Tag: khaligraph jones

Rapa kutoka nchini Kenya, Khaligraph Jones, ameonyesha huzuni kubwa kufuatia mazishi ya aliyekuwa Waziri Mkuu Raila Amolo Odinga yaliyofanyika leo nyumbani kwake eneo la Bondo, Kaunti ya Siaya. Kupitia Insta stories yake, Rapa huyo amekiri kuumizwa sana na kifo cha kiongozi huyo, akisema kuwa tangu tukio hilo lifanyike amekuwa hana nguvu wala amani ya moyo. Ameongeza kuwa siku ya leo, ambayo ni ya mwisho ya kumpumzisha Odinga, inabeba uzito mkubwa kwa wale waliompenda na kumheshimu. Kwa mujibu wake, amechoka kihisia kutokana na msiba huo na ameitumia siku hii kumtakia Baba pumziko la amani kwa heshima na upendo mkubwa. Khaligraph Jones ni miongoni mwa maelfu ya Wakenya na mashabiki waliomuenzi Raila kama kiongozi mwenye maono, aliyepigania demokrasia na haki za wananchi kwa miongo kadhaa.

Rapa wa Kenya, Khaligraph Jones, ameeleza majonzi makubwa kufuatia kifo cha kiongozi wa upinzani Raila Amollo Odinga, akisema amebaki bila maneno ya kuelezea machungu anayoyapitia. Kupitia ukurasa wake wa mitandao ya kijamii, Khaligraph amekiri kuguswa sana na taarifa za kifo cha Raila, akieleza kuwa tangu jana amekuwa akihangaika kuamini kilichotokea. Rapa huyo wa ngoma ya “Ting Badi Malo”, amesema kifo hicho kimemwacha akiwa amevunjika moyo kabisa, akiongeza kuwa Raila atabaki kuwa shujaa wake wa milele.. Khaligraph, ambaye amewahi kumtaja Raila kama kiongozi mwenye ushawishi mkubwa katika maisha yake na kwa vijana wengi, amesema urithi wa Baba Raila utaendelea kuishi kupitia vizazi vinavyokuja.

Msanii nyota wa hip hop nchini Kenya, Khaligraph Jones, ameonekana kuguswa na kauli za mtangazaji Rapcha the Sayantist, aliyemshutumu vikali kwa kudai kuwa muziki wake na maisha yake yote ni ya kuigiza. Katika kujibu lawama hizo, Khaligraph ametumia ukurasa wake wa Instagram kwa mtindo wa utani, akionekana kugeuza matusi hayo kuwa fursa ya kumsaidia Rapcha kupata umaarufu zaidi. Amesisitiza kuwa kutajwa kwake ni njia rahisi ya kupata kiki, na akaenda mbali kwa kuwahimiza mashabiki wake wamfuate Rapcha mitandaoni. Pia ametoa dondoo kwamba anajiandaa kuachia freestyle mpya, hatua ambayo mashabiki wameihusisha na majibu ya muziki kwa ukosoaji aliopewa. Mashabiki mitandaoni wamegawanyika, baadhi wakiona kuwa Khaligraph ameonyesha busara kwa kutochukua mambo kwa hasira, huku wengine wakimtuhumu Rapcha kwa kutumia lugha ya matusi na kushusha heshima ya moja ya wasanii wakubwa zaidi wa hip hop Afrika Mashariki. Hayo yote yameibuka mara baada ya Rapcha kwenye moja ya Podcast kudai kuwa kila kitu kuhusu Khaligraph ni cha kubuni kuanzia lafudhi yake, madai ya kutoka Kayole, mtindo wa mavazi hadi muziki anaoutoa.

Msanii maarufu wa muziki wa hip hop nchini Kenya, Khaligraph Jones, ametangaza kwamba msururu wake wa rap cypher unaotambulika kama Khali Cartel ulimalizika rasmi mwaka jana. Kupitia Instagram Stories, Khaligraph alijibu shabiki aliyemuuliza kuhusu hatma ya mradi huo, akieleza kuwa Khali Cartel ilitimiza lengo lake kuu la kukuza na kutambulisha wasanii chipukizi kwenye tasnia ya muziki. Tangu kuanzishwa kwake mwaka 2018, Khali Cartel imekuwa jukwaa muhimu kwa wasanii wachanga kuonesha umahiri wao wa kurap, huku ikichangia kwa kiasi kikubwa kugundua na kukuza vipaji vipya katika tasnia ya muziki wa hip hop nchini Kenya. Hata hivyo, Khaligraph hakubainisha iwapo ataanzisha mradi mpya wa aina hiyo, bali alichukua fursa hiyo kuwashukuru mashabiki na wasanii wote waliokuwa sehemu ya safari ya Khali Cartel hadi mwisho wake.

Rapa maarufu kutoka Kenya, Khaligraph Jones, ameibua mjadala mkali mtandaoni baada ya kudai kuwa wasanii wengi walioko chini ya lebo kubwa za muziki wanapitia hali ngumu kifedha licha ya kuonekana wanaishi maisha ya kifahari. Kupitia mitandao ya kijamii, Khaligraph alifichua kuwa licha ya kupokea ofa nyingi za kusaini mikataba na lebo mbalimbali, aliamua kusalia huru na kusimamia kazi zake mwenyewe. Anaeleza kuwa wasanii wengi wakubwa wapo kwenye madeni makubwa na kwamba uhuru wa kifedha ndio umemwezesha kuendelea vizuri bila presha ya mikopo au masharti magumu ya mikataba. Rapa huyo anasema kuwa anathamini uhuru wa kifedha kuliko mvuto wa mikataba inayokuja na majina makubwa lakini haina manufaa ya moja kwa moja. Anaeleza kuwa maisha yake ni ya amani kwa sababu anamiliki kile anachonacho na hana mzigo wa madeni unaomkosesha amani. “Wengi wao mnaowaona ni wakubwa, lakini wako kwa madeni makubwa sana. Wengine wanateseka kimyakimya. Mimi nilikataa hizo deals zote, niko huru, sina deni, na naball kwa amani na mali yangu,” alisema Khaligraph. Katika ujumbe huo, Khaligraph alionyesha pia matumaini ya kupata mafanikio zaidi na kuboresha maisha yake, akitaja magari ya kifahari kama sehemu ya malengo yake ya baadaye. Kauli zake zimezua mjadala miongoni mwa mashabiki na wadau wa muziki, wengi wakiona kuwa ni onyo kwa wasanii chipukizi wawe makini na mikataba wanayosaini. Khaligraph ameendelea kujijengea jina kama msanii anayejitegemea kupitia lebo yake ya Blue Ink, huku akiendelea kung’ara ndani na nje ya Kenya. Wakati baadhi ya mashabiki walimpongeza kwa msimamo wake, wengine walihisi kuwa sio rahisi kwa kila msanii kujisimamia bila msaada wa lebo kubwa. Hata hivyo, ujumbe wake umeibua mjadala mpana kuhusu changamoto za kifedha zinazowakumba wasanii licha ya umaarufu wao.

Msanii maarufu wa muziki wa rap nchini Kenya, Khaligraph Jones, ameonyesha wazi kutoridhishwa na baadhi ya mashabiki wake ambao wamekuwa wakimpa ushauri wa namna anavyopaswa kuendesha kazi zake, hasa kuhusu maeneo ya kurekodia video zake. Kupitia ujumbe alioutoa mtandaoni, Khaligraph alieleza kuchoshwa na mashabiki wanaomshauri asirekodi video zake nyumbani kwake. Akiwa na msimamo mkali, alisema kuwa uamuzi wa kutumia nyumba yake kama sehemu ya kurekodia ni wa kimakusudi na una umuhimu wa kisanaa kwake.  “Wengi wenu mnasema nisifanye video nyumbani. Lakini nyumba yangu siilijenga kwa sababu gani? Kama si kuitumia kwa kazi zangu, ni kwa nini iwepo?” alisema Khaligraph. Rapa huyo alisisitiza kuwa hajawahi kuwa na matatizo ya bajeti au kutokuwa na nafasi ya kusafiri kwa ajili ya kurekodia, kwani tayari amefanya kazi katika nchi mbalimbali kama Nigeria, Marekani, na Afrika Kusini. “Suala si hela au uwezo wa kusafiri, ni chaguo la msanii. Wengine mnadhani mnaweza kuniambia nifanye nini na wapi. Weka ushauri huo kwa familia yako. Hapa tuko sawa,” aliongeza kwa ukali. Khaligraph, ambaye anajulikana kwa mtindo wake wa kusema ukweli bila kupindisha maneno, alihitimisha kwa kusema kwamba yeye si msanii wa kufuata shinikizo la mitandao ya kijamii, na ataendelea kufanya kile anachokiamini ni bora kwa muziki wake. Kauli hiyo imeibua hisia tofauti mtandaoni, baadhi ya mashabiki wakimuunga mkono kwa msimamo wake thabiti, huku wengine wakihisi kuwa alipaswa kuchukulia maoni hayo kwa mtazamo wa kujenga. Hili si tukio la kwanza kwa Khaligraph Jones kujibu mashabiki kwa sauti ya ukali. Akiwa miongoni mwa wasanii wanaojulikana kwa kusema ukweli bila kuficha, anaendelea kudhihirisha kuwa hatishwi na presha ya mitandao ya kijamii na anaamini katika maono yake mwenyewe kama msanii huru.