WhatsApp Business imetangaza kuwa kuanzia Julai 1, 2025, itaanza kutumia mfumo mpya wa kutoza malipo kwa biashara zinazotumia huduma hiyo. Katika mfumo huu mpya, biashara zitalipia kwa kila ujumbe mmoja mmoja unaotumwa kwa mteja, tofauti na mfumo wa awali ambapo walilipia mazungumzo yote ya masaa 24 kwa bei moja.
Kwa sasa, mfumo wa sasa wa malipo unaruhusu biashara kutuma jumbe nyingi ndani ya saa 24 mara tu wanapolipia mazungumzo na mteja. Hii iliwapa uhuru wa kuwasiliana kwa kina bila gharama za ziada kwa kila ujumbe. Hata hivyo, kuanzia Julai, kila ujumbe utakuwa na gharama yake, hali ambayo inalenga kufanya mawasiliano yawe ya makusudi na yenye ufanisi zaidi.
Kwa mujibu wa WhatsApp, mabadiliko haya yameletwa ili kusaidia biashara kudhibiti matumizi yao vizuri, kuwa na uwazi wa gharama, na kuhamasisha mawasiliano yenye maana zaidi kati ya biashara na wateja. Aidha, mfumo huu mpya unalenga kuongeza thamani kwa kila ujumbe unaotumwa, badala ya kutegemea idadi ya masaa ya mazungumzo.
WhatsApp imetoa wito kwa biashara zote zinazotumia jukwaa hilo kuanza kujiandaa na mabadiliko haya mapema kwa kupitia taarifa rasmi na miongozo itakayochapishwa. Pia, huduma ya msaada kwa wateja itakuwa tayari kuwasaidia wamiliki wa biashara kuelewa jinsi mfumo mpya utakavyofanya kazi.
