Malkia wa taarab, Khadija Kopa, amemkingia kifua msanii wa Bongo Fleva Diamond Platnumz kufuatia kauli yake iliyozua mjadala kuhusu Watanzania kuhamasishwa kufanya kazi kwa bidii.
Akizungumza na waandishi wa habari, Khadija Kopa amesema kuwa changamoto kubwa katika jamii ni kwamba watu wengi hawapendi kuambiwa ukweli, hata pale unaposemwa kwa nia njema ya kujenga.
Kopa amewataka vijana waache kulalamika na wajikite katika kazi, akisisitiza kuwa wanapaswa wawe tayari kusikia ukweli hata unapoumiza. Ameeleza kuwa dunia ya sasa inahitaji juhudi na nidhamu ili kufanikisha malengo ya maisha.
Mwanamama huyo ambaye pia ni mama mzazi wa Zuchu, amesisitiza kuwa kutafuta kipato si suala la jinsia, bali ni wajibu wa kila mtu mwenye uwezo. Amehimiza usawa katika kuwajibika, akisisitiza kuwa wanaume na wanawake wanapaswa kuwa na bidii na kujituma ili kujenga maisha bora na yenye heshima.
Kwa ujumla, Khadija Kopa ameweka wazi kuwa kauli za Diamond Platnumz hazikuwa za dharau, bali ni mwito wa kuhamasisha vijana na jamii kwa ujumla kujituma na kuacha kulalamika bila kuchukua hatua.
