Msanii mashuhuri wa muziki wa dancehall kutoka Jamaica, Vybz Kartel, ametangaza kuanza kwa ziara yake ya kimataifa inayojulikana kama Worl’ Boss Tour, ikiwa ni mara ya kwanza kwa msanii huyo kufanya maonyesho ya kimataifa baada ya miaka 20.
Ziara hiyo ya maonyesho 15 itaanza rasmi Mei 24 mjini Georgetown, Guyana, na itaendelea katika miji mikubwa kama Atlanta, London, Paris, Kingston na hatimaye Birmingham, Uingereza mwezi Septemba. Tangazo hili linakuja wiki chache baada ya Kartel kufanikisha maonyesho mawili yaliyosheheni mashabiki katika ukumbi wa Barclays Center, New York, hatua iliyozua hisia kubwa katika tasnia ya muziki.
Vybz Kartel, ambaye pia amepata uteuzi wa tuzo ya Grammy na kuonekana kwenye jalada la jarida maarufu la Billboard, anaendelea kufufua kazi yake ya muziki baada ya kuachiliwa kutoka gerezani mapema mwaka huu. Kupitia taarifa kwa vyombo vya habari, msanii huyo amesema ziara hiyo inalenga kuunganisha mashabiki wake duniani kote na kusherehekea mafanikio ya muziki wa dancehall.
“Nilisimama hapa nikiwa na ndoto; leo picha yangu ndiyo inasafiri kwenye ndoto hizo. Ni baraka isiyoelezeka.” Aliandika Instagram.
Ziara ya Worl’ Boss Tour inatazamiwa kuwa mojawapo ya matukio makubwa ya muziki wa Karibea mwaka huu, ikimrejesha rasmi Kartel katika jukwaa la kimataifa kwa kishindo.
