu na majuto aliyobeba kufuatia kile alichokieleza kama msururu wa maamuzi yasiyo ya busara aliyoyafanya akiwa chini ya hisia kali. Alisema kuwa amefanya tafakari ya kina na ametambua kuwa matendo yake yalikuwa ya kuumiza na ya kutozingatia hisia za wengine. “Poleni sana kwa mashabiki wangu wote. Najua nimewaangusha kwa njia nyingi. Nilikuwa nimesukumwa na hisia na hali mbalimbali, lakini hiyo haifai kuwa sababu ya mimi kufanya baadhi ya mambo niliyofanya. Nimejifunza, nimejirekebisha, na nipo tayari kuanza upya,” alisema Mulamwah katika ujumbe wake wa maombi ya msamaha. Mulamwah alihitimisha kwa kueleza kuwa ni wakati wa kutuliza hali, kusonga mbele na kuweka nguvu katika kazi na malezi, huku akimwomba Mungu kuwaongoza katika maamuzi ya baadaye. Kwa upande wake, Ruth K naye hakusita kuonesha unyenyekevu wake kwa mashabiki na familia yake. Katika chapisho lake, aliomba msamaha kwa wale wote waliokwazwa na matendo au kauli zake, na akaahidi kuanza ukurasa mpya wa maisha. “Ninachukua jukumu kamili kwa sehemu yangu ya makosa. Nilikuwa nikipitia wakati mgumu kihisia na kwa kweli mambo mengi yalinitesa. Si kila nilichofanya kilikuwa sahihi, lakini naomba mnisamehe. Nitakuwa bora – kwa ajili yangu, kwa ajili ya mtoto wangu, na kwa ajili yenu,” alisema. Aliongeza kuwa kama mama wa mtoto mmoja, anapitia changamoto nyingi huku akijitahidi kudumisha utu na utulivu. Ruth aliomba msamaha kwa wote walioumizwa au kuvunjwa moyo na matendo yake, na kueleza kuwa huu ni mwanzo mpya wa maisha yenye maadili na nidhamu. Kuomba radhi kwao kumepokelewa kwa hisia mseto na wafuasi wao, wengi wakikiri kuwa ni hatua muhimu ya ukomavu na uwajibikaji. Wengi wana matumaini kuwa huu ni mwanzo wa ukurasa mpya katika maisha yao binafsi na ya kitaaluma.

Mama wa mtoto wa mchekeshaji maarufu Mulamwah, anayefahamika kwa jina la Ruth K, amezua gumzo mitandaoni baada ya kumtolea uvivu mzazi mwenzake, kufuatia hatua ya msanii huyo kuchapisha picha yake kwenye mitandao ya kijamii bila idhini. Kupitia ukurasa wake wa Instagram, Ruth K aliandika ujumbe wa hisia akieleza jinsi alivyojeruhiwa kihisia tangu kuvunjika kwa mahusiano yao takribani miezi mitatu iliyopita. Anasema kuwa ukimya wake umechukuliwa kimakosa kuwa ni udhaifu, na sasa ameamua kusimama kidete kudai heshima yake. “Mara nyingine kimya huchukuliwa kuwa udhaifu. Haijapita hata miezi mitatu tangu tuachane, lakini tayari nimepitia fedheha na ukosefu wa heshima hadharani – na zaidi kwa faragha,” aliandika Ruth K. Katika ujumbe huo, Ruth alieleza kuwa anapitia wakati mgumu wa kupona kihisia lakini hali hiyo imekuwa ya kuchosha kutokana na matendo ya dharau kutoka kwa Mulamwah. Alifichua kuwa Mulamwah alimtumia pesa kiasi cha shilingi 5,000 kisha akazirudisha haraka, jambo ambalo alilitaja kuwa ni la dharau. Lakini kilichomuudhi zaidi ni kitendo cha Mulamwah kupakia picha aliyoweka juhudi kubwa kuipiga na kuitayarisha, bila ridhaa yake. “Unatuma elfu tano halafu unairejesha, kisha unathubutu kuscreenshot picha niliyoitolea jasho? Kiburi ni kikubwa mno,” alisema kwa msisitizo. Kwa hasira na uchungu, Ruth K alihitimisha ujumbe wake kwa kusema ameamua kuchukua heshima yake tena, akiahidi kuwa ipo siku atasimulia hadithi yake yote kwa umma. “Siku moja nitaeleza simulizi langu,” aliandika kwa hisia. Hali hii imezua mjadala mkubwa mitandaoni huku wafuasi wa wawili hao wakigawanyika, wengine wakimuunga mkono Ruth kwa ujasiri wake wa kujieleza, huku wengine wakimtaka aepuke kusambaza mambo ya kifamilia kwenye mitandao ya kijamii. Hadi kufikia sasa, Mulamwah bado hajatoa kauli rasmi kuhusiana na tuhuma hizo mpya dhidi yake.