Tag: gor mahia

Timu ya daraja la tano ya BB Bread FC imeendelea kushangaza wengi kwenye michuano ya FKF MozzartBet Cup baada ya kuwaondoa vinara wa Kenyan Premier League, Gor Mahia, kufuatia ushindi wa mabao 1-0 katika mechi ya hatua ya 32 bora iliyochezwa Jumapili katika uwanja wa Nyayo National Stadium. BB Bread FC, timu ya makao yake Kayole inayoshiriki ligi ya daraja la tano, ilionyesha kiwango kikubwa dhidi ya Gor Mahia waliokuwa wakipewa nafasi kubwa ya kushinda. Bao pekee la ushindi lilifungwa dakika ya 84 na mchezaji wa akiba Dennis Muthini, na kuwahakikishia ushindi muhimu uliowapeleka hatua ya 16 bora. Katika mechi nyingine za hatua ya 32 bora, mabingwa watetezi Nairobi United waliibuka na ushindi mkubwa wa mabao 8-0 dhidi ya BMC Allstars. Nao Murang’a Seal waliibuka na ushindi mwembamba wa 1-0 dhidi ya Dynamo FC ya Divisheni ya Kwanza. Kwa upande wao, Kariobangi Sharks waliichapa KU Hardnuts mabao 4-0, huku Humphrey Aroko akifunga mabao yote manne katika mchezo huo. Posta Rangers nao waliibuka na ushindi wa mabao 2-0 dhidi ya Oinopsos. Washindi wa mwaka 2024, Kakamega Homeboyz, pia walijihakikishia nafasi ya kusonga mbele baada ya kuifunga Kipchimchim mabao 3-0 katika uwanja wa Bukhungu Stadium. Droo ya hatua ya 16 bora inatarajiwa kufanyika hivi karibuni, huku fainali ya mashindano hayo ikipangwa kuchezwa Juni 17. Bingwa wa michuano hiyo atapata nafasi ya kuiwakilisha Kenya katika mashindano ya CAF Confederation Cup msimu ujao

Mabingwa wa zamani wa Ligi Kuu ya Kenya, Gor Mahia, walirejea kileleni mwa jedwali la ligi hiyo licha ya kutoka sare ya bao 1–1 dhidi ya Nairobi United, katika mechi iliyochezwa jana. Gor Mahia waliingia uwanjani wakiwa katika nafasi ya pili lakini walianza mechi kwa kasi, wakifanikiwa kupata bao la mapema katika dakika ya 15 na kuongoza kwa bao moja hadi mapumziko ya kipindi cha kwanza. Hata hivyo, katika kipindi cha pili, Gor Mahia walishindwa kuimarisha safu yao ya ulinzi na kuruhusu Nairobi United kusawazisha bao katika dakika ya 58. Licha ya juhudi kutoka kwa pande zote mbili, hakuna timu iliyofanikiwa kupata bao la ushindi hadi kipenga cha mwisho. Matokeo hayo yaliifanya Gor Mahia kufikisha alama 24, sawa na Tusker FC, lakini Gor wakirejea kileleni mwa jedwali kwa tofauti ya mabao. Nairobi United, kwa upande wao, wanasalia katika nafasi ya 11 wakiwa na alama 17. Katika mechi nyingine ya ligi hiyo, Bandari FC iliibuka na ushindi wa bao 1–0 dhidi ya Mathare United, ikiendelea kuimarisha nafasi yake kwenye jedwali.

Gor Mahia iliendelea kushamiri katika Ligi Kuu ya Soka humu nchini walipomenyana na mabingwa watetezi Kenya Police katika mechi yao ya 7 Jumapili alasiri. Kogalo ambao mara ya mwisho walipomenyana na Polisi walitoka sare bao moja kwa moja tarehe 22 mwezi Juni mwaka huu walionesha ubabe wao huku wakiongoza kwa mabao mawili kwa nunge  kabla ya mapumziko. Green Army ilifunga mapema dakika ya 2 kupitia kwa Felix Oluoch kabla ya Sharif Musa kuongeza la pili dakika ya 29. Katika michuano nyigine, KCB iliandikisha sare ya kwanza msimu huu baada ya kutoka sare bao 1-1 na Bandari FC. APS Bomet Fc walitoka sare ya bao 1-1 na Mathare United huku Kakamega Homeboyz wakisajili sare yao ya kwanza msimu huu baada ya kulazimisha sare ya bao 1-1 na Murang’a Seal. Shabana ilitwaa ushindi wao wa tatu katika mechi 8 baada ya kuilaza Ulinzi Stars bao moja kwa nunge.

Kocha Mkuu wa Gor Mahia, Charles Akonnor ameelezea imani na kikosi chake huku vigogo hao wa soka humu nchini wakitarajiwa kuchuana na wababe wa Tanzania, Simba SC katika mechi ya kirafiki ya kujiandaa kwa msimu mpya kesho Septemba 10 jijini Dar es Salaam, Tanzania. Mechi hiyo inatarajiwa kuvutia maelfu ya mashabiki kutoka mataifa yote mawili ni ya kunoa tomi hizo kabla ya kung’oa nanga Kwa michuano ya ligi za nyumbani. Gor Mahia, ambao ni wabambe wa Ligi Kuu ya Kenya waliwasili Tanzania mapema wiki hii na wamekuwa wakiimarisha mazoezi yao. Kocha mkuu Charles Akonnor, ambaye alichukua hatamu mapema mwaka huu anasema kikosi chake kiko tayari kushamiri. Michuano ya ligi msimu huu itang’oa nanga tarehe 20 mwezi huu.