Tag: khaligraph jones

Rapa kutoka nchini Kenya, Khaligraph Jones, ametangaza kuingia rasmi katika ulimwengu wa fasheni kwa mpango mpya unaotarajiwa kuvutia mashabiki na wadau wa mitindo. Kupitia instastory yake, Rapa huyo amesema kuwa atazindua duka lake la mavazi na bidhaa za ubunifu mwaka 2026, hatua inayotafsiriwa kama mwanzo wa sura mpya katika safari yake ya kisanii na kibiashara. Kwa muda mrefu Khaligraph amekuwa akionekana katika mavazi ya kipekee yanayoendana na taswira yake ya uhodari na ubunifu, na sasa anaonekana kutaka kugeuza muonekano huo kuwa biashara madhubuti. Duka hilo litakuwa na mavazi ya kisasa, bidhaa za chapa yake na makusanyo yatakayoakisi mtindo wake wa kipekee unaojulikana na mashabiki wake. Wadau wa muziki na mitindo wanasema huu ni wakati mwafaka kwa rapa huyo kuchukua hatua hiyo, kwani ushawishi mkubwa mitandaoni vinaweza kulifanya jaribio hili kufanikiw­a kwa kiwango cha kimataifa.

Msanii nguli wa muziki wa rap nchini Kenya, Khaligraph Jones, ameanzisha rasmi rap battle ya wimbo wake mpya “Weyuat” baada ya kupata shinikizo kutoka kwa mashabiki wake mitandaoni. Khaligraph amesema awali hakupanga kufanya challenge hiyo, lakini mashabiki wake waliamua kuigeuza kuwa challenge rasmi. Amesema atapakia instrumental ya wimbo huo ili rappers wote wanaohisi wana uwezo waweze kuonyesha kipaji chao kupitia beat hiyo. Pia ameongeza kuwa endapo mambo yataenda vizuri, huenda wakafanya remix maalum ya wimbo huo. Rapper huyo ameahidi kutoa nafasi sawa kwa washiriki wote, akisisitiza kuwa changamoto hiyo ni jukwaa la kuibua vipaji vipya katika muziki wa rap Afrika Mashariki.

Mfalme wa rap nchini Kenya, Khaligraph Jones, amedokeza uwezekano wa kufanya kolabo na msanii anayechipukia kwa kasi, Toxic Lyrikali, huku akimsifia kwa kuendelea kushikilia mizizi ya rap nchini humo. Kupitia mazungumzo yaliyowekwa wazi na mdau wa muziki Thithad3, Khaligraph ameonyesha kuvutiwa na kazi ya Toxic, akisema kuwa kwa sasa ndiye anayeshikilia uhalisia wa rap nchini humo. Ameongeza kuwa iwapo watashirikiana kwenye wimbo, itakuwa ni kwa muda muafaka bila presha wala haraka. Iwapo kolabo hiyo itatimia, itakuwa moja ya ushirikiano unaosubiriwa kwa hamu zaidi katika muziki wa hip hop wa Kenya mwaka huu. Toxic Lyrikali, ambaye amekuwa akipata umaarufu kutokana na mtindo wake wa uandishi wa mashairi makali na uhalisia wa mitaani, anaendelea kutajwa kama mmoja wa wasanii wanaochukua nafasi kubwa katika kizazi kipya cha muziki wa hip hop nchini Kenya.

Rapper Khaligraph Jones ameonyesha heshima yake kwa aliyekuwa Waziri Mkuu wa zamani, hayati Raila Amolo Odinga, kwa kufichua michoro kadhaa (murals) ya kiongozi huyo zilizowekwa ndani ya jumba lake. Katika video iliyosambaa mitandaoni, Khaligraph anaonekana akitembea ndani ya nyumba yake ya kifahari, akionyesha kuta zilizopambwa kwa picha kubwa za Raila Odinga katika mitindo tofauti ya kisanaa. Msanii huyo amesema hatua hiyo ni njia yake ya kuenzi urithi na mchango wa Raila katika siasa na maendeleo ya Kenya, akimtaja kama kiongozi aliyeinua matumaini ya vizazi vingi. Mashabiki wake wengi wamepongeza hatua hiyo, wakisema ni ishara ya heshima na upendo kwa kiongozi ambaye amekuwa na athari kubwa katika historia ya taifa.

Rapa kutoka nchini Kenya, Khaligraph Jones, ameonyesha huzuni kubwa kufuatia mazishi ya aliyekuwa Waziri Mkuu Raila Amolo Odinga yaliyofanyika leo nyumbani kwake eneo la Bondo, Kaunti ya Siaya. Kupitia Insta stories yake, Rapa huyo amekiri kuumizwa sana na kifo cha kiongozi huyo, akisema kuwa tangu tukio hilo lifanyike amekuwa hana nguvu wala amani ya moyo. Ameongeza kuwa siku ya leo, ambayo ni ya mwisho ya kumpumzisha Odinga, inabeba uzito mkubwa kwa wale waliompenda na kumheshimu. Kwa mujibu wake, amechoka kihisia kutokana na msiba huo na ameitumia siku hii kumtakia Baba pumziko la amani kwa heshima na upendo mkubwa. Khaligraph Jones ni miongoni mwa maelfu ya Wakenya na mashabiki waliomuenzi Raila kama kiongozi mwenye maono, aliyepigania demokrasia na haki za wananchi kwa miongo kadhaa.

Rapa wa Kenya, Khaligraph Jones, ameeleza majonzi makubwa kufuatia kifo cha kiongozi wa upinzani Raila Amollo Odinga, akisema amebaki bila maneno ya kuelezea machungu anayoyapitia. Kupitia ukurasa wake wa mitandao ya kijamii, Khaligraph amekiri kuguswa sana na taarifa za kifo cha Raila, akieleza kuwa tangu jana amekuwa akihangaika kuamini kilichotokea. Rapa huyo wa ngoma ya “Ting Badi Malo”, amesema kifo hicho kimemwacha akiwa amevunjika moyo kabisa, akiongeza kuwa Raila atabaki kuwa shujaa wake wa milele.. Khaligraph, ambaye amewahi kumtaja Raila kama kiongozi mwenye ushawishi mkubwa katika maisha yake na kwa vijana wengi, amesema urithi wa Baba Raila utaendelea kuishi kupitia vizazi vinavyokuja.

Msanii nyota wa hip hop nchini Kenya, Khaligraph Jones, ameonekana kuguswa na kauli za mtangazaji Rapcha the Sayantist, aliyemshutumu vikali kwa kudai kuwa muziki wake na maisha yake yote ni ya kuigiza. Katika kujibu lawama hizo, Khaligraph ametumia ukurasa wake wa Instagram kwa mtindo wa utani, akionekana kugeuza matusi hayo kuwa fursa ya kumsaidia Rapcha kupata umaarufu zaidi. Amesisitiza kuwa kutajwa kwake ni njia rahisi ya kupata kiki, na akaenda mbali kwa kuwahimiza mashabiki wake wamfuate Rapcha mitandaoni. Pia ametoa dondoo kwamba anajiandaa kuachia freestyle mpya, hatua ambayo mashabiki wameihusisha na majibu ya muziki kwa ukosoaji aliopewa. Mashabiki mitandaoni wamegawanyika, baadhi wakiona kuwa Khaligraph ameonyesha busara kwa kutochukua mambo kwa hasira, huku wengine wakimtuhumu Rapcha kwa kutumia lugha ya matusi na kushusha heshima ya moja ya wasanii wakubwa zaidi wa hip hop Afrika Mashariki. Hayo yote yameibuka mara baada ya Rapcha kwenye moja ya Podcast kudai kuwa kila kitu kuhusu Khaligraph ni cha kubuni kuanzia lafudhi yake, madai ya kutoka Kayole, mtindo wa mavazi hadi muziki anaoutoa.