Kiongozi wa upinzani nchini Uganda, Bobi Wine, ameingia kwenye mzozo mkali na polisi wa kutuliza ghasia katika mji wa Mbarara, baada ya timu yake ya kampeni kushambuliwa na watu wasiojulikana, katika kile kinachoonekana kuwa kuongezeka kwa vurugu wakati wa ziara yake ya kisiasa magharibi mwa nchi.
Kisa hicho, kilichorekodiwa kwenye video ambayo sasa imesambaa mtandaoni, kinaonyesha Bobi Wine akimkabili kwa hasira askari wa polisi waliokuwa wamejihami kwa silaha nzito, huku akizungukwa na wafuasi wake pamoja na wanahabari waliokuwa wakifuatilia kampeni zake.
Mashuhuda wamesema kuwa polisi walijaribu kufutilia mbali mkutano wa hadhara wa Bobi Wine, hatua iliyozua taharuki na kupelekea mvutano wa moja kwa moja kati ya wafuasi na maafisa wa usalama.
Visa kama hivyo vimeripotiwa pia katika wilaya za Kiruhura na Kazo, ambako baadhi ya wafuasi wa Bobi Wine wamekamatwa, hali inayokumbusha mfumo wa ukandamizaji wa kisiasa ulioshuhudiwa wakati wa kampeni za uchaguzi wa mwaka 2021.
