Tag: bebe cool

Msanii mkongwe wa muziki wa Uganda, Bebe Cool, amemsuta vikali msanii mwenzake Eddy Kenzo, akidai hana uelewa wa kina kuhusu masuala ya haki miliki (copyright) nchini humo. Akizungumza na wanahabari, Bebe Cool amesema kauli za hivi karibuni za Eddy Kenzo kuhusu mfumo wa usimamizi wa hakimiliki nchini Uganda zimejaa upotoshaji na zinatokana na msanii huyo kutoelewa sheria na taratibu zinazohusu sekta hiyo. Kwa mujibu wa Bebe Cool, Kenzo amekuwa akizungumza kama mtu asiye na taarifa sahihi, hali ambayo inaweza kuwapotosha wasanii wengine na umma kwa ujumla. Bosi huyo wa Gagamel International amesisitiza kuwa masuala ya hakimiliki ni nyeti na yanahitaji uelewa wa kisheria, akiongeza kuwa si kila msanii ana uwezo wa kuyazungumzia kwa usahihi bila kujiridhisha na ukweli uliopo. Hata hivyo amemtaka Eddy Kenzo na wasanii wengine kujifunza zaidi kuhusu sheria za hakimiliki kabla ya kutoa maoni hadharani.

Mwanamuziki mkongwe nchini Uganda, Bebe Cool, ameibuka tena na ukosoaji mkali dhidi ya Bobi Wine na chama chake cha National Unity Platform (NUP), akidai kuwa upinzani huo hauna uwezo wala maandalizi ya kutosha kuongoza Uganda. Kwenye mahojiano na chombo kimoja cha habari nchini humo, Bebe Cool ameeleza kuwa kutofanikiwa kwa NUP kuteua wagombea katika maeneo kadhaa ya uchaguzi ni ishara tosha ya kukosa maandalizi. Bosi huyo wa Gagamel, amesema licha ya NUP kuwa na takribani wabunge 57 katika Bunge la sasa, iliweza kuwasimamisha wagombea 297 pekee, huku NRM ikisimamisha zaidi ya wagombea 500, akiongeza kuwa tayari wabunge kumi wa NRM wamepita bila kupingwa. Kwa mtazamo wake, hali hiyo inaonyesha kuwa NUP haikuwa na watu wa kutosha wenye uwezo wa kugombea katika maeneo ambayo yalibaki wazi. Bebe Cool amesisitiza kuwa hali hii ni ishara kwamba Bobi Wine na timu yake bado wako mbali na kuelewa uhalisia wa siasa za kitaifa, akieleza kuwa upinzani huo unahitaji maandalizi zaidi. Kwa mujibu wa Bebe Cool, ukosefu huo wa utayari unadhihirisha kuwa NUP inapaswa kujipanga upya ikiwa inataka kuwa na nafasi ya kushindana kwa ufanisi katika siku zijazo. Amedokeza kuwa huenda chama hicho kitapata nafasi bora zaidi katika mwaka wa 2031, endapo kitaongeza maandalizi na uwekezaji wa kisiasa.

Mwanamuziki nguli kutoka Uganda, Bebe Cool, amefichua kuwa ziara yake ya siku saba nchini Kenya inalenga zaidi kushirikiana na wasanii wa humu nchini na kujenga mahusiano mapya katika tasnia ya muziki wa Afrika Mashariki. Akizungumza wakati wa mahojiano  jijini Nairobi, Bebe Cool alieleza kuwa anatamani kufanya kazi na wasanii wakubwa wa Kenya akiwemo Bien wa Sauti Sol, pamoja na wanamuziki waliotamba kwa miaka mingi kama Wyre na Nazizi. “Kenya ni nyumbani kwangu. Muziki wetu wa Afrika Mashariki unaweza kuimarika zaidi tukishirikiana. Niko hapa kwa wiki moja lakini nina malengo ya muda mrefu, si tu collabo moja,” alisema Bebe Cool kwa msisitizo. Mbali na wasanii, Bebe Cool pia alionyesha nia ya kufahamiana na DJs wapya wa Kenya, akisema wao ni kiungo muhimu katika kusukuma muziki wa kanda hii kimataifa. Mashabiki wa muziki wa Afrika Mashariki wamepokea taarifa hiyo kwa furaha, wengi wakitarajia mashirikiano ya kuvutia ambayo yatabeba ladha ya muziki wa Kenya na Uganda. Wadau wa burudani wanasema hatua hiyo inaweza kufungua milango ya ushawishi wa kimataifa kwa wasanii wa eneo hili.

Msanii maarufu wa muziki nchini Uganda, Bebe Cool, amefunguka kuhusu maswali yanayoendelea kuibuka kuhusu uwekezaji mkubwa alioufanya katika utengenezaji wa album yake mpya yenye nyimbo 16. Msanii huyo amefichua kuwa amewekeza zaidi ya dola 700,000 za Kimarekani kwenye mradi huo.Akizungumza na waandishi wa habari, Bebe Cool, ambaye jina lake halisi ni Moses Ssali, amesisitiza kuwa kiasi hicho cha fedha kimetumika ipasavyo kuhakikisha ubora wa hali ya juu wa album hiyo.Msanii huyo hakusita kuwajibu wale wanaotia shaka kiasi hicho cha fedha, akieleza kuwa gharama hizo zinajumuisha mambo mengi kuanzia kurekodi nyimbo katika studio za kisasa, malipo kwa watayarishaji wa muziki (producers) maarufu, uhandisi wa sauti (audio engineering), video za muziki zenye ubora wa hali ya juu, pamoja na gharama za masoko na matangazo.Album hiyo ya nyimbo 16 inatarajiwa kuzinduliwa hivi karibuni, na tayari imezua hamasa kubwa miongoni mwa mashabiki wake na wadau wa muziki. Bebe Cool ana matumaini kuwa uwekezaji huu utalipa na kumpa nafasi nzuri zaidi kwenye tasnia ya muziki ya kimataifa..